طريقة عمل عجة القرنبيط المقلي + فوائد القرنببط ( الزهرة )

 

طريقة لذيذة للقرنبيط المقلي

القرنبيط من الأكلات المفيدة 

جداً وبيتعمل بطرق مختلفة 

لكن 

للأسف كتير من الناس 

مبتحبش تتناول القرنبيط 

بسبب عدم 

حبهم لطعمه في موضوع 

النهاردة هنعمل خلطة جميلة 

جداً 

للقرنبيط المقلي هتغير رأيكم 

في طعم القرنبيط .

تعالوا الأول نعرف مع بعض 

فوائد القرنبيط :-

• يساعد على الوقاية من 

• الامساك.

• الحفاظ على صحة الجهاز 

• الهضمي على وجه العموم.

• خفض فرص الإصابة 

• بسرطان القولون .

 وخفض فرص الإصابة :-

• بمرض القلب التاجي.

• الجلطات.

• ارتفاع ضغط الدم .

• السكري.

• السمنة.

  كما يعمل تناول جرعات 

كبيرة من الألياف على 

خفض الكوليسترول 

وخفض ضغط الدم المرتفع

 المقادير :-

• قرنبيط مسلوق .

• 10 معالق كباردقيق أبيض جميع الاستعمالات .

• 4 معالق كبار من نشا الذرة .

• ربع معلقة كبيرة كرباناتو ( بيكربونات الصوديوم )

• نصف معلقة كبيرة كمون .

• معلقة الا ربع كبيرة من البابريكا .

• ربع معلقة كبيرة فلفل أسود .

• ملح .

• 2 معلقة كبيرة من الثوم المفروم .

• ماء لعجن الخليط .

• 5 بيضات .

• عودين من الكزبرة الخضراء والبقدونس والشبت الأخضر .

• زيت للقلي .

طريقة سلق القرنبيط :-

في البداية هنقطع القرنبيط 

ونفصصه ونغسله كويس 

بالماء 

الجاري بعد كده في حلة 

نضيف ماء بحيث يغطي 

القرنبيط 

ونضيف شوية ملح وكمون 

ونسيبه على النار لحد ماالماء 

يبدأ 

يغلي كويس بعدها نصفي

القرنبيط 

من الماء كويس قبل 

مانضيفالقرنبيط لخليط 

الدقيق لازم القرنبيط يكون 

دافي مش سخن ولازم 

القرنبيط يكون مستوي نصف 

تسوية(نصف سلقة )علشان م

يتهريش مننا في القلي .

طريقة تحضير خليط 

العجينة لقلي القرنبيط :-

نخلط المكونات الجافة مع 

بعض الأول ( الدقيق و النشا 

و الملح و الكرباناتو و الفلفل 

الأسود و الكمون و البابريكا ) 

بعد كده نضيف الثوم ونبدأ 

نخلط المكونات بالماء 

بنضيف الماء بالتدريج 

ونخلط المكونات كويس لازم 

نقلبهم لحد ما الدقيق يذوب 

ويكون الخليط ثقيل شوية 

يعني منزودش ماء 

لأن البيض هيخفف الخليط 

بعد منتأكد ان الدقيق ذاب 

تماماً نضيف البيض ونقلب 

المكونات كويس ونخلطهم 

مع بعض هتلاحظوا إن 

الخليط أصبح أخف من 

الأول بعد كده نضيف 

الخضرة ( الكزبرة و 

البقدونس و الشبت ) 

ونقلبهم كويس مع 

الخليط بعد كده هنضيف 

جزء من القرنبيط 

المسلوق ونقلبهم كويس في 

الخليط بعد كده هنسخن 

الزيت على النار ونبدأ نشيل 

قطعة القرنبيط بالمعلقة 

ونأخذ معها شوية من 

الخليط ونحطها في الزيت 

ولازم يكون سخن علشان

القرنبيط ميشربش الزيت 

وممكن الخليط يلزق في 

طاسة القلي لو الزيت 

بارد هنملى طاسة القلي 

بالقرنبيط على قد مساحة 

الطاسة منزودش كتير 

علشان نعرفنقليهم كويس 

لما يبدأ القرنبيط يحمر من 

الأطراف ويكون ذهبي نبدأ 

نقلبهم على الجهة الأخرى 

علشان يحمر من الجهتين بعد 

ما يحمر نشيله من على 

النار ونصفيه من الزيت 

كويس ونحطه في صينية 

واسعة عليها 

مناديل مطبخ علشان يصفي 

الزيت عليها ويفضل اننا 

منضفش قطع القرنبيط فوق 

بعض بعد منخرجهم من  

الزيت علشان يصفوا من 

الزيت كويس هنقلي باقي 

القرنبيط بنفس الطريقة 

وممكن لو اتفضل شوية من 

الخليط نقليه عادي زي العجة 

أو الفلافل بيبقى طعمه حلو 

جداً وممكن اللي مبيحبش 

القرنبيط يأكل منه .

تقدروا تقدموا القرنبيط مع 

البطاطس المقلية وطبعاً 

البطاطس تتقلي الأول قبل 

القرنبيط علشان الزيت بيكون 

نظيف وممكن 

تقدموا معاه صوص الكاتشب 

والمايونيز بإضافة كميات 

متساوية من المايونيز 

والكاتشب وخلطهم مع بعض 

تقدروا تغمسوا بيه 

القرنبيط والبطاطس بيدي 

طعم مسكر وجميل مع الأكل 

، وبألف هنا .

فيديو للوصفة بشرح وافي

طريقة تفريز القرنبيط

طريقة عمل البسبوسة بجوز الهند + طريقة عمل قطر البسبوسة

 

بسبوسة بجوز الهند

البسبوسة من الحلويات اللذيذة جداً وفي إجماع كبير من الناس على حبها وليها طرق مختلفة ومتعددة في موضوع النهاردة حبيت أقدمها بطريقة بسيطة وسهلة ومن غير   متاخد وقت كبير ، أتمنى تجربوا الوصفة وتنال إعجابكم .

 المقادير :-

- 2 كوب سميد ناعم سادة .

- 1 كوب جوز هند مبشور ناعم .

- نصف كوب سكر أبيض .

- معلقة كبيرة بيكنج بودر . 

- كوب إلا ربع سمنة أو زبدة سائلة .

- علبة واحدة صغيرة من الزبادي ( الروب ) .

- كوب الا ربع من الحليب بدرجة حرارة الغرفة .

- لوز مقشر للتزيين .

 مقادير قطر ( شربات ) السكر للبسبوسة :-

- 2 كوب من السكر الأبيض .

- 2 كوب من الماء .

- حوالي 4 جرام من الفانيليا .

( لازم نستخدم نفس الكوب في قياس كل المقادير يعني الكوب يكون بنفس الحجم علشان المقادير تطلع مظبوطة )

طريقة تحضير البسبوسة :-

هنخلط دقيق السميد مع جوز الهند والسكر والبيكنج بودر في البداية ونقلبهم كويس بعد كده هنضيف السمنة أو الزبدة المذابة على النار بس متكنش سخنة تكون دافئة ونقلب المكونات بعد كده هنضيف الزبادي ونصف كمية الحليب ونقلبهم مع بعض لحد ما الخليط يتشرب كمية الحليب والزبادي ويصبح ناعم وطري ومتماسك يعني لو أخذنا كمية وشكلناها تكون متماسكة ومتفتفتش لو حاسين انها محتاجة شوية سائل كمان علشان تكون متماسكة أكثر ممكن تضيفوا باقي كمية الحليب أو جزء منها على حسب إحتياج الخليط هنعجن المكونات كلها مع بعض كويس لحد ما الخليط يصبح متماسك المهم منعجنش فيها كتير مجرد ما توصل للتماسك المطلوب نوقف عجن بعد كده في صينية الخبز هندهنها كويس بالزبدة أو السمنة في جميع الأطراف والجهات وعلى أطراف الصينية بعد كده هنضيف خليط البسبوسة للصينية ونبدأ نفرد الخليط على الصينية كلها بايدنا أو معلقة مسطحة المهم يتوزع ويتفرد على كامل الصينية بالتساوي لو هنفرد بايدنا فممكن نبلها بشوية ماء علشان نعرف نفرد الخليط كويس من غير ما الايد تطبع على الخليط وممكن نهز الصينية شوية علشان نتأكد ان الخليط متساوي ومتوزع كويس وبعد كده نبدأ نقطعها بالسكينة قبل ما تدخل الفرن علشان أول ماتخرج نسقيها بالشربات على طول ويدخل وسط قطع البسبوسة ونزينها باللوز زي منحب و  ممكن نخليها ترتاح في الصينية شوية حوالي 10 دقايق علشان السميد يطرى أكثر وينعم وممكن تدخلوها الفرن على طول لو مستعجلين وتخلوها في نصف الفرن على درجة حرارة 180 – 200 حسب حجم الفرن وهنشغل الفرن من تحت لو أحمر من تحت هيبان على الأطراف هتبدأ تحمر في الوقت ده لو محمرتش من فوق تقدروا تشغلوا عليها الشواية من فوق على درجة حرارة متوسطة  وتخلوا بالكم لحد ما تحمر بعد ماتخرج من الفرن لازم نسقيها بشربات السكر ويكون سخن لازم البسبوسة والشربات يكونوا سخنين ونوزع الشربات على كل القطع بالتساوي وممكن نميل الصينية في كل الإتجاهات علشان الشربات يتسرب للأسفل ويوصل لكل القطع . 

 طريقة تحضير الشربات :-

هنضيف الماء والسكر في كسرولة على النار ونقلبهم كويس في البداية لحد مايبدأ يسخن و بعد كده هنعلي النار لحد ما الماء يبدأ يغلي بعد كده هنهدي النار ونضيف الفانيليا ونسيب السكر يذوب براحته الشربات بيكون جاهز لما نلاقي السكر ذاب تماما والقوام بدأ يتقل شوية كده يكون الشربات جاهز معانا .

ودلوقتي تقدروا تاكلوا احلى بسبوسة طريقة وخفيفة وسكرها معقول مناسب للجميع ، وبألف هنا .

فيديو لوصفة البسبوسة بجوز الهند ⬇

حمص الشام ( الحلبسة ) بأسهل وأسرع طريقة وطعم رائع

 حمص الشام وفوائده

 

حمص الشام ( الحلبسة ) من ألذ المشروبات الساخنة في الشتاء مش بس بتدفي الجسم لأ كمان بتمده بالطاقة وقيمة غذائية عالية الحمص لوحده فوائده متعددة من أهمها انه بيحتوي على عناصر غذائية متنوعة أهمها البروتين والفيتامينات والمعادن المهمة لصحة الجسم والمنظمة لحركة الجهاز الهضمي، والتي تعمل على تقوية جهاز المناعة ، الحمص من أبرز أنواع البقوليات الغنية بالبروتين النباتي الذي يساعد على تجديد أنسجة الجسم وبناء العضلات والعظام والغضاريف، كما أنه غني بالألياف الغذائية القابلة للذوبان التي تعطي شعورًا بالشبع وتحافظ على مستوى السكر في الدم فضلًا عن أنه بيحسن الهضم والامتصاص الحمص أيضًا بيحتوي على النشويات المعقدة وبتأخذ وقت طويل في الامتصاص وبالتالي بتستهلك من الجسم الطاقة اللازمة لتدفئته، فضلًا عن غناه بالحديد والكالسيوم، كما يساعد في خفض مستوى الكوليسترول الضار في الجسم، وبالتالي يحمي من زيادة الوزن وبيحافظ على صحة القلب والشرايين، إلى جانب غناه بمضادات الأكسدة كل الفوائد دي بتزيد أكتر مع الاضافات اللي بنضفها لحمص الشام ( الحلبسة ) زي الثوم والطماطم ، الشطة ، الليمون كل ده بيخلي لحمص الشام مش بس نكهة خاصة ولذيذة لأوكمان قيمة غذائية عالية تخليه الخيارالأفضل لمشروبات الشتاء الساخنة.

المكونات والمقادير :-

-ربع كيلو من الحمص .

 - بصلة واحدة متوسطة الحجم .

- حبة واحدة من الطماطم متوسطة .

- معلقة كبيرة من الثوم المفروم .

- نصف معلقة كبيرة من البابريكا .

- نصف معلقة كبيرة من الكمون .

 -ملح .

- شطة بودر أو صوص الشطة الجاهز حسب الرغبة .

- ليمون .

طريقة التحضير :-

قبل منبدأ في تسوية الحمص لازم نكون ناقعين الحمص قبلها بليلة كاملة علشان يسرع في عملية التسوية وبعد فترة النقع بنصفيه ونبدأ نضيف ليه مياه جديدة علشان التسوية هنحط الحمص ويكون مغمور بالماء وطبعاً الماء حسب عدد الأشخاص ولو الماء كميته قلت ولسه الحمص مستواش نقدر نزيده بمياه مغلية ، هنسيب الحمص يغلي على النار لحد مايبدأ يظهر الريم أو الرغوة البيضاء اللي بتظهر عادةً مع البقوليات لإحتوائها على البروتين النباتي لما تظهر الرغوة دي لازم نشيلها بالمعلقة وبعد كده نضيف المكونات الباقية هنضيف البصلة تكون متقشرة فقط من غير تقطيع ونضيف معاها حبة الطماطم وكمان تكون متقشرة بدون تقطيع ونضيف البابريكا وربع معلقة كبيرة من الكمون وممكن تضيفوا الشطة البودر لو كل اللي هيشرب بيحبها نضيف المكونات دي ونسيب الحمص يستوي على النار هنضيف الثوم والملح وباقي كمية الكمون الربع معلقة لما يكون باقي على تسوية الحمص حوالي 10 دقائق لأن ده بيضيف ليه مذاق أحلى وأجمل ، بعد ما يكتمل تسوية الحمص بيكون جاهز للتقديم تقدروا تقدموا معاه ليمون مقطع علشان يتعصر على الأكواب حسب الرغبة كمان ممكن تقدموا معاه زجاجة صوص الشطة الجاهزة علشان كل واحد هيشرب يضيف من الشطة الكمية المناسبة ليه ، وبكده تكون اكتملت وصفتنا أتمنى تجربوها وتنال إعجابكم .

                                   وبألف هنا .

     هتلاقوا طريقة حمص الشام ( الحلبسة ) في الفيديو التالي ⬇