الجمعة، 16 أكتوبر 2026

هواية وحرفة

 

هوايات / صناعة يدوية/ صناعة الحلي/ هاندميد/ إكسسوارات/ هدايا

من وقت ما كنت طفلة وانا بنجذب جداً للشغل اليدوي وكنت دايماً بفكر ازاي البنت أو الست اللي ماسكة الإبرة وبتطرز أو بتحيك كروشيه أو بتفصل ملابس ازاي قدرت تعمل الشغل ده بإتقان وكنت بحسهم بيستمتعوا وهما بيعملوا ده وكنت بشوفهم مشغولين بالقطع الفنية اللي بين ايديهم وكأنهم مفصولين تماماً عن الواقع كنت بحب فيهم الإحساس ده جداً إنهم مشغولين بحاجة بيحبوها وبيستمتعوا بيها وبيطلع من بين ايديهم قطع في منتهى الجمال بتفصلهم عن اللي حواليهم علشان النتيجة تكون مبهرة ، لما كنت بشوفهم في الواقع أو التلفزيون كنت بحس قد ايه الشغل اللي بيشتغلوه حلو جداً ومميز وأنهم أكيد عندهم قدرة خاصة علشان يقدروا يعملوا الشغل ده بالسهولة اللي كنت بشوفها عليهم كنت بحس إن مش اي حد يقدر يعمل اللي هما بيعملوه ، فلما جاتلي الفرصة ان أبدأ أتعلم حاجة من الحرف دي بدأت على طول وبدون تردد وبدأت أول حاجة بالكروشيه بس كان صعب عليا في البداية وفي أخطاء وقعت فيها خلتني أحس ان من الصعب اتعلم الكروشيه ووقفت فترة لحد ما سبحان الله جارتنا كانت ناقلة جديد عندنا وتعرفنا عليها لاقيتها بتعرض عليا تعلمني الكروشيه من نفسها من غير ما اعرفها ان حاولت اتعلمه ومعرفتش ومكملتش حسيت ساعتها ان ربنا بيساعدني ان ارجع تاني للهواية اللي كان نفسي أتعلمها من زمان والمرة دي نجحت والحمدلله وبقيت كل فترة بتعلم حاجة جديدة مقدرش أقول اني اتعلمت كل حاجة عن الكروشيه ولا اقدر أحدد نسبة اللي تعلمته لكن الأهم عندي ان بقيت بحاول واجرب وانجح لحد ما احس بسهولة اللي بعمله واستمتع بيه والتجارب والممارسة دايماً بتعلم الإنسان وتطور من أدائه ، بعد كده ظهرت موضة الهير بيس بديل تاج العروسة بتكون قطعة من أسلاك النحاس الفضي أو الذهبي مع أنواع خرز مختلفة بيتم تشكيلها مع النحاس بتدي شكل جمالي في النهاية عند ارتدائها سواء على شعر العروسة أو على الطرحة إذا كانت محجبة حبيت أتعلم الحرفة دي وبدأت فعلاً وعملت أكثر من قطعة هسيب لكم فيديو ⬇️ لواحد من تصميماتي لأن في تصميمات نفذتها بس مصورتهاش فيديو لأن وقتها مكنتش بعمل فيديوهات على اليوتيوب وبعدها بدأت أتعلم صناعة الإكسسوارت بطرق مختلفة وحبيت الموضوع جداً بالنسبة لي لما اصمم قطعة واتخيل شكلها ولونها وابدأ انفذها بيعتريني احساس جميل جداً وانا بشوف القطعة اللي صممتها وتخيلتها متنفذة قدامي وبإيدي إحساس حلو جداً ان أكون شخص منتج بحس إني بنتج قطع فنية ليها روح بتعبر عني وعن ذوقي ، حالياً قررت أن أعمل مشروع صغير وأعرض منتجاتي اللي بصنعها علشان حابة ان الناس يعرفوا أكثر عن منتجاتي ويقتنوها حتى الرجال حابة ان لو حد حابب يشتري لأخته أو زوجته .... إلخ منتج صناعة يدوية ويكون مميز يكون مشروعي من أختياره للهدية اللي حابب يعبر فيها عن حبه وامتنانه للسيدة أو البنت اللي في حياته ⬇️ هسيب لكم فيديو فيه جزء من شغلي لمشروعي وكمان هضيف رابط الاكونت على انستجرام الخاص بمشروعي علشان لو حابين تتعرفوا وتشوفوا شغلي وتشجعوني بمتابعتكم ❤️

لينك المشروع على انستجرام

https://www.instagram.com/a.s_handmade26?exln=dHhsY3B3MnB5OXpu

فيديو عن جزء من شغلي والخامات اللي بستخدمها

صورة لأول هيربيس عملتها

هدايا مميزة / مشغولات يدوية / مشاريع صغيرة / هيربيس للعرائس
تهادوا تحابوا / هيربيس للعرائس / تيجان للأفراح / مناسبات / مستلزمات العروسة / أفراح / أعراس / كتب كتاب



حرفة يدوية / خيط وابرة / خامات الإكسسوارت/ طوق لشعر البنات

اكسسوارات نسائية/ مناسبات / أعراس / أفراح / خطوبة / أعياد ميلاد / حفلات تخرج




الخميس، 30 يوليو 2026

طريقة عمل الرقاق الطري خالي من الجلوتين

 


مأكولات خالية من الجلوتين/ الرقاق الطري / دقيق خالي من الجلوتين / طريقة سهلة للرقاق


المكونات والمقادير :- 

- 2 لبن بحرارة الغرفة .

- 1 كوب دقيق خالي من الجلوتين .

- ربع كوب نشا الذرة .

- ملعقة صغيرة سمنة أو زبدة .

- رشة من الملح .

حتى تكون المقادير مظبوطة اما نستخدم الأكواب المعيارية أو نستخدم نفس الكوب بنفس الحجم لجميع المكونات . 


الرقاق الطري / رقاق خالي من الجلوتين/ رقاق باللحمة / ساندوتشات بالرقاق الطري / صينية رقاق باللحم


طريقة التحضير :- 

في الخلاط الكهربائي نضع اللبن والدقيق وباقي المكونات ونبدأ في التشغيل ونتأكد من مزج المكونات جيداً ، يجب أن يكون قوام الخليط غير خفيف جداً ولا سميك يكون وسط ، بعد ذلك نقوم بتسخين طاسة على النار طاسة غير لاصقة نسخنها جيداً ثم نضع كمية صغيرة من الخليط ونوزعها بظهر ملعقة على الطاسة ونوزعها بشكل سريع قبل يتماسك الخليط ويصبح من الصعب توزيعه ، تكون النار متوسطة لكي لا يأخذ الرقاق لوناً غامقاً أو يحترق يجب أن نراقبه عندما نشعر بأن الأطراف أصبحت مستوية وسهلة التحريك نقوم بقلبه على الوجه الأخر ونتركه دقيق بسيطة ونرفعه من على النار ، وهكذا يكون جاهزاً سواء لوصفة صينية رقاق باللحم أو لعمل ساندوتشات ، إذا كان الغرض من الوصفة لعمل صينية رقاق باللحم فيجب أن يكون سمك الرقاق رفيع عند توزيعه على الطاسة ولا يسقى الرقاق بالمرق مثل الوصفة التقليدية فقط يضع كطبقات وبين كل طبقة رقاق نضع اللحم المفروم وعند أخر طبقة من الرقاق نسقيها بكمية بسيطة من المرق ( شوربة الدجاج أو اللحم حسب الرغبة ) . لمشاهدة طريقة تحضير الرقاق شاهدوا الفيديو ⬇️




الأربعاء، 29 يوليو 2026

خبز الذرة بدون تخمير ولا عجن ( خالي من الجلوتين )

 

خبز الذرة / عيش مصري / عيش الذرة / دقيق الذرة / دقيق ذرة خالي من الجلوتين/ خبز سهل وسريع / خبز بدون عجن وتخمير / دقيق الذرة الصفراء/ دقيق الذرة الأبيض / معجنات / مخبوزات

في رحلة البحث عن بدائل للمنتجات الغذائية التي تحتوي على الجلوتين بسبب إصابتي بالسيلياك ( مرض مناعي يجعل المناعة تهاجم الأمعاء عند تناول مأكولات تحتوي على الجلوتين ) من ضمن المأكولات الغذائية اللي كنت محتاجة أوجدلها بديل هي العيش ( الخبز ) في مصر متعودين على العيش البلدي اللي بالردة وبنحبه مع الأكلات المختلفة ومناسب سواء للفطار أو اكلات اللي فيها طبيخ ومع الفتة طبعاً حتى عندنا في البيت بنحب نستخدمه في الفتوش بدل خبز الريم الأبيض وكمان هو اقل ضرراً من الخبز الأبيض مثل الفينو والبريوش وغيره من المخبوزات حاولت أجرب وصفات لعمل العيش في البيت بالدقيق الخالي من الجلوتين وجربت أكثر من طريقة بس للأسف الموضوع منجحش معايا فقررت الاقي طريقة أسهل فلاقيت وصفة بدقيق الذرة عبارة عن خليط سائل وتستوي على طاسة على النار من دون عجن وتخمير وخبز  ، جربت نوعين دقيق الذرة الأبيض والأصفر بس اللي حبيته أكثر دقيق الذرة الأصفر لأن دقيق الذرة الأبيض خشن وكمان طعمه قوي أما دقيق الذرة الصفراء ناعم وطعم مقبول بالنسبة لي أكثر ، وكمان ميزة دقيق الذرة انه أرخص من أنواع الدقيق الأخرى الخالية من الجلوتين وكمان بلاقيه بسهولة في السوبرماركت القريبة مني على عكس الأنواع الأخرى بضطر أطلبها أونلاين وكمان جربت الدقيق مع المقالي زي بروستد الفراخ والكريسبي السمك المقلي   وبستخدمه لقلي البانيه بدل البقسماط والنتيجة بتكون جميلة خاصةً مع دقيق الذرة الصفراء طعم مقرمش ونكهته لذيذة ، بس لازم اشتري نوع يكون مكتوب عليه خالي من الجلوتين لأن في شركات بتعمل دقيق ذرة بس بيكون مطحون في مطاحن القمح فبالتالي بيكون في احتمالية تلوث دقيق الذرة بالجلوتين علشان كده بشتري نوع يكون مكتوب عليه خالي من الجلوتين ، قدرت أعمل من الدقيق خبز مناسب مع اكلات كتير وهو مناسب أكثر مع الأكلات الجافة أو الأكلات التي لا تحتوي على سوائل بنسبة كبيرة بس طبعاً مينفعش مع الفتوش والفتة المصرية بس في نوع خبز ثاني ( بريوش ) بعمله بدقيق خالي من الجلوتين وبقطعه مكعبات واقليه أو احمصه واضيفه لطبق سلطة الفتوش زي فكرة التوست في سلطة السيزر ، وبيبقى لذيذ ومناسب جداً مع الفتوش لينك خبز البريوش بالأسفل ⬇️

https://lolista93.blogspot.com/2026/07/blog-post.html

اما دلوقتي هشاركم طريق خبز الذرة السائل 

المكونات والمقادير:- 

- 50 جرام من دقيق الذرة الصفراء. 

- 5 جرام من السمسم .

- 5 جرام من بذور الكتان المطحونة .

- ماء لخلط المكونات بحرارة الغرفة .

- ملعقة صغيرة من زيت الزيتون أو زيت ذرة حسب المتوفر أو أي نوع زيت نباتي تفضلونه .

- رشة من الملح .

يمكنكم الاستغناء عن السمسم وبذور الكتان لكن وجودهم يعطي الخبز طعم أجمل وقيمة غذائية عالية .

طريقة التحضير تخلط المكونات الجافة ثم نضع الماء بالتدريج حتى يصبح الخليط خفيف وسائل ثم نضع الزيت ونمزج الخليط ، نسخن جيداً طاسة على النار لتسوية الخبز ويفضل استخدام طاسة غير لاصقة من أنواع التيفال أو الجرانيت اذا كانت الطاسة ساخنة قبل صب الخليط لن تحتاجوا لمسحها بالزيت ولن يلتصق الخليط ، ضعوا نصف كمية الخليط في الطاسة ويفضل أن يكون مقاس الطاسة وسط لا صغير كثيراً ولا كبير جداً كمية الخليط هذه تكفي لعمل رغيفان من عيش الذرة  ، اتركوا الخليط على النار حتى يستوي والأطراف تنفصل عن الطاسة يعني لا تحاولون رفعه وقلبه على الوجه الأخر حتى ترون الأطراف لم تعد ملتصقة بالطاسة وسهل رفعه دون معاناة لكي لا ينقطع منكم أو يتكسر يمكنكم تسوية الوجه الأخر من الرغيف بعد قلبه واضغطوا قليلاً في منتصف الرغيف اضغطوا جيداً حتى يستوي من المنتصف ولا يكون رطباً . يمكنكم مشاهدة الطريقة من خلال الفيديو ⬇️



تجربتي مع الدقيق الخالي من الجلوتين ( دقيق كريستال )



حساسية الجلوتين / دقيق خالي من الجلوتين / دقيق كريستال / فطائر / معجنات بحشوات مختلفة / حواوشي


بعد ماعرفت ان عندي سيلياك ( حساسية جلوتين ) بدأت أدور على دقيق خالي من الجلوتين أقدر أعمل منه خبز ومعجنات متنوعة علشان محرمش نفسي من الأكل اللي كنت بعمله من دقيق القمح وأقدر أكل الأكلات اللي بحبها من غير ما أذي جسمي ، من ضمن الأنواع اللي جربتها من الدقيق ( طحين ) جربت نوع دقيق من شركة كريستال وهي شركة مصرية متخصصة في عمل المنتجات الخالية من الجلوتين عندهم أنواع مختلفة من الدقيق وكل نوع مكتوب عليه استخداماته وكمان عندهم منتجات أخرى زي كورن فليكس خالي من الجلوتين وكريم شانتيه خميرة كاكاو خام وخليط للبسبوسة وخليط بان كيك وغيرها من المنتجات هي بس المشكلة ان منتجاتهم غير متوفرة في السوبر ماركت المنتشرة ، موجودة أونلاين وبعض المحلات اللي بتنتج مخبوزات وأطعمة خالية من الجلوتين وفي نفس الوقت بيبيعوا دقيق ومنتجات متنوعة خالية من الجلوتين بس مشكلة المحلات دي إنهم مش منتشرين فروعهم قليلة ، نوع الدقيق اللي جربته هو دقيق مخصص للمخبوزات الأوروبية زي كرواسون / الفينو / البريوش جربت أعمله بطريقة حلوة جداً بعد كذا محاولة قدرت أظبط الطريقة وعملت من نفس طريقة العجين كذا وصفة منهم البريوش وفطائر ومعجنات بحشوة الحواوشي ، هشارك معاكم الطريقة وعلى فكرة المقادير مكتوبة على عبوة الدقيق والطريقة كمان بس مع التجربة أكثر من مرة بيبقى في أخطاء وبتظهر مشاكل قدرت أحلها بالتجربة والمحاولة أكثر من مرة فالطريقة اللي هشاركها معاكم هي الخلاصة الناجحة للنوع ده من الدقيق . " تقدروا تشوفوا فيديو فيه الطريقة عملي في أسفل التدوينة ⬇️ " 

  


الاثنين، 15 يونيو 2026

تجربتي مع مجموعة من بودي سبلاش من ميلانو فارما

 


عطور / عطور للجسم / بودي سبلاش / body splash / برفان / عطور بالورود / زهور الياسمين / الفواكه الإستوائية


بقالي فترة بجرب أنواع بودي سبلاش مختلفة ، أنا بحب أستخدمهم على الملابس مش الجسم لأن سمعت كتير من دكاترة ان العطور مينفعش تترش مباشرة على الجسم لأنها بتأثر سلبا على الغدد والهرمونات علشان كده بحب ارشها على الملابس خاصة في البيت لأنها بتبقى أخف وأهدى من العطور ، في الموضوع ده حابة أشارك تجربتي مع بودي سبلاش من شركة مصرية اسمها ميلانو فارما جربت منهم روائح مختلفة من البودي سبلاش هكتب عنهم وعن أفضل روائح حبيتها وهشتريها تاني ، شركة ميلانو فارما مش بس بتعمل بودي سبلاش فقط لأ هما بيصنعوا منتجات كتير لأغلب مشاكل الجسم والبشرة وكمان عندهم منتجات مختلفة للشعر لكن أنا حاليا جربت البودي سبلاش .


عطور / بودي سبلاش / زهور الياسمين / ورود / عطر انثوي / ميلانو فارما

أول نوع جربته هو  wicked in secret

رائحته مزيج بين الورود خاصة ورود الياسمين مع لمسة مسكرة بيدي إحساس بالإنتعاش والنظافة ، رائحته حلوة جدا وكمان ثباته كبودي سبلاش يعتبر جيد أول ما ترشوه هتحسوا أنكم في قلب حديقة وحواليكم الزهور والياسمين وهتحسوا بمود حلو وإحساس رقيق ، حلو للناس اللي بتحب رائحة الورد والياسمين والكحول فيه بيبقى في البداية فقط بس بعد كده بيفضل رائحة العطر نفسه .


بعد تجربتي الأولى من ميلانو حبيت أجرب عطور أخرى من البودي سبلاش الخاص بيهم ، فجربت ثلاث روائح أخرى 

عطور / عطور للجسم / بودي سبلاش / body splash / برفان / عطور بالورود / زهور الياسمين / الفواكه الإستوائية

بودي سبلاش Folie 

بودي سبلاش صيفي بإمتياز رائحته مميزة جدا ومنعشة في نفس الوقت  وثباته هو الأقوى بين البودي سبلاش اللي جربتهم من ميلانو لحد دلوقتي  ، رائحته مزيج بين الفاكهة الاستوائية زي الأناناس والمانجو مع رائحة الورد عاملين مكس يجنن لايقين جدا أول ما شميت الرائحة حسيت اني بستخدم برفان مش مجرد بودي سبلاش ، التركيبة جمعت بين قوة الرائحة وجمالها بس مش القوة اللي تخنق وتدايق لا بالعكس بيدي إحساس جميل ومنعش ، ثباته متوسط .

Body splash / عطور منعشة للصيف / عطور مناسبة لليل / عطور مناسبة للشتاء


بودي سبلاش very sexy now

وصف العطر زي ما كاتبين على موقعهم انه برائحة الياسمين والورد ، بس مشكلته أن الرائحة خفيفة جدا مش حاسة برائحة الورد هو خفيف وحلو بس انا في رأي انه شبه العطور unisex مش عارفة ليه واصلي الإحساس ده بس ده اللي حسيته من رائحة العطر ثباته كمان مش قوي ، اللي بيدي إحساس الياسمين والورود فعلا هو wicked in secret من ميلانو .

عطور نسائية  جذابة / عطور مناسبة للبنات / عطور منعشة للنهار / عطور خفيفة / جذابة


بودي سبلاش love victory 

وصف العطر من على الموقع الخاص بشركة ميلانو فارما انه عبارة عن مزيج من الفواكه الإستوائية الصيفية وفي صورة للمنتج مع فواكه صيفية زي البطيخ والكرز والتوت الأحمر هو رائحته بناتي خفيفة وحلوة ريحة حاجة مسكرة مناسب للنهار بس ثباته ضعيف .


الأفضل فيهم كثبات :-

- Folie

- Wicked in secret 

- Very sexy now 

- Love victory 


 أفضلهم كرائحة بالنسبة لي :- 

- Folie مع أني بفضل في العطور والبودي سبلاش رائحة الورود أكثر من الفواكه بس بودي سبلاش Folie خلاني أحب المزيج ما بين الفواكه والورد بيدي إحساس حلو ومنعش فعلا تركيبة حلوة ولايقة مع بعض .

- Wicked in secret تاني أفضل رائحة عجبتني رائحة الياسمين واضحة فيه بشكل جميل وكمان بيدي إحساس بالنظافة كأنك خارجة من الشاور .   



الأربعاء، 25 فبراير 2026

تحويل الزبدة الى سمنة

 


استخدامات السمنة / سمنة بلدي / طريقة تسييح الزبدة وتحويلها الى سمنة / الدهون الصحية / الهرم الغذائي / سمنة الكعك / زبدة بقري / زبدة جاموسي


جسم الإنسان بيحتاج للدهون زي ما بيحتاج للكربوهيدرات والبروتين والفيتامينات والمعادن لأن كل حاجة منهم ليها فائدة وأهمية كبيرة للجسم بس طبعا مع الإعتدال في تناولها لإن كل شئ زاد عن حده بيتحول لضرر وبيسبب مشاكل للجسم فمحتاجين نستخدم العناصر الغذائية بإعتدال علشان نستفيد من وظيفتها وفوائدها الصحية لأجسامنا ، زمان كانوا بيخوفوا الناس من السمنة والزبدة الطبيعية وأنا هنا قصدي على الطبيعية المصنوعة من حليب الأبقار أو الجاموس من دون إضافة أي زيوت سواء كانت مهدرجة أو غير مهدرجة وكانوا بيقنعوا الناس أن الدهون الطبيعية دي بتسبب تصلب شرايين وأمراض القلب والسمنة والكلام ده عاري تماما من الصحة والحقيقة إن الإعتماد على الزيوت بشكل أكبر هو اللي بيسبب التهابات داخلية في الجسم وتصلب الشرايين وغيرها ، والدليل أن أجدادنا اتربوا وكبروا على تناول الزبدة والسمنة أكثر من الزيوت وكانت صحتهم أفضل وده لإن حياتهم كانت مليئة بالحركة والمهام اللي يقدروا يحرقوا فيها الدهون ومتتراكمش داخل الجسم بس طبعا لو حد منهم كان بيتناول دهون أكثر من إحتياج جسمه فبالتالي أكيد هتصيبه الأمراض اللي بتسببها زيادة الدهون في الجسم ، وبعد سنين طويلة من اللغط اللي كان حاصل بين الناس عن استخدام الزيوت ولا الزبدة والسمنة الطبيعية أخيرا منظمة الصحة والغذاء العالمية رجعت في كلامها عن الهرم الغذائي القديم واعترفت انه كان سبب لأمراض زي داء السكري والسمنة وغيرهم بسبب اعتماد الهرم على الكربوهيدرات والنشويات أكثر من البروتينات وكمان كلامهم عن الدهون الطبيعية اتغير وأصبح دلوقتي الاتجاه الأمثل في الغذاء أننا نعتمد على الزبدة والسمن الطبيعين .


 اتأكدوا عند شراء الزبدة من السوبرماركت أنها تكون مصنوعة من حليب طبيعي وخلوها من الزيوت حتى لو كانت غير مهدرجة ولو هتشتروها من سيدات بيقوموا بصناعتها بأنفسهم اشتروا كمية بسيطة في الأول تجربوها وتتأكدوا أنها مصنوعة بشكل جيد وتقدروا ساعتها تعتمدوها عند الطلب مرة أخرى .

علامات تبين اذا كانت الزبدة جيدة أم لا ، أولا لازم تكون نظيفة مفيش فيها شوائب يعني لونها لون الحليب المصنوعة منه لو حليب جاموس فهي هتكون بيضاء لو حليب بقري هتبقى صفراء ميكونش عليها شوائب سواء قش أو غيره لأن ده دليل على عدم نظافة المكان اللي بتتصنع فيه ، كمان عند تذويبها على النار بيكون ليها رائحة غير مقبولة وقوية ده بيكون سببه ناتج عن أن البقرة أو الجاموسةأكلهم غير جيد وضعيف وده بينعكس على طعم ورائحة اللبن والزبدة ، كمان من العلامات المهمة أن الزبدة جيدة أنها عند ذوبانها متفقدش كتير من وزنها يعني لو ذوبنا كيلو زبدة ينقص منها ربع الكمية او ثلثه فقط أكثر من كده فهو معناه أن الزبدة مصنوعة بغير احترافية ونسبة السوائل فيها عالية وممكن تكون بتحتوي على الماء مش لبن (حليب ) فقط  .

طريقة تحويل الزبدة إلى سمنة تجدوها في الفيديو شرح صوت وصورة ⬇            


الثلاثاء، 27 يناير 2026

زيارة أكبر متحف في العالم

 


المتحف المصري الكبير / المتحف المصري الجديد / الحضارة المصرية القديمة / الحضارة الفرعونية / المصريين القدماء / كنوز توت عنخ أمون / رمسيس الثاني المسلة المعلقة


 زيارتي لأكبر متحف بالعالم بيضم حضارة واحدة من أعظم حضارات العالم

( الحضارة المصرية القديمة ) إحساس كبير بالفخر أن في بلدي متاحف بتضم حضارتنا وتاريخنا وثقافتنا وتراثنا المصري ، مش محتاجين نسرق أثار أو نعمل متاحف بتتكلم عن حضارات أخرى لا تنتسب للبلد اللي بتضم المتحف نفسه لأنهم مش أصحابه لكننا كمصريين أصحاب حضارة وتاريخ عظيم العالم كله بيتمنى يزور بلدنا ويشوف ويسمع ويتعلم من حضارتنا ، حتى إحساس الفخر ده السائحين بيحسوا بيه وبيكونوا سعداء جدا وهما واقفين أمام أثارنا وبيسمعوا قصص أصحابها أصحاب الحضارة المصرية ، وده اللي أنا شوفته ولاحظته لما زرت المتحف المصري الكبير متحف جميل جدا كتصميم وتنفيذ المبنى بشكل يليق بحضارتنا وأثارنا العريقة كانت تجربة مميزة جدا ورائعة وإحساس الفخر زاد من أول وصولي ووقوفي عند بوابات دخول المتحف وشوفت الزحام اللي موجود في توابير لناس من مختلف أنحاء العالم وبسمع أكثر من لغة لدول وجنسيات مختلفة جمعهم حب الحضارة المصرية وجمعهم المتحف علشان يشبع حبهم وشغفهم بالحضارة المصرية ، المتحف مناسب لزيارة جميع أفراد الأسرة كبار وصغار شباب / مسنين أو ذوي الإحتياجات الخاصة لأن تصميم المتحف وبنائه بيراعي جميع الأعمار والإحتياجات مكان منظم / نظيف وفسحة ثقافية ممتعة وذكريات لا تنسى لما تزوروا المتحف وتقضوا يوم فيه مع أحبابكم من الأسرة أو الأصدقاء ، المتحف لا تكفيه زيارة واحدة هو محتاج أكثر من زيارة علشان تقدروا تستمتعوا وتتعرفوا على كل الأثار اللي في المتحف علشان كده لو انتوا مش مقيمين في مصر ومش هتقدروا تزوروا المتحف غير مرة واحدة فالأفضل أنكم تذهبوا للمتحف من الصبح بدري علشان تقضوا فيه أكبر وقت ممكن وتستمتعوا بيه براحتكم وتشوفوا أغلب الأثار في قاعات المتحف على قد ما تقدروا ، والمتحف بيه منطقة مخصصة للمطاعم والكافيهات وكمان حنفيات مياه مفلترة في أماكن كثيرة ومختلفة في المتحف علشان تملوا زجاجات المياه اللي معاكم وتشربوا براحتكم كمان دورات المياه نظيفة ومرتبة حتى في أوقات الزحام .

      

معلومات عن المتحف 

تبلغ مساحة المتحف 490 ألف متر مربع ، ويضم عدد من قاعات العرض والتي تعتبر الواحدة منها أكبر من العديد من المتاحف الحالية بمصر والعالم ، ويعد المتحف أحد أهم إنجازات مصر الحديثة ، يحتوي المتحف على أكثر من 750 ألف قطعة أثرية ، فهو يغطي الحقبة من 700 ألف سنة قبل الميلاد حتى سنة 349 ميلادية .

المدخل الرئيسي 

تبلغ مساحة المدخل الرئيسي حوالي 7 ألاف متر مربع ويتوسطه تمثال الملك رمسيس الثاني ، تمثال من الجرانيت الوردي طوله 11.3 متر ووزنه 83 طن .

المسلة المعلقة 

هي مسلة الملك رمسيس الثاني مصنوعة من الجرانيت الوردي وزنها 110 طن واكتشفت في منطقة صان الحجر بمحافظة الشرقية وتحمل خرطوش الملك رمسيس الثاني المنقوش أسفل المسلة .

الدرج العظيم 

تصطف على جانبيه تماثيل شامخة لملوك مصر ، بارتفاع يصل إلى 6 طوابق في مشهد مهيب يجسد فخامة التصميم وضخامة البناء .

قاعة الملك توت عنخ أمون 

على مساحة حوالي 7.5 الف متر مربع وتضم أكثر من 5 ألاف قطعة من كنوز الملك مجتمعة لأول مرة .


مقتنيات الملك توت عنخ آمون / اخناتون / قاعات عرض المتحف المصري الكبير / قاعة المدن الغارقة / العصر الروماني في مصر / العصر اليوناني في مصر



قاعات العرض 

يحتوي المتحف على 12 قاعة عرض رئيسية على مساحة حوالي 18 ألف متر مربع ، يضم المتحف بين جنباته أماكن خاصة بالأنشطة الثقافية والفعاليات مثل متحف الطفل على مساحة حوالي 5000 متر مربع ومركز تعليمي وسينما ومركز للمؤتمرات ، وكذلك العديد من المناطق التجارية والتي تشمل محال تجارية كافيتريات ومطاعم بالإضافة إلى الحدائق .   


تقدروا تشوفوا المتحف ومقتنياته من خلال

فيديوهات اليوتيوب ⬇




 



هواية وحرفة

  من وقت ما كنت طفلة وانا بنجذب جداً للشغل اليدوي وكنت دايماً بفكر ازاي البنت أو الست اللي ماسكة الإبرة وبتطرز أو بتحيك كروشيه أو بتفصل ملاب...