طريقة عمل البسبوسة بجوز الهند + طريقة عمل قطر البسبوسة

 

بسبوسة بجوز الهند

البسبوسة من الحلويات اللذيذة جداً وفي إجماع كبير من الناس على حبها وليها طرق مختلفة ومتعددة في موضوع النهاردة حبيت أقدمها بطريقة بسيطة وسهلة ومن غير   متاخد وقت كبير ، أتمنى تجربوا الوصفة وتنال إعجابكم .

 المقادير :-

- 2 كوب سميد ناعم سادة .

- 1 كوب جوز هند مبشور ناعم .

- نصف كوب سكر أبيض .

- معلقة كبيرة بيكنج بودر . 

- كوب إلا ربع سمنة أو زبدة سائلة .

- علبة واحدة صغيرة من الزبادي ( الروب ) .

- كوب الا ربع من الحليب بدرجة حرارة الغرفة .

- لوز مقشر للتزيين .

 مقادير قطر ( شربات ) السكر للبسبوسة :-

- 2 كوب من السكر الأبيض .

- 2 كوب من الماء .

- حوالي 4 جرام من الفانيليا .

( لازم نستخدم نفس الكوب في قياس كل المقادير يعني الكوب يكون بنفس الحجم علشان المقادير تطلع مظبوطة )

طريقة تحضير البسبوسة :-

هنخلط دقيق السميد مع جوز الهند والسكر والبيكنج بودر في البداية ونقلبهم كويس بعد كده هنضيف السمنة أو الزبدة المذابة على النار بس متكنش سخنة تكون دافئة ونقلب المكونات بعد كده هنضيف الزبادي ونصف كمية الحليب ونقلبهم مع بعض لحد ما الخليط يتشرب كمية الحليب والزبادي ويصبح ناعم وطري ومتماسك يعني لو أخذنا كمية وشكلناها تكون متماسكة ومتفتفتش لو حاسين انها محتاجة شوية سائل كمان علشان تكون متماسكة أكثر ممكن تضيفوا باقي كمية الحليب أو جزء منها على حسب إحتياج الخليط هنعجن المكونات كلها مع بعض كويس لحد ما الخليط يصبح متماسك المهم منعجنش فيها كتير مجرد ما توصل للتماسك المطلوب نوقف عجن بعد كده في صينية الخبز هندهنها كويس بالزبدة أو السمنة في جميع الأطراف والجهات وعلى أطراف الصينية بعد كده هنضيف خليط البسبوسة للصينية ونبدأ نفرد الخليط على الصينية كلها بايدنا أو معلقة مسطحة المهم يتوزع ويتفرد على كامل الصينية بالتساوي لو هنفرد بايدنا فممكن نبلها بشوية ماء علشان نعرف نفرد الخليط كويس من غير ما الايد تطبع على الخليط وممكن نهز الصينية شوية علشان نتأكد ان الخليط متساوي ومتوزع كويس وبعد كده نبدأ نقطعها بالسكينة قبل ما تدخل الفرن علشان أول ماتخرج نسقيها بالشربات على طول ويدخل وسط قطع البسبوسة ونزينها باللوز زي منحب و  ممكن نخليها ترتاح في الصينية شوية حوالي 10 دقايق علشان السميد يطرى أكثر وينعم وممكن تدخلوها الفرن على طول لو مستعجلين وتخلوها في نصف الفرن على درجة حرارة 180 – 200 حسب حجم الفرن وهنشغل الفرن من تحت لو أحمر من تحت هيبان على الأطراف هتبدأ تحمر في الوقت ده لو محمرتش من فوق تقدروا تشغلوا عليها الشواية من فوق على درجة حرارة متوسطة  وتخلوا بالكم لحد ما تحمر بعد ماتخرج من الفرن لازم نسقيها بشربات السكر ويكون سخن لازم البسبوسة والشربات يكونوا سخنين ونوزع الشربات على كل القطع بالتساوي وممكن نميل الصينية في كل الإتجاهات علشان الشربات يتسرب للأسفل ويوصل لكل القطع . 

 طريقة تحضير الشربات :-

هنضيف الماء والسكر في كسرولة على النار ونقلبهم كويس في البداية لحد مايبدأ يسخن و بعد كده هنعلي النار لحد ما الماء يبدأ يغلي بعد كده هنهدي النار ونضيف الفانيليا ونسيب السكر يذوب براحته الشربات بيكون جاهز لما نلاقي السكر ذاب تماما والقوام بدأ يتقل شوية كده يكون الشربات جاهز معانا .

ودلوقتي تقدروا تاكلوا احلى بسبوسة طريقة وخفيفة وسكرها معقول مناسب للجميع ، وبألف هنا .

فيديو لوصفة البسبوسة بجوز الهند ⬇

حمص الشام ( الحلبسة ) بأسهل وأسرع طريقة وطعم رائع

 حمص الشام وفوائده

 

حمص الشام ( الحلبسة ) من ألذ المشروبات الساخنة في الشتاء مش بس بتدفي الجسم لأ كمان بتمده بالطاقة وقيمة غذائية عالية الحمص لوحده فوائده متعددة من أهمها انه بيحتوي على عناصر غذائية متنوعة أهمها البروتين والفيتامينات والمعادن المهمة لصحة الجسم والمنظمة لحركة الجهاز الهضمي، والتي تعمل على تقوية جهاز المناعة ، الحمص من أبرز أنواع البقوليات الغنية بالبروتين النباتي الذي يساعد على تجديد أنسجة الجسم وبناء العضلات والعظام والغضاريف، كما أنه غني بالألياف الغذائية القابلة للذوبان التي تعطي شعورًا بالشبع وتحافظ على مستوى السكر في الدم فضلًا عن أنه بيحسن الهضم والامتصاص الحمص أيضًا بيحتوي على النشويات المعقدة وبتأخذ وقت طويل في الامتصاص وبالتالي بتستهلك من الجسم الطاقة اللازمة لتدفئته، فضلًا عن غناه بالحديد والكالسيوم، كما يساعد في خفض مستوى الكوليسترول الضار في الجسم، وبالتالي يحمي من زيادة الوزن وبيحافظ على صحة القلب والشرايين، إلى جانب غناه بمضادات الأكسدة كل الفوائد دي بتزيد أكتر مع الاضافات اللي بنضفها لحمص الشام ( الحلبسة ) زي الثوم والطماطم ، الشطة ، الليمون كل ده بيخلي لحمص الشام مش بس نكهة خاصة ولذيذة لأوكمان قيمة غذائية عالية تخليه الخيارالأفضل لمشروبات الشتاء الساخنة.

المكونات والمقادير :-

-ربع كيلو من الحمص .

 - بصلة واحدة متوسطة الحجم .

- حبة واحدة من الطماطم متوسطة .

- معلقة كبيرة من الثوم المفروم .

- نصف معلقة كبيرة من البابريكا .

- نصف معلقة كبيرة من الكمون .

 -ملح .

- شطة بودر أو صوص الشطة الجاهز حسب الرغبة .

- ليمون .

طريقة التحضير :-

قبل منبدأ في تسوية الحمص لازم نكون ناقعين الحمص قبلها بليلة كاملة علشان يسرع في عملية التسوية وبعد فترة النقع بنصفيه ونبدأ نضيف ليه مياه جديدة علشان التسوية هنحط الحمص ويكون مغمور بالماء وطبعاً الماء حسب عدد الأشخاص ولو الماء كميته قلت ولسه الحمص مستواش نقدر نزيده بمياه مغلية ، هنسيب الحمص يغلي على النار لحد مايبدأ يظهر الريم أو الرغوة البيضاء اللي بتظهر عادةً مع البقوليات لإحتوائها على البروتين النباتي لما تظهر الرغوة دي لازم نشيلها بالمعلقة وبعد كده نضيف المكونات الباقية هنضيف البصلة تكون متقشرة فقط من غير تقطيع ونضيف معاها حبة الطماطم وكمان تكون متقشرة بدون تقطيع ونضيف البابريكا وربع معلقة كبيرة من الكمون وممكن تضيفوا الشطة البودر لو كل اللي هيشرب بيحبها نضيف المكونات دي ونسيب الحمص يستوي على النار هنضيف الثوم والملح وباقي كمية الكمون الربع معلقة لما يكون باقي على تسوية الحمص حوالي 10 دقائق لأن ده بيضيف ليه مذاق أحلى وأجمل ، بعد ما يكتمل تسوية الحمص بيكون جاهز للتقديم تقدروا تقدموا معاه ليمون مقطع علشان يتعصر على الأكواب حسب الرغبة كمان ممكن تقدموا معاه زجاجة صوص الشطة الجاهزة علشان كل واحد هيشرب يضيف من الشطة الكمية المناسبة ليه ، وبكده تكون اكتملت وصفتنا أتمنى تجربوها وتنال إعجابكم .

                                   وبألف هنا .

     هتلاقوا طريقة حمص الشام ( الحلبسة ) في الفيديو التالي ⬇

طريقة عمل الكشري المصري بالدقة والصلصلة وسر الطعم اللذيذ للكشري

 

طريقة الكشري المصري

الكشري من الأكلات الشعبية المصرية اللذيذة وبتتعمل بطرق مختلفة في دول تانية كتير النهارده هقدم الكشري بطريقة أقرب لطريقة المطاعم علشان تديكوا طعم الكشري الخطير ، أتمنى الطريقة تنال إعجابكم .

الوصفة دي تكفي 7 أفراد 

 

في البداية هنحتاج ربع كيلو عدس أسمر منقوع لمدة 3 ساعات و ربع كيلو حمص يكون منقوع ليلة كاملة وطبعاً العدس والحمص يكونوا مغسولين كويس قبل عملية النقع ، البقوليات كل ما تنقع في الماء كل ما بتتخلص من الغازات الموجودة فيها اللي بتسبب نفخة للمعدة عند الأكل .

طريقة عمل البصل المحمر والأرز والمكرونة

المقادير :-

 -هنحتاج كيلو إلا ربع أرز مصري

- 600 جرام مكرونة مخلطة ( إسباجتي + مكرونة خواتم )

أنا إستخدمت نوع مكرونة مع الإسباجتي حجمها كان كبير شوية بس المكرونة الصغيرة بتبقى احلى

-7- 9 حبات كبار من البصل الأحمر

- زيت ذرة + زبدة

 -2 مكعب مرق دجاج

 -العدس المنقوع

- ملح الكمية حسب الرغبة

- فلفل أسود وكمون

- ماء مغلي لسلق المكرونة + ماء مغلي لتسوية الأرز

 

طريقة التحضير :-

في البداية هنحتاج نحمر البصل ممكن نقطع البصل على إيدينا لشرائح رفيعة وتكون 

طويلة أو ممكن نعمل الخطوة دي في محضرة الطعام لو موجود فيها السلاح الخاص 

بعمل الشرائح للخضار بعد ما نقطع كمية البصل اللي محتاجنها هنسخن زيت الذرة على 

النار ولازم يكون الزيت سخن وغزير علشان الزيت لو بارد البصل هيشرب الزيت 

وهيبقى طري ويفضل انكم متحمروش كمية البصل كلها مره واحدة يعني يفضل تقسموا 

كمية البصل وتحمروا كل جزء لوحده دي بيديه نتيجة أفضل ولازم نصفي البصل كويس 

من الزيت واحنا بنرفعه من الزيت ونحطه في صينية واسعة وتكون مفروشة بمناديل 

المطبخ علشان نصفي عليها البصل مهم اننا نوزع البصل في الصينية ويكون متفرق عن 

بعضه علشان يفضل ناشف وكمان مينفعش نغطي البصل بعد التحمير وهو لسه سخن 

لأن التغطية هتخليه طري علشان يبقى مقرمش لازم نسيبه مكشوف لحد مايبرد ، لسلق 

المكرونة هنغلي ماء على النار ونضيف شوية زيت وملح وبعد الماء ما يغلي هنضيف 

المكرونة ويفضل هنا إنكم تكسروا الإسباجتي لنصفين علشان متبقاش طويلة زيادة عن 

اللزوم بعد مايتم سلق المكرونة هنصفيها وفي حلة على النار هنضيف شوية زيت و3 

مكعبات زبدة ومكعب مرق دجاج ونتأكد من ان مكعب المرق ذاب كويس بعد كده 

نضيف المكرونة المسلوقة ونضيف الحمص بعد مانكون سلقناه وكمان نضيف البهار 

نصف معلقة صغيرة فلفل أسود ونصف معلقة صغيرة كمون ونقلب المكونات دي كلها 

مع بعض كويس ونسيب المكرونة على نار هادئة لحد ماتسخن ، بعد ماحمرنا البصل 

هناخد شوية من الزيت علشان نسوي بيه الأرز زيت البصل بيدي نكهة حلوة جداً للأرز 

ودي الخطوة اللي بيعملوها في المطاعم علشان تدي طعم مميز للأرز ونضيف مع 

الزيت 2 مكعب زبدة و مكعب مرق دجاج بعد كده نضيف كمية الأرز والعدس بعد ما 

نصفيه من ماء النقع ونبدأ نقلب الأرز من فترة للتانية لحد مانحس ان الأرز والعدس 

نشف من الماء اللي فيه بعد كده هنضيف الملح ونصف معلقة صغيرة فلفل أسود وكمون 

ونبدأ نزيد الأرز بالماء المغلي ونقلب المكونات كويس مع بعض ونسيب الماء اللي

ضفناه يغلي كويس وبعد كده نهدي النار ونغطي الأرز ونسيبه يستوي ، لما يتشرب الماء 

ممكن نختبر التسوية بتاعت الأرز ونقلبه بشوكة مش بمعلقة علشان ميعجنش ومنقلبش 

كتير هي مره بس علشان نتأكد إنه شرب الماء وبدأ يستوي .

مقادير وطريقة سلق الحمص وعمل دقة الخل وصوص الطماطم

المكونات والمقادير :-

- ماء لسلق الحمص

- بصلة صغيرة غير مقطعة

- ملح / فلفل أسود / كمون

- ثوم مفروم

 -خل أبيض

- حوالي نصف كيلو طماطم معصورة

-2 معلقة كبيرة صلصة طماطم

-معلقة صغيرة هريسة والهريسة بتكون حارة فممكن تزيدوا الكمية حسب الرغبة ولو الهريسة مش متوفرة ممكن تضيفوا بودرة شطة بس الكمية تكون أقل علشان متحرقش زيادة عن اللزوم

- معلقة كبيرة سكر

- زيت ذرة

   الهريسة ممكن تتعمل بسهولة في البيت وده اللينك اللي فيه الطريقة     

     https://lolista93.blogspot.com/2020/09/blog-post_20.html        

طريقة التحضير :-

لعمل صوص الطماطم هنحتاج لعصير طماطم ونضيف عليه السكر وده علشان يقلل من 

الحموضة اللي بتسببها الطماطم وكمان نضيف الصلصة والهريسة وربع معلقة صغيرة 

فلفل أسود ونصف معلقة صغيرة كمون وملح الكمية حسب الرغبة ، في حلة على النار 

هنضيف الزيت ومعلقتين كبار من الثوم المفروم هنقلب الثوم في الزيت كويس لحد ما 

يبدأ يحمر يعني يكون لونه ذهبي منغير ما يغمق بعدها هنضيف للثوم معلقتين كبار من 

الخل ونضيف عصير الطماطم بكل المكونات اللي ضفناها ليه ونقلب المكونات مع بعض 

كويس ونسيب الطماطم تغلي على النار بعد الغليان هنهدي النار ونسبها تتسبك براحتها 

يعني يبدأ عصير الطماطم ينشف من الماء اللي فيه ويتقل وتحسوا إن الزيت ظاهر على 

السطح كده يكون صوص الطماطم أصبح جاهز ، لسلق الحمص هنحتاج حلة ( وعاء 

الطهي ) ونضيف فيه كمية مناسبة من الماء ونضيف كمية الحمص بعد ما نصفيه من

ماء النقع ونسيب الحمص  يغلي على النارلما هيغلي هيبدأ يظهر الريم اللي هو رغوة 

بيضاء الرغوة دي اللي بتظهر في البداية لازم نشلها علشان دي بتسبب الغازات وبتخلي 

الحمص يكون صعب على المعدة هضمه وكمان بيتعب القاولون بعد ما نشيل الريم ده 

هنضيف البصلة المقشرة منغير ما نقطعها ونضيف ربع معلقة صغيرة من الفلفل الأسود 

ومعلقة صغيرة من الكمون ونسيبه على النار لحد مايستوي بعد كده هنصفي الحمص 

ونضيفه الى المكرونة بعد ما تتسلق وماء الحمص هنعمل منها دقة الخل والثوم في وعاء 

أوطبق عميق هنضيف معلقة كبيرة من الثوم المفروم و3 معالق خل أبيض و نصف 

معلقة صغيرة كمون ونقلب المكونات دي مع بعضها كويس جداً ، وكده يكون الكشري 

أصبح جاهز للتقديم عند التقديم ممكن تضيفوا الأرز بالعدس الأول في الأطباق وبعدين 

تضيفوا عليه المكرونة بالحمص وممكن تزينوا الأطباق بالبصل وصلصة الطماطم حسب 

الرغبة أو تقدموا البصل لوحده والصوص والدقة ممكن تقدموها في زجاجات زي 

المحلات .

الطريقة هتلاقوها واضحة أكتر في الفيديو التالي

وبألف هنا ...

 

وحدة كروشيه تنفع كوستر+فكرة مختلفة لتزيين المنزل بالكروشيه +طريقة عمل الدائرة السحرية

 زينة تنفع لمناسبات مختلفة زي رأس السنة وغيرها من المناسبات

موضوع النهاردة هيكون عن طريقة عمل الدائرة السحرية في الكروشيه بكل سهولة وكمان طريقة عمل وحدة كروشيه على شكل نجمة تنفع في استخدامات متعددة حبيت أقدمها بطريقة مختلفة فعملت منها زينة مناسبة للشتاء بما إننا كمان داخلين على سنة جديدة 2021 يارب تكون سنة سعيدة ومليئة بالنجاح وتحقيق كل الأمنيات للجميع يارب ، كمان عملت منها كوستر للأكواب أتمنى إنها تعجبكم .

الأدوات المستخدمة :-

- خيط كروشيه إليزا ديفا .

( أنا هنا استخدمت 4 ألوان مختلفة من درجات الكشمير والبنفسجي )

 صورة لألوان الخيط اللي استخدمته .

- ابرة كروشيه مقاس 3 mm .

- ابرة لتنظيف الخيط الزائد ومقص .

- دبابيس زي اللي في الصورة .

( الدبابيس علشان نقدر نثبت الزينة في الزوايا الخشبية اللي بتكون على الحائط )

غرز الكروشيه المستخدمة :-

- غرزة السلسلة .

- غرزة الفيشارة أو بوب كورن .

- غرزة عمود بلفة .

- غرزة المروحة .

- غرزة حشو .

- الغرزة المنزلقة .

طريقة عمل الوحدة وتعلم الدائرة السحرية هتلاقوها بالتفصيل في الفيديو التالي .

مشاهدة طيبة 

طريقة عمل الطعمية ( الفلافل ) بالفول والحمص طريقة هشة ولذيذة

 الطعمية بطعمها المميز 

الطعمية / الفلافل من الأكلات الشعبية في الوطن العربي وعليها إجماع كبير في حبها وتعتبر من الأكلات المميزة لوجبة الفطار والعشاء أيضاً حبيت أشارك طريقتها الجميلة والمضمونة بدون ماتفك في القلي وبطعم رائع ، أتمنى تجربوها وتنال إعجابكم .

المقادير والمكونات :-

- 1 كيلو من الفول المجروش .

- نصف كيلو حمص وممكن الحمص يبقى بنفس كمية الفول حسب    الرغبة .

- ربطتين من البقدونس / الكزبرة الخضراء / شبت / كرات لو مش    متوفر ممكن تستخدموا عيدان البصل الأخضر .

  ( لو حابين الخضرة تكون اقل تقدروا تكتفوا بربطة واحدة من كل     نوع ذكرته )

- 10 فصوص ثوم كبار .

- حوالي نصف كيلو بصل مقطع مكعبات صغيرة .

- كمية الملح حسب الرغبة .

- نصف ملعقة طعام من الفلفل الأسود / كمون / بابريكا  

 وممكن تستخدموا بهار الطعمية بيكون جاهزمن عند العطار.

المكونات المستخدمة مع الطعمية قبل القلي مباشرةً :-

- بيضة واحدة وممكن تستغنوا عنها لو مش حابين بس البيضة دي    بتخليها هشة ومتماسكة .

- ربع معلقة صغيرة كورباناتو ( بيكوربونات الصوديو ).

- رشة من الفلفل الأسود و الكمون .

- معلقة صغيرة كزبرة بودر لو مش حاطين كزبرة خضراء في       العجينة .

- سمسم للتزين .

طريقة عمل عجينة الطعمية :-

في البداية لازم بعد مانغسل الفول والحمص كويس بنخلطهم و ننقعهم في مياه عادية لمدة 12 ساعة تقريباً علشان تتفرم بشكل أفضل وبتدي نتيجة أحسن بس لازم نبدل مياه النقع مرتين خلال 12 ساعة ونبدلها مرة اخيرة قبل الفرم علشان مياه النقع بيبقى فيها رغوة كده من تفاعل الفول والحمص ودي اللي بتسبب النفخة للمعدة علشان كده البقوليات عامةً لازم تتنقع قبل استخدامها وكمان نغير مياه النقع كل فترة بعد انتهاء مدة النقع بنصفيهم كويس وبعد كده بنضيف ليهم الكرات والخضرة المقطعة  والثوم والبصل ونخلطهم كويس مع الفول والحمص وبعد كده في المفرمة الخاصة باللحم ممكن تفرموا عجينة الطعمية فيها هي بيبقا ليها قطعتين قطعة للفرم الخشن وقطعة للفرم الناعم الأفضل اننا نستخدم القطعة الخشنة الأول وبعدين القطعة الناعمة لو حابيين العجينة تكون مش ناعمة قوي علشان بعد القلي يبقى فيها اجزاء خشنة ومقرمشة أكتر ممكن متنعموش كل كمية العجينة يعني تنعموا جزء كبير منها والباقي تخلوه خشن ، التنعيم ده بنعمله علشان العجينة تكون متماسكة ومتفكش في القلي لو المفرمة مش موجودة عندكم تقدروا تستخدموا الكبة / محضرة الطعام في فرم العجينة بس هتحتاجوا تضيفوا شوية مياه مع المكونات علشان تسهل عملية الفرم بعد ما نخلص مرحلة الفرم هنضيف البهار للعجينة ونقلبهم كويس مع بعض كده العجينة تكون جاهزة للإستخدام المباشر أو التفريز ممكن تحفظوها في الفريزر لمدة 3-4 شهور في الأكياس الخاصة بالطعام أو علب حفظ الطعام .

طريقة قلي الطعمية :-

قبل القلي مباشرةً لازم نضيف الكورباناتو علشان لو إتساب فترة العجينة هتسمر ، بنضيف البيضة ونخفقها كويس مع العجينة ونضيف رشة من الفلفل الأسود والكمون وممكن نزود كزبرة بودر حسب الرغبة وبعد مانقلب المكونات كويس نبدأ نسخن الزيت في طاسة القلي ولازم يوصل لدرجة الغليان ثم نبدأ نكور العجينة بالإيد أو نستخدم آلة الطعمية هتشوفوها في الفيديو التالي ونضيف السمسم على الطعمية اللي شكلناها وننزلها في الزيت بس نهدي النار واحنا بنزل الطعمية علشان متفكش وبعد ما نملى الطاسة نرجع نعلي النار عليها ومنحطش الطعمية في الزيت على الجهة اللي فيها السمسم علشان ميقعش منها بنحطها في الأول على الجهة اللي من غير سمسم والطريقة هتكون أوضح في الفيديو مشاهدة طيبة .

وبألف هنا ... 

باليرينا ( لكلوك ) لجميع المقاسات + جدول جميع مقاسات القدم

 

باليرينا كروشيه تنفع للأطفال والكبار 

في الشتاء بنبحث دائماً عن تدفئة الجسم خاصةً أكثر أجزاء بتبرد في جسمنا زي الكفوف والقدم بنبقى محتاجين ندفيهم بأي طريقة علشان نقدر نتعايش مع برودة الجو ، علشان كده محبي الكروشيه دايماً بيستنوا الشتاء علشان يعملوا الحاجات الجميلة زي الجوانتي والشرابات أو اللكلوك بخيوط الكروشيه المتنوعة بتمد الجسم بالدفء وكمان بيكون شكلها جميل ورائع وبنستمتع بشغلها وبنعملها بحب لينا ولأفراد عائلتنا ، في الموضوع ده حبيت أشارك معاكم طريقة عمل الكلوك أو باليرينا من الكروشيه وكمان هعرفكم ازاي تعملوها لكل مقاسات القدم المختلفة وازاي نحسب عدد السلاسل لبدء الشغل ، أتمنى الموضوع يعجبكم وتستفيدوا منه .

الأدوات المستخدمة:- 

- إبرة كروشيه مقاس 4mm .

- كرة فرو أو كرة بوم بوم / ابرة خياطة عادية وخيط لتثبيت الكرة .

- متر لقياس عدد سلاسل البداية .

- مقص وإبرة تنظيف .

- دبوس خاص بالكروشيه .

- خيط مخمل .

صورة للخيط اللي استخدمته 

الغرز المستخدمة :- 

- غرزة السلسلة .

- غرزة الحشو .

- غرزة نصف عمود .

- غرزة عمود بلفة .

- غرزة المنزلقة .

- تناقص بغرزة عمود بلفة .

- تناقص بغرزة الحشو . 

في البداية هنحتاج نعرف مقاس القدم اللي هنعملها الباليرينا أو أي منتج للقدم ، في الجدول التالي هتلاقوا كل المقاسات للأطفال والكبار 

بعد ما تختاروا المقاس اللي هتشتغلوا عليه دلوقتي لازم نعرف إزاي نحسب عدد السلاسل اللي هنبدأ بيها في البداية هنشوف مقاس طول القدم ونطرحه من مقاس عرض القدم والناتج هنعمل على أساسه عدد سلاسل البداية بحيث ناتج عدد السلاسل دي تساوي ناتج طرح الطول من العرض بالسنتيمتر 

مثال :- 

لو اخترنا مقاس 38 فالمقاس ده طول القدم فيه 24 سم والعرض 9.5 سم الحساب هيكون كالأتي : هنطرح الطول من العرض

 24 – 9.5 = 14.5 سم يبقى هنحتاج عدد سلاسل = 14.5 سم يعني هنستخدم الخيط والابرة ونبدأ نعمل سلاسل البداية ونقيس السلاسل دي بالمتر ونشوف اذا وصلت 14.5 سم ولالأ وطبعاً الموضوع ممكن يختلف من خيط للثاني حسب مقاس الخيط ومقاس الإبرة يعني ممكن نوع خيط يدينا 18 غرزة سلسلة = 14.5 سم بينما خيط وإبرة بمقاس تاني يدونا 14 غرزة سلسلة وهكذا ...

يفضل اننا واحنا بنختار المقاس نختار مقاس القدم يكون اكبر بدرجة عن المقاس الحقيقي يعني لو مقاسي 39 في الأحذية هختار اشتغل على مقاس 40 علشان الخيط بيفرق عن الأحذية .

الطريقة هتلاقوها بشكل أوضح في الفيديو التالي مشاهدة طيبة