طريقة عمل الهريسة بالشطة

 طريقة عمل الهريسة بالشطة 

الهريسة بتدخل في آكلات كتير زي خلطة المحشي والتتبيلات بأنواعها وكمان ممكن نعمل منها مناقيش الفلفل اللذيذة تقدروا تعملوا منها كمية وتحفظوها في الفريزر هتفضل لشهور وممكن سنة من غير ماتتآثر .

المقادير والمكونات :-

- كيلو من الفلفل الرومي الأحمر . 

- كيلو من فلفل الشطة الأحمر .

- معلقة طعام كبيرة ونصف من السكر .

- معلقتين طعام كبيرة من الملح .

طريقة التحضير :- 

بعد ما نغسل الفلفل والشطة كويس ونشفهم نبدأ نقطع الفلفل الرومي بالطول علشان نطلع 

منه البذر وبعد كده بنقطعه لقطع متوسطة الحجم والشطة كمان نبدأ نقطع الجزء الأخضر 

اللي فيها ونشيل منها البذر وممكن نعمل ده بواسطة المقوار العادي بتاع المحشي الطريقة 

موضحة في الفيديو في نهاية الموضوع هنقطع الشطة بردوا ونخلطها مع الفلفل الرومي ( 

لازم تلبسوا جوانتي  لأن الشطة بتحرق الإيد جداً ممكن تلبسوا كيس نايلون زي كيس 

السندوتشات لو الجوانتي مش متوفر ولو حسيتوا بحرقان ممكن بعد كده تبقوا تدهنوا 

ايديكوا بزيت الآكل العادي او تحطوا ايديكوا في الدقيق ده هيخفف الحرقان جداً ) وبعد ما 

قطعنا الفلفل والشطة نخلطهم مع بعض و  نفرمهم كويس في الكبة وبعدين نحط الخليط 

المفروم في طاسة أو حلة على النار وتكون درجة النار متوسطة علشان لو حطناه على 

درجة حرارة منخفضة هيفضل يسرد الميه اللي في الفلفل وهياخد وقت على ما الفلفل 

يستوى والميه اللي فيه تنشف علشان كده من الأفضل اننا نعلي النار وتكون متوسطة 

هنفضل نقلب الخليط من وقت للتاني لحد منحس ان مية الفلفل بدأت تقل وبدأ الفلفل ينشف 

بعد كده هنضيف السكر والملح ونقلبه كويس والملح هنا مهم يكون طعمه ظاهر  في الفلفل 

بس ميبقاش لدرجة الحدقان بس وهنسبها على النار تكمل التسوية لحد ما الخليط ينشف 

تماماً من المية ويستوي كويس هتلاقوا لونها أحمر جميل من غير إضافة بابريكا ولا 

حاجة هتفضل محافظة على لونها الجميل وكمان طعمها رائع أهم حاجة الفلفل وانتوا 

بتشتروه سواء الرومي أو الشطة لازم يكون لونهم أحمر داكن ويكونوا طازة ومنشلهمش 

في التلاجة بعد الشراء لأ لازم نعمل الوصفة على طول علشان الفلفل ميدبلش ويطرى في 

     التلاجة كده هيديكوا نفس النتيجة اللي هتشوفوها في الفيديو وبإذن الله تعجبكم .

وبألف هنا ...

مخلل الزيتون بأسهل وأحلى طريقة

 مخلل الزيتون بأسهل وأحلى طريقة

الزيتون من المخللات اللي معظمنا بيفضلها جمب الأكل لأنها بتدي طعم لذيذ مع الأكل وكمان تعتبر فاتح للشهية وتفتح النفس للأكل بس طبعاً منكلش منه كتير ونشرب سوائل كتير بالأخص الميه علشان  ميحصلش زيادة في معدل الأملاح بالجسم .

المكونات والمقادير :- 

- 3 كيلو من الزيتون الأخضر النوع اللي استخدمته هنا نوع اسمه زيتون تفاحي .

- كيلو من الليمون الأصفر متوسط الحجم .

- نصف كيلو من الفلفل الأخضر البارد + ربع من الفلفل الأحمر الحار .

- ملح .

- زيت ذرة أو زيت زيتون .

- حوالي 4-5 لتر من الميه المغلية ونخليها تبرد تماماً قبل منستخدمها .

- بيضة علشان نختبر بيها معدل  الملح .

طريقة التحضير :- 

أولاً :- 

بنغسل الزيتون كويس وننقعه في ميه من يوم ليومين وبعد كده نصفيه ونبدأ نعمل خط بالطول بالسكينة في الزتونة من الجنبين علشان محلول الميه والملح يدخل في قلب الزيتون ويساعد في التخليل بشكل سليم .

ثانياً :-

نقطع الليمون لأربع أجزاء وبنستخدمه زي ماهو بدون منعصره او نفرمه ونقص العنقود الأخضر بتاع الفلفل علشان ميأخذش حيز في البطرمان ونعمل فتحة أو خط صغير بالسكينة في الفلفل من دون ميتقطع بيفضل سليم بنفس الحجم وده علشان محلول الميه يدخل في قلبه وميسببش تعفن للفلفل وباقي المخلل بعد كده بنخلط الزيتون والليمون والفلفل مع بعض في طبق بلاستيك غويط .

ثالثاً :- 

بعد منغلي الميه وده زيادة للتعقيم وعلشان تحافظ أكتر على المخلل بنسبها تبرد تماماً وبعد كده بنضيف الملح للميه حوالي 600 جرام من الملح ونقلبه كويس في الميه وبعد كده نجيب البيضة نغسلها ونحطها زي ماهيا في الميه لو طلعت وظهرت على سطح الميه يبقى كده الملح مظبوط ولو البيضة غطست لتحت يبقى الميه محتاجة ملح أكتر وهكذا ودي أسهل طريقة علشان نظبط الملح في الميه .

رابعاً :- 

هنجيب المخلل اللي خلطناه ونبدأ نعبيه في البطرمانات وبعد كده نضيف الزيت حوالي كوب الا ربع حسب حجم البطرمان وبعد كده نضيف الميه للبطرمان ولازم كمية الميه تغطي المخلل بالكامل وممكن نحط الزيت على السطح بعد منضيف الميه بعد كده نبدأ نغطس المخلل بمعلقة علشان الميه تكون اعلى منه علشان لو ارتفع عن الميه ممكن يدخلو هوا ويسببله تعفن بعد منغطسه كويس نجيب كيس نايلون زي كيس الساندوتشات ونتنيه على قد فتحة البطرمان ونغطي بيه سطح المخلل علشان يمنع الهواء من الدخول ونجيب كيس تاني ونفرده على فوهة البطرمان علشان تغطيها ونقفل بعد كده بغطى البطرمان عليها والطريقة هتكون واضحة اكتر في الفيديو .

وبألف هنا... 

طبق فريك بقطع الدجاج

      

     طبق فريك بقطع الدجاج      

الفريك من الأكلات المميزة والمفيدة جدا لأنه بيحتوي على فيتامين ب المركب وفيتامين ه 

اللي بيساعد على استرخاء العضلات وبيعمل على تحسن الحالة المزاجية وبيقلل من 

التوتروالقلق النفسي وكمان بيحتوي على العديد من الألياف اللي بتساعد فى الحماية من 

أمراض الجهاز الهضمي زي الإمساك والتخلص من السموم في الجسم ، كل الفوائد دي 

واكثر من كدة فوائد كثيرة ومتعددة للفريك تخليه يستحق التجربة آن شاء الله الطريقة دي 

تعجبكم .  

*المقادير والمكونات :-

نصف كيلو من أوراك الفراخ مخلية ومقطعة لقطع متوسطة الحجم .

- نصف كيلو فريك .

- زيت وزبدة .

 

- بصلتين متوسطين مفرومين .

- فصين ثوم كبار .

- جزرة كبيرة مبشورة .

- حبة صغيرة من الفلفل الأخضر الرومي .

- حبتين طماطم منزوعة القشرة .

- 2 مكعب مرق دجاج .

- ملح الكمية حسب الرغبة .

- ربع معلقة صغيرة فلفل أسود .

- نصف معلقة صغيرة كمون .

- نصف معلقة صغيرة بابريكا .

طريقة التحضير:-

أول حاجة بنغسل الفريك كويس وبعد كده ننقعه في ميه لمدة ربع ساعة ( الفريك اللي 

استخدمته في الوصفة دي هو الفريك الأصفر مش الأخضر لأن الأخضر بيفضل جامد في 

المضغ حتى بعد التسوية فيفضل استخدام الفريك الأصفر )  بعد كده هنحضر اوراك 

الفراخ بعد منغسلها ونصفيها نقطعها لقطع متوسطة ومتساوية بعد كده نحمر البصل والثوم 

في الزيت والزبدة لحد مايأخذ اللون الذهبي بعد كده نضيف قطع الفراخ والملح وباقي 

البهار الفلفل الأسود والكمون والبابريكا ونقلبهم كويس مع البصل والثوم ونسيب الفراخ 

تتشوح شوية مع البصل وتبقى متماسكة بعد كده هنصفي الفريك من الميه ونضيفه لقطع 

الفراخ ونضيف ليه مكعبات المرق ونقلبهم كويس مع بعض ونسيبه شوية على النارلحد ما 

ينشف من الميه اللي كان منقوع فيها نقطع 

الطماطم والفلفل الرومي لقطع متوسطة الحجم ونبشر الجزرة ونضيفهم للفريك ونقلب لحد 

ما المكونات تتمزج كويس مع بعض وبعد حوالي 10 دقائق نضيف حوالي نصف لتر من 

الميه المغلية ونقلبهم ونسيب الفريك لغاية مايغلي وبعد كده نهدي النار ونسيب الفريك 

يستوي ويشرب الميه او ممكن ننقله في طاجن ويستوي في الفرن ، وبكده يكون الفريك 

جاهز للأكل بألف هنا .

تقدروا تشوفوا الطريقة مصورة في الفيديو أسفل الموضوع .

           

حلوى العاشوراء مغذية ولذيذة

 

 حلوى العاشوراء مغذية ولذيذة 

 

حلوى العاشوراء أو العاشورا بالعامية هي من الحلويات التاريخية لأنها مش وليدة العصر الحديث ويقال أنها اتعرفت في مصر في فترة حكم الفاطميين لمصر وسبب التسمية إن المسلمين بيصوموا اليوم التاسع والعاشر من شهر محرم اقتداءا بالرسول عليه الصلاة والسلام اللي صامهم بعد هجرته من مكة إلى المدينة وعرف أن اليهود صايمين اليوم ده لان ده اليوم اللي نجى فيه ربنا سبحانه وتعالى سيدنا موسى من آل فرعون فقرر الرسول عليه السلام يصوم اليوم ده وقال إن العام المقبل نصوم يوم قبله وهما التاسع والعاشر من محرم لأننا أولى منهم بسيدنا موسى عليه السلام .   

المكونات :- 

300 جرام من القمح 

كوب من الأرز

2لتر حليب

كوب ونصف سكر

معلقة كبيرة من نشا الذرة مذابة في نصف كوب ماء 

3معالق كبار من ماء الورد حسب الرغبة 

مكسرات مجروشة وجوزهند وزبيب للتزيين

   الطريقة :- 

بعد ما ننقي القمح ونغسله كويس بننقعه في ميه وتكون الميه مغطية القمح  لمدة 5 ساعات 

وبعدها نغلي ميه على النار وبعد الغليان نضيف ليها القمح ونسيبه يستوي على النارونقلبه 

من فترة للتانية علشان نتأكد أن الميه اللي فيه مناسبة لتسوية القمح وبعد مايستوي نصفيه 

كويس وبعدها نجيب الرز ونسلقه برده في ميه ونقلبه من فترة للتانية علشان ميلزقش 

وكمان نتأكد أن لسه فيه ميه يكمل بيها التسوية وبعد ما يستوي الرز نضيف ليه الحليب 

من غير ما نصفي الرز احنا بنستخدمه بمية الرز علشان فيها قيمة غذائية وفي نفس الوقت 

أخف من مية القمح ونسيب الحليب يغلي مع الرز شوية وبعد كده نضيف السكر ونقلبهم 

كويس وبعد شوية نضيف النشا المذاب ونقلب الخليط كويس ونتأكد من القوام انه اصبح 

سميك شوية ونرفعه من على النار وبعدها نضيف ماء الورد حسب الرغبة وبكده تكون 

جاهزة ولازم نصبها على طول في اطباق التقديم علشان لو سبناها هتتخن اكتر وهيكون 

صعب توزيعها ونقدر نزين العاشورا بعد توزيعها في الأطباق بالمكسرات وجوزالهند 

والزبيب وطبعاً ده حسب الرغبة .  

تقدروا تشوفوا الفيديو لطريقة التحضير وبألف هنا👌

 

مفرش ورد من الكروشيه بطريقة بسيطة مناسب للمبتدئين في الكروشيه

مفرش ورد من الكروشيه سهل وبسيط 

موضوع النهاردة هيكون عن طريقة سهلة ومناسبة للمبتدئين في الكروشيه وهي مفرش من الورد بسيط وحلو في نفس الوقت هنستخدم فيه 3 غرز سهلة وبسيطة جدا

الغرز المستخدمة :-

- غرزة السلسة .

- غرزة الحشو .

- غرزة المنزلقة .

الأدوات المستخدمة:-

- إبرة كروشيه مقاس 4m .

- خيوط مناسبة لمقاس الإبرة وممكن نستخدم بواقي الخيوط أنا هنا استخدمت خيوط قطن

- ابرة تنظيف .

- ممكن علشان نضيف لمسة جمالية اكتر للمفرش نستخدم فصوص لولي نصف دائرة أوأي خرز نصف دائرة .

طريقة عمل المفرش وتزيينه بالخرز هتلاقوها في الفيديو التالي أتمنى تنال إعجابكم  

 

مهلبية السحلب وقمر الدين

 المهلبية اللذيذة

قمر الدين من الحاجات الأساسية  في رمضان سواء كان عصير أو حلويات بس بعد رمضان بيتبقى عندنا  من قمر الدين والخشاف علشان كده ممكن نستغل الحاجات دي في حلويات زي المهلبية وآكلات تانية مختلفة كمان حبيت اجرب السحلب مع المهلبية والحمدلله كانت التجربة حلوة ، وكمان هنشوف مع بعض ازاي نخلي طبق المهلبية البسيط يبقى طبق مميز وحلو للضيوف خاصة انها من اسرع الحلويات اللي ممكن تتعمل في اي وقت ، اسبكم مع المقادير وطريقة التحضير.

مقادير المهلبية بالسحلب :-  

 - 3 أكواب من الحليب .

- 4  معالق كبار سكر.

- معلقة كبيرة من النشا .

- 2 معلقة كبيرة من السحلب .

الكمية دي تكفي 6 كاسات لو هنضيف عليها من قمر الدين يعني الكاسة يكون نصها مهلبية عادية والنصف التاني مهلبية قمر الدين و طبعا حسب حجم الكاسة   

طريقة التحضير:- 

اول حاجة بنبدأ نضيف الحليب على نار هادية وبعد كده بنضيف باقي المكونات ونقلبهم 

كويس لغاية ما يدوب النشا والسحلب وممكن نستخدم المضرب اليدوي علشان ندوبهم 

كويس المهم أننا نعمل الحركة دي قبل ما الحليب يبدأ يسخن علشان النشا متكلكعش مننا 

ويبقى صعب اننا ندوبها ونستمر بعد كده في التقليب كل حين لغاية ما المهلبية القوام بتعها 

يبدأ يتخن وتغلي كويس وتوصل للقوام اللي احنا عايزينه بعد كده نبدأ نصبها في كاسات 

التقديم على طول قبل ما تبرد علشان متكلكعش

مقادير مهلبية قمر الدين :- 

- ربع كيلو قمر الدين .

- 4 كوب من الماء .

- 12 معلقة كبيرة من السكر .

- 4 معالق كبار من النشا مذابة في نصف كوب ماء .

طريقة التحضير :-

بنقطع كمية القمر الدين اللي هنستخدمها لقطع صغيرة علشان تدوب بسهولة وبعد كده 

بنضفها لكمية الميه ونسبهم على النار لغاية ما قمرالدين يدوب تماما لو في قطع مش 

عايزة تدوب ممكن ندكها بالمعلقة ونسيبه يغلي شوية بعد كده نضيف كمية السكر ونسيبه 

يغلي تاني مع السكر لغاية مايدوب السكرونكون محضرين النشا و ندوبها في الميه كويس 

ونضيفها ليه علشان يبدأ القوام يتخن ويبقى مهلبية نقلب الخليط كويس وبعدما الخليط يغلي 

شوية ويأخذ القوام المطلوب نرفعه من على النار ونبدأ نصبه في كاسات التقديم

ممكن كمان لو عندنا فاكهة مجففة نقطعها ونضفها للمهلبية بعد مانرفعها من على النار ونقلبهم بسرعة ونصب الخليط بعد كده في كاسات التقديم

وده فيديو للطريقة صوت وصورة وبألف هنا

أساور الصداقة بطريقة سهلة وبسيطة

 أساور الصداقة بخيوط الكروشيه 

في الموضوع ده هنتعلم طريقة مميزة وبسيطة نقدر نعمل بيها أشكال متنوعة من الأساور 

زي أساور الصداقة وطبعا تقدروا تتحكموا في ألوانها وأشكال الخرز اللي هتستخدموه 

وطبعا كل ما كانت الحاجة مصنوعة بإيدنا كل ماكانت مميزة اكتر عن الحاجة الجاهزة

 النوع ده من الأساور سهلة وتقدروا تنفذوها بكل سهولة    

كل اللي هنحتاجه :-

- خرز باللون والشكل اللي تحبوه انا هنا استخدمت خرز كريستال .

- فواصل وده اسمها في خامات الاكسسوارات بتتحط بين الخرز وبيكون حجمها أصغر من حجم الخرز المستخدم وممكن استبدال الفواصل بخرز يكون حجمه أصغر من الخرز الأساسي .

- خيط للأساور وده في منه أنواع زي النايلون أو المكرمية الخاصة بالأساور بس انا هنا استخدمت خيط كروشيه من  إليزا ديفا وطبعا اللون حسب اختياركم .

- ابرة خياطة بس تكون خاصة بتطريز الخرز علشان الخرز يدخل في الإبرة بسهولة وخيط خياطة عادي وهتعرفوا استخدامه وطريقة تنفيذ الأساور من خلال الفيديو التالي . 

اتمنى الطريقة تعجبكم وتكون الفكرة واضحة