حمص الشام ( الحلبسة ) بأسهل وأسرع طريقة وطعم رائع

 حمص الشام وفوائده

 

حمص الشام ( الحلبسة ) من ألذ المشروبات الساخنة في الشتاء مش بس بتدفي الجسم لأ كمان بتمده بالطاقة وقيمة غذائية عالية الحمص لوحده فوائده متعددة من أهمها انه بيحتوي على عناصر غذائية متنوعة أهمها البروتين والفيتامينات والمعادن المهمة لصحة الجسم والمنظمة لحركة الجهاز الهضمي، والتي تعمل على تقوية جهاز المناعة ، الحمص من أبرز أنواع البقوليات الغنية بالبروتين النباتي الذي يساعد على تجديد أنسجة الجسم وبناء العضلات والعظام والغضاريف، كما أنه غني بالألياف الغذائية القابلة للذوبان التي تعطي شعورًا بالشبع وتحافظ على مستوى السكر في الدم فضلًا عن أنه بيحسن الهضم والامتصاص الحمص أيضًا بيحتوي على النشويات المعقدة وبتأخذ وقت طويل في الامتصاص وبالتالي بتستهلك من الجسم الطاقة اللازمة لتدفئته، فضلًا عن غناه بالحديد والكالسيوم، كما يساعد في خفض مستوى الكوليسترول الضار في الجسم، وبالتالي يحمي من زيادة الوزن وبيحافظ على صحة القلب والشرايين، إلى جانب غناه بمضادات الأكسدة كل الفوائد دي بتزيد أكتر مع الاضافات اللي بنضفها لحمص الشام ( الحلبسة ) زي الثوم والطماطم ، الشطة ، الليمون كل ده بيخلي لحمص الشام مش بس نكهة خاصة ولذيذة لأوكمان قيمة غذائية عالية تخليه الخيارالأفضل لمشروبات الشتاء الساخنة.

المكونات والمقادير :-

-ربع كيلو من الحمص .

 - بصلة واحدة متوسطة الحجم .

- حبة واحدة من الطماطم متوسطة .

- معلقة كبيرة من الثوم المفروم .

- نصف معلقة كبيرة من البابريكا .

- نصف معلقة كبيرة من الكمون .

 -ملح .

- شطة بودر أو صوص الشطة الجاهز حسب الرغبة .

- ليمون .

طريقة التحضير :-

قبل منبدأ في تسوية الحمص لازم نكون ناقعين الحمص قبلها بليلة كاملة علشان يسرع في عملية التسوية وبعد فترة النقع بنصفيه ونبدأ نضيف ليه مياه جديدة علشان التسوية هنحط الحمص ويكون مغمور بالماء وطبعاً الماء حسب عدد الأشخاص ولو الماء كميته قلت ولسه الحمص مستواش نقدر نزيده بمياه مغلية ، هنسيب الحمص يغلي على النار لحد مايبدأ يظهر الريم أو الرغوة البيضاء اللي بتظهر عادةً مع البقوليات لإحتوائها على البروتين النباتي لما تظهر الرغوة دي لازم نشيلها بالمعلقة وبعد كده نضيف المكونات الباقية هنضيف البصلة تكون متقشرة فقط من غير تقطيع ونضيف معاها حبة الطماطم وكمان تكون متقشرة بدون تقطيع ونضيف البابريكا وربع معلقة كبيرة من الكمون وممكن تضيفوا الشطة البودر لو كل اللي هيشرب بيحبها نضيف المكونات دي ونسيب الحمص يستوي على النار هنضيف الثوم والملح وباقي كمية الكمون الربع معلقة لما يكون باقي على تسوية الحمص حوالي 10 دقائق لأن ده بيضيف ليه مذاق أحلى وأجمل ، بعد ما يكتمل تسوية الحمص بيكون جاهز للتقديم تقدروا تقدموا معاه ليمون مقطع علشان يتعصر على الأكواب حسب الرغبة كمان ممكن تقدموا معاه زجاجة صوص الشطة الجاهزة علشان كل واحد هيشرب يضيف من الشطة الكمية المناسبة ليه ، وبكده تكون اكتملت وصفتنا أتمنى تجربوها وتنال إعجابكم .

                                   وبألف هنا .

     هتلاقوا طريقة حمص الشام ( الحلبسة ) في الفيديو التالي ⬇

طريقة عمل الكشري المصري بالدقة والصلصلة وسر الطعم اللذيذ للكشري

 

طريقة الكشري المصري

الكشري من الأكلات الشعبية المصرية اللذيذة وبتتعمل بطرق مختلفة في دول تانية كتير النهارده هقدم الكشري بطريقة أقرب لطريقة المطاعم علشان تديكوا طعم الكشري الخطير ، أتمنى الطريقة تنال إعجابكم .

الوصفة دي تكفي 7 أفراد 

 

في البداية هنحتاج ربع كيلو عدس أسمر منقوع لمدة 3 ساعات و ربع كيلو حمص يكون منقوع ليلة كاملة وطبعاً العدس والحمص يكونوا مغسولين كويس قبل عملية النقع ، البقوليات كل ما تنقع في الماء كل ما بتتخلص من الغازات الموجودة فيها اللي بتسبب نفخة للمعدة عند الأكل .

طريقة عمل البصل المحمر والأرز والمكرونة

المقادير :-

 -هنحتاج كيلو إلا ربع أرز مصري

- 600 جرام مكرونة مخلطة ( إسباجتي + مكرونة خواتم )

أنا إستخدمت نوع مكرونة مع الإسباجتي حجمها كان كبير شوية بس المكرونة الصغيرة بتبقى احلى

-7- 9 حبات كبار من البصل الأحمر

- زيت ذرة + زبدة

 -2 مكعب مرق دجاج

 -العدس المنقوع

- ملح الكمية حسب الرغبة

- فلفل أسود وكمون

- ماء مغلي لسلق المكرونة + ماء مغلي لتسوية الأرز

 

طريقة التحضير :-

في البداية هنحتاج نحمر البصل ممكن نقطع البصل على إيدينا لشرائح رفيعة وتكون 

طويلة أو ممكن نعمل الخطوة دي في محضرة الطعام لو موجود فيها السلاح الخاص 

بعمل الشرائح للخضار بعد ما نقطع كمية البصل اللي محتاجنها هنسخن زيت الذرة على 

النار ولازم يكون الزيت سخن وغزير علشان الزيت لو بارد البصل هيشرب الزيت 

وهيبقى طري ويفضل انكم متحمروش كمية البصل كلها مره واحدة يعني يفضل تقسموا 

كمية البصل وتحمروا كل جزء لوحده دي بيديه نتيجة أفضل ولازم نصفي البصل كويس 

من الزيت واحنا بنرفعه من الزيت ونحطه في صينية واسعة وتكون مفروشة بمناديل 

المطبخ علشان نصفي عليها البصل مهم اننا نوزع البصل في الصينية ويكون متفرق عن 

بعضه علشان يفضل ناشف وكمان مينفعش نغطي البصل بعد التحمير وهو لسه سخن 

لأن التغطية هتخليه طري علشان يبقى مقرمش لازم نسيبه مكشوف لحد مايبرد ، لسلق 

المكرونة هنغلي ماء على النار ونضيف شوية زيت وملح وبعد الماء ما يغلي هنضيف 

المكرونة ويفضل هنا إنكم تكسروا الإسباجتي لنصفين علشان متبقاش طويلة زيادة عن 

اللزوم بعد مايتم سلق المكرونة هنصفيها وفي حلة على النار هنضيف شوية زيت و3 

مكعبات زبدة ومكعب مرق دجاج ونتأكد من ان مكعب المرق ذاب كويس بعد كده 

نضيف المكرونة المسلوقة ونضيف الحمص بعد مانكون سلقناه وكمان نضيف البهار 

نصف معلقة صغيرة فلفل أسود ونصف معلقة صغيرة كمون ونقلب المكونات دي كلها 

مع بعض كويس ونسيب المكرونة على نار هادئة لحد ماتسخن ، بعد ماحمرنا البصل 

هناخد شوية من الزيت علشان نسوي بيه الأرز زيت البصل بيدي نكهة حلوة جداً للأرز 

ودي الخطوة اللي بيعملوها في المطاعم علشان تدي طعم مميز للأرز ونضيف مع 

الزيت 2 مكعب زبدة و مكعب مرق دجاج بعد كده نضيف كمية الأرز والعدس بعد ما 

نصفيه من ماء النقع ونبدأ نقلب الأرز من فترة للتانية لحد مانحس ان الأرز والعدس 

نشف من الماء اللي فيه بعد كده هنضيف الملح ونصف معلقة صغيرة فلفل أسود وكمون 

ونبدأ نزيد الأرز بالماء المغلي ونقلب المكونات كويس مع بعض ونسيب الماء اللي

ضفناه يغلي كويس وبعد كده نهدي النار ونغطي الأرز ونسيبه يستوي ، لما يتشرب الماء 

ممكن نختبر التسوية بتاعت الأرز ونقلبه بشوكة مش بمعلقة علشان ميعجنش ومنقلبش 

كتير هي مره بس علشان نتأكد إنه شرب الماء وبدأ يستوي .

مقادير وطريقة سلق الحمص وعمل دقة الخل وصوص الطماطم

المكونات والمقادير :-

- ماء لسلق الحمص

- بصلة صغيرة غير مقطعة

- ملح / فلفل أسود / كمون

- ثوم مفروم

 -خل أبيض

- حوالي نصف كيلو طماطم معصورة

-2 معلقة كبيرة صلصة طماطم

-معلقة صغيرة هريسة والهريسة بتكون حارة فممكن تزيدوا الكمية حسب الرغبة ولو الهريسة مش متوفرة ممكن تضيفوا بودرة شطة بس الكمية تكون أقل علشان متحرقش زيادة عن اللزوم

- معلقة كبيرة سكر

- زيت ذرة

   الهريسة ممكن تتعمل بسهولة في البيت وده اللينك اللي فيه الطريقة     

     https://lolista93.blogspot.com/2020/09/blog-post_20.html        

طريقة التحضير :-

لعمل صوص الطماطم هنحتاج لعصير طماطم ونضيف عليه السكر وده علشان يقلل من 

الحموضة اللي بتسببها الطماطم وكمان نضيف الصلصة والهريسة وربع معلقة صغيرة 

فلفل أسود ونصف معلقة صغيرة كمون وملح الكمية حسب الرغبة ، في حلة على النار 

هنضيف الزيت ومعلقتين كبار من الثوم المفروم هنقلب الثوم في الزيت كويس لحد ما 

يبدأ يحمر يعني يكون لونه ذهبي منغير ما يغمق بعدها هنضيف للثوم معلقتين كبار من 

الخل ونضيف عصير الطماطم بكل المكونات اللي ضفناها ليه ونقلب المكونات مع بعض 

كويس ونسيب الطماطم تغلي على النار بعد الغليان هنهدي النار ونسبها تتسبك براحتها 

يعني يبدأ عصير الطماطم ينشف من الماء اللي فيه ويتقل وتحسوا إن الزيت ظاهر على 

السطح كده يكون صوص الطماطم أصبح جاهز ، لسلق الحمص هنحتاج حلة ( وعاء 

الطهي ) ونضيف فيه كمية مناسبة من الماء ونضيف كمية الحمص بعد ما نصفيه من

ماء النقع ونسيب الحمص  يغلي على النارلما هيغلي هيبدأ يظهر الريم اللي هو رغوة 

بيضاء الرغوة دي اللي بتظهر في البداية لازم نشلها علشان دي بتسبب الغازات وبتخلي 

الحمص يكون صعب على المعدة هضمه وكمان بيتعب القاولون بعد ما نشيل الريم ده 

هنضيف البصلة المقشرة منغير ما نقطعها ونضيف ربع معلقة صغيرة من الفلفل الأسود 

ومعلقة صغيرة من الكمون ونسيبه على النار لحد مايستوي بعد كده هنصفي الحمص 

ونضيفه الى المكرونة بعد ما تتسلق وماء الحمص هنعمل منها دقة الخل والثوم في وعاء 

أوطبق عميق هنضيف معلقة كبيرة من الثوم المفروم و3 معالق خل أبيض و نصف 

معلقة صغيرة كمون ونقلب المكونات دي مع بعضها كويس جداً ، وكده يكون الكشري 

أصبح جاهز للتقديم عند التقديم ممكن تضيفوا الأرز بالعدس الأول في الأطباق وبعدين 

تضيفوا عليه المكرونة بالحمص وممكن تزينوا الأطباق بالبصل وصلصة الطماطم حسب 

الرغبة أو تقدموا البصل لوحده والصوص والدقة ممكن تقدموها في زجاجات زي 

المحلات .

الطريقة هتلاقوها واضحة أكتر في الفيديو التالي

وبألف هنا ...

 

وحدة كروشيه تنفع كوستر+فكرة مختلفة لتزيين المنزل بالكروشيه +طريقة عمل الدائرة السحرية

 زينة تنفع لمناسبات مختلفة زي رأس السنة وغيرها من المناسبات

موضوع النهاردة هيكون عن طريقة عمل الدائرة السحرية في الكروشيه بكل سهولة وكمان طريقة عمل وحدة كروشيه على شكل نجمة تنفع في استخدامات متعددة حبيت أقدمها بطريقة مختلفة فعملت منها زينة مناسبة للشتاء بما إننا كمان داخلين على سنة جديدة 2021 يارب تكون سنة سعيدة ومليئة بالنجاح وتحقيق كل الأمنيات للجميع يارب ، كمان عملت منها كوستر للأكواب أتمنى إنها تعجبكم .

الأدوات المستخدمة :-

- خيط كروشيه إليزا ديفا .

( أنا هنا استخدمت 4 ألوان مختلفة من درجات الكشمير والبنفسجي )

 صورة لألوان الخيط اللي استخدمته .

- ابرة كروشيه مقاس 3 mm .

- ابرة لتنظيف الخيط الزائد ومقص .

- دبابيس زي اللي في الصورة .

( الدبابيس علشان نقدر نثبت الزينة في الزوايا الخشبية اللي بتكون على الحائط )

غرز الكروشيه المستخدمة :-

- غرزة السلسلة .

- غرزة الفيشارة أو بوب كورن .

- غرزة عمود بلفة .

- غرزة المروحة .

- غرزة حشو .

- الغرزة المنزلقة .

طريقة عمل الوحدة وتعلم الدائرة السحرية هتلاقوها بالتفصيل في الفيديو التالي .

مشاهدة طيبة 

طريقة عمل الطعمية ( الفلافل ) بالفول والحمص طريقة هشة ولذيذة

 الطعمية بطعمها المميز 

الطعمية / الفلافل من الأكلات الشعبية في الوطن العربي وعليها إجماع كبير في حبها وتعتبر من الأكلات المميزة لوجبة الفطار والعشاء أيضاً حبيت أشارك طريقتها الجميلة والمضمونة بدون ماتفك في القلي وبطعم رائع ، أتمنى تجربوها وتنال إعجابكم .

المقادير والمكونات :-

- 1 كيلو من الفول المجروش .

- نصف كيلو حمص وممكن الحمص يبقى بنفس كمية الفول حسب    الرغبة .

- ربطتين من البقدونس / الكزبرة الخضراء / شبت / كرات لو مش    متوفر ممكن تستخدموا عيدان البصل الأخضر .

  ( لو حابين الخضرة تكون اقل تقدروا تكتفوا بربطة واحدة من كل     نوع ذكرته )

- 10 فصوص ثوم كبار .

- حوالي نصف كيلو بصل مقطع مكعبات صغيرة .

- كمية الملح حسب الرغبة .

- نصف ملعقة طعام من الفلفل الأسود / كمون / بابريكا  

 وممكن تستخدموا بهار الطعمية بيكون جاهزمن عند العطار.

المكونات المستخدمة مع الطعمية قبل القلي مباشرةً :-

- بيضة واحدة وممكن تستغنوا عنها لو مش حابين بس البيضة دي    بتخليها هشة ومتماسكة .

- ربع معلقة صغيرة كورباناتو ( بيكوربونات الصوديو ).

- رشة من الفلفل الأسود و الكمون .

- معلقة صغيرة كزبرة بودر لو مش حاطين كزبرة خضراء في       العجينة .

- سمسم للتزين .

طريقة عمل عجينة الطعمية :-

في البداية لازم بعد مانغسل الفول والحمص كويس بنخلطهم و ننقعهم في مياه عادية لمدة 12 ساعة تقريباً علشان تتفرم بشكل أفضل وبتدي نتيجة أحسن بس لازم نبدل مياه النقع مرتين خلال 12 ساعة ونبدلها مرة اخيرة قبل الفرم علشان مياه النقع بيبقى فيها رغوة كده من تفاعل الفول والحمص ودي اللي بتسبب النفخة للمعدة علشان كده البقوليات عامةً لازم تتنقع قبل استخدامها وكمان نغير مياه النقع كل فترة بعد انتهاء مدة النقع بنصفيهم كويس وبعد كده بنضيف ليهم الكرات والخضرة المقطعة  والثوم والبصل ونخلطهم كويس مع الفول والحمص وبعد كده في المفرمة الخاصة باللحم ممكن تفرموا عجينة الطعمية فيها هي بيبقا ليها قطعتين قطعة للفرم الخشن وقطعة للفرم الناعم الأفضل اننا نستخدم القطعة الخشنة الأول وبعدين القطعة الناعمة لو حابيين العجينة تكون مش ناعمة قوي علشان بعد القلي يبقى فيها اجزاء خشنة ومقرمشة أكتر ممكن متنعموش كل كمية العجينة يعني تنعموا جزء كبير منها والباقي تخلوه خشن ، التنعيم ده بنعمله علشان العجينة تكون متماسكة ومتفكش في القلي لو المفرمة مش موجودة عندكم تقدروا تستخدموا الكبة / محضرة الطعام في فرم العجينة بس هتحتاجوا تضيفوا شوية مياه مع المكونات علشان تسهل عملية الفرم بعد ما نخلص مرحلة الفرم هنضيف البهار للعجينة ونقلبهم كويس مع بعض كده العجينة تكون جاهزة للإستخدام المباشر أو التفريز ممكن تحفظوها في الفريزر لمدة 3-4 شهور في الأكياس الخاصة بالطعام أو علب حفظ الطعام .

طريقة قلي الطعمية :-

قبل القلي مباشرةً لازم نضيف الكورباناتو علشان لو إتساب فترة العجينة هتسمر ، بنضيف البيضة ونخفقها كويس مع العجينة ونضيف رشة من الفلفل الأسود والكمون وممكن نزود كزبرة بودر حسب الرغبة وبعد مانقلب المكونات كويس نبدأ نسخن الزيت في طاسة القلي ولازم يوصل لدرجة الغليان ثم نبدأ نكور العجينة بالإيد أو نستخدم آلة الطعمية هتشوفوها في الفيديو التالي ونضيف السمسم على الطعمية اللي شكلناها وننزلها في الزيت بس نهدي النار واحنا بنزل الطعمية علشان متفكش وبعد ما نملى الطاسة نرجع نعلي النار عليها ومنحطش الطعمية في الزيت على الجهة اللي فيها السمسم علشان ميقعش منها بنحطها في الأول على الجهة اللي من غير سمسم والطريقة هتكون أوضح في الفيديو مشاهدة طيبة .

وبألف هنا ... 

باليرينا ( لكلوك ) لجميع المقاسات + جدول جميع مقاسات القدم

 

باليرينا كروشيه تنفع للأطفال والكبار 

في الشتاء بنبحث دائماً عن تدفئة الجسم خاصةً أكثر أجزاء بتبرد في جسمنا زي الكفوف والقدم بنبقى محتاجين ندفيهم بأي طريقة علشان نقدر نتعايش مع برودة الجو ، علشان كده محبي الكروشيه دايماً بيستنوا الشتاء علشان يعملوا الحاجات الجميلة زي الجوانتي والشرابات أو اللكلوك بخيوط الكروشيه المتنوعة بتمد الجسم بالدفء وكمان بيكون شكلها جميل ورائع وبنستمتع بشغلها وبنعملها بحب لينا ولأفراد عائلتنا ، في الموضوع ده حبيت أشارك معاكم طريقة عمل الكلوك أو باليرينا من الكروشيه وكمان هعرفكم ازاي تعملوها لكل مقاسات القدم المختلفة وازاي نحسب عدد السلاسل لبدء الشغل ، أتمنى الموضوع يعجبكم وتستفيدوا منه .

الأدوات المستخدمة:- 

- إبرة كروشيه مقاس 4mm .

- كرة فرو أو كرة بوم بوم / ابرة خياطة عادية وخيط لتثبيت الكرة .

- متر لقياس عدد سلاسل البداية .

- مقص وإبرة تنظيف .

- دبوس خاص بالكروشيه .

- خيط مخمل .

صورة للخيط اللي استخدمته 

الغرز المستخدمة :- 

- غرزة السلسلة .

- غرزة الحشو .

- غرزة نصف عمود .

- غرزة عمود بلفة .

- غرزة المنزلقة .

- تناقص بغرزة عمود بلفة .

- تناقص بغرزة الحشو . 

في البداية هنحتاج نعرف مقاس القدم اللي هنعملها الباليرينا أو أي منتج للقدم ، في الجدول التالي هتلاقوا كل المقاسات للأطفال والكبار 

بعد ما تختاروا المقاس اللي هتشتغلوا عليه دلوقتي لازم نعرف إزاي نحسب عدد السلاسل اللي هنبدأ بيها في البداية هنشوف مقاس طول القدم ونطرحه من مقاس عرض القدم والناتج هنعمل على أساسه عدد سلاسل البداية بحيث ناتج عدد السلاسل دي تساوي ناتج طرح الطول من العرض بالسنتيمتر 

مثال :- 

لو اخترنا مقاس 38 فالمقاس ده طول القدم فيه 24 سم والعرض 9.5 سم الحساب هيكون كالأتي : هنطرح الطول من العرض

 24 – 9.5 = 14.5 سم يبقى هنحتاج عدد سلاسل = 14.5 سم يعني هنستخدم الخيط والابرة ونبدأ نعمل سلاسل البداية ونقيس السلاسل دي بالمتر ونشوف اذا وصلت 14.5 سم ولالأ وطبعاً الموضوع ممكن يختلف من خيط للثاني حسب مقاس الخيط ومقاس الإبرة يعني ممكن نوع خيط يدينا 18 غرزة سلسلة = 14.5 سم بينما خيط وإبرة بمقاس تاني يدونا 14 غرزة سلسلة وهكذا ...

يفضل اننا واحنا بنختار المقاس نختار مقاس القدم يكون اكبر بدرجة عن المقاس الحقيقي يعني لو مقاسي 39 في الأحذية هختار اشتغل على مقاس 40 علشان الخيط بيفرق عن الأحذية .

الطريقة هتلاقوها بشكل أوضح في الفيديو التالي مشاهدة طيبة 

بندانة كروشيه من المخمل ( Twist Headband )+ طريقة التحويل من الإنش ( البوصة ) الى السنتيمتر والعكس

 بندانة جميلة وسهلة  جداً لشتاء دافئ 

 

 

بندانة الشعر من الحاجات المميزة اللي ممكن نعملها بالكروشيه بغرز مختلفة بتدي شكل حلو جداً في اللبس و بما إننا دخلنا في فصل الشتاء حبيت أشارك معاكم بندانة كروشيه بغرزة سهلة وبسيطة جداً بس هتديكم في النهاية شكل جميل وكمان تدفئة لمنطقة الرأس والأذن و مريحة في اللبس .

الأدوات اللي هنحتجها :- 

- خيط مخمل .

 نوع الخيط اللي استخدمته (Himalaya Dolphin Baby) 

الخيط ده حجمه 100 جرام لكن البندانة احتاجت مني حوالي 63 جرام من حجم شلة الخيط .

- إبرة كروشيه مقاس 4mm .

- متر لقياس حجم البندانة .

- وطبعاً مقص وإبرة تنظيف .

صورة لشلة الخيط المستخدمة 

الغرز المستخدمة :- 

- غرزة السلسلة .

- الغرزة المزدوجة ( double crochet ) .

في البداية هنحتاج نعمل عدد من غرزة السلسلة بحيث يكون عرض البندانة حوالي 5 انش / بوصة = 12.5 سنتيميتر أنا هنا عملت حوالي 20 غرزة سلسلة علشان تديني العرض المناسب ليه وهو 5 انش وممكن عدد السلاسل يختلف حسب مقاس الخيط والإبرة المستخدمة وكمان حسب مقاس الرأس لو طفلة صغيرة أكيد هتختلف هيكون المقاس أصغر ، 5 انش مناسب للكبار .

 بالنسبة لخيط المخمل هو خيط جميل جداً وناعم وخفيف في اللبس وبيدفي جداً بس هو محتاج حرص في الأستخدام وانتوا بتشتغلوا بيه ، ولو حسيتوا انكم هتتلخبطوا في حساب عدد الغرز لأن نوع الخيط ممكن يخلي الغرز مش واضحة اوي في البداية لو واجهتكم المشكلة دي ممكن تستخدموا العداد الخاص بالكروشيه أو السبحةالإلكترونية 

جدول لقياس محيط الرأس بالسنتيمتر حسب المرحلة العمرية 

طريقة التحويل من الإنش الى السنتيمتر 

البوصة أو الإنش الواحد يعادل 2.54 سنتيمتر

1 بوصة  أو انش = 2.54 سم

في حالة التحويل من انش الى سنتيمتر ، قم بالضرب في 2.54

القيمة بالسنتيمتر = قيمة الانش × 2.54

مثال :-

9 انش كم سم

الحل:-

القيمة بالسنتيمتر = 9 انش × 2.54

= 22.86‬ سم

 

أما في الحالة العكسية ..

اي التحويل من سم الى انش ، قم بالقسمة على 2.54

القيمة بالانش = القيمة بالسم ÷ 2.54

مثال :-

قم بتحويل 20 سم الى انش

القيمة بالانش = 20 سم ÷ 2.54

= تقريباً 7.87 انش

طريقة عمل البندانة هتكون واضحة لِكم من خلال الفيديو التالي مشاهدة ممتعة وأتمنى الفيديو ينال إعجابكم 

  

طريقة المكرونة النجرسكو

 طريقة عمل النجرسكو 

المكرونة أو الباستا خاصة  الإيطالية من أشهى الأطباق اللي الكبار والصغيرين بيحبوها جدا وبتبقى حاضرة في العزومات والمناسبات المختلفة ،حبيت اشارك معاكم طريقة المكرونة النجرسكو بمكونتها الغنية وطعمها اللذيذ والمميز أتمنى الطريقة تنال اعجابكم .

المقادير والمكونات :-

- 800 جرام من المكرونة الشريط العريضة .

( وممكن لو النوع ده مش متوفرنستخدم المكرونة الإسباجتي أو مكرونة القلم لكن في الأساس هي بتتعمل بالمكرونة الشريط العريضة  )

-  ماء لسلق المكرونة .

- معلقة كبيرة ملح لسلق المكرونة .

- زيت ذرة .

طريقة تحضير المكرونة :- 

نغلي ماء على النار ونضيف ليه شوية من الزيت والملح بعد ما الماء يغلي نضيف المكرونة علشان تتسلق ونحركها كويس علشان تفك من بعضها ومتلزقش في بعض هنسبها على النار لحد ما توصل لدرجة التسوية المطلوبة وهنا المكرونة لازم تكون نصف تسوية علشان لسه هتدخل الفرن بعد كده هنصفيها من الماء ونتأكد أنها اتصفت كويس بعد كده هنسبها في الحلة ونغطيها علشان تفضل محتفظة بحرارتها لانها لو بردت النشا اللي في المكرونة هيخليها تمسك في بعضها وهيبقى صعب تفكيكها بعد كده .

مقادير ومكونات الخلطة اللي هنضفها للمكرونة :-

- نصف كيلو من أوراك الدجاج المخلية نقطعها لشرائح متوسطة      الحجم .

- 2حبة بصل متوسطة مقطعة لشرائح (أجنحة ) .

- 2 معلقة كبيرة ثوم مفروم .

- فلفل رومي ألوان مقطع مكعبات أو شرائح .

- 200 جرام من المشروم ( فطر ) .

- زيتون مخلي اسود أو أخضر حسب الرغبة .

- ملح /مكعب مرق دجاج  / نصف معلقة صغيرة من الفلفل الأسود.

- زيت ذرة .

طريقة التحضير :- 

على النار هنضيف شوية زيت ونضيف البصل ونقلب  لحد ما البصل يذبل شوية وتبدأ ريحته تظهر بس منغير ما يحمر بعد كده

هنضيف الثوم ونقلبهم شوية بعد كده نضيف قطع الدجاج والفلفل الأسود والمشروم ونقلب ومن فترة لأخرى هنقلب الدجاج لحد ما نحس أنها نشفت ودخلت في التسوية بعد كده نضيف الملح والفلفل الألوان ونقلب المكونات مع بعض كويس بعد كده لما نتأكد أن الدجاج إكتمل تسويته هنرفع المكونات من على النار ونضيف الزيتون للخليط ونقلبهم مع بعض وده لإن الزيتون طعمه بيتغير وبيدي مرارة للأكل لو أتعرض فترة للنار هنسيب الخليط ده على جنب لحد ما نعمل صوص البشاميل .

مقادير ومكونات صوص البشاميل :-

- 5 معالق كبار من الدقيق الأبيض .

- 5 مكعبات من الزبدة .

- زيت ذرة .

- 2 ونصف لتر حليب .

- 5 معالق كبار من القشطة أو علبة صغيرة من كريمة الطبخ .

- ملح / ربع معلقة صغيرة من الفلفل الأبيض أو اسود حسب            المتوفر .

- هنحتاج جبنة موتزاريلا وشيدر حسب الرغبة وممكن تضيفوا         بدل الشيدرأي نوع تحبوه .

طريقة التحضير :- 

هنضيف الزيت والزبدة على النار ونضيف الدقيق ونقلبهم مع بعض كويس هنفضل نقلب لحد ما الدقيق يتغير لونه ويبقى قريب من لون الطحينة بعد كده هنضيف الحليب ونقلب واحنا بنضيف الحليب علشان الدقيق ميكلكعش ويذوب بشكل أسرع قوام البشاميل في النجرسكو بيكون خفيف غير عن المكرونة بالبشاميل العادية بيكون قوام البشاميل اتخن بعد كده هنضيف الملح والفلفل ونسيب الصوص يغلي شوية على النار بعد كده هنضيف القشطة أو الكريمة ونقلبهم كويس ونرفعها من على النار  .

( صوص البشاميل يفضل استخدامه بعد رفعه من على النار لأنه لما بيبرد قوامه بيكون أثقل واتخن ويبقى صعب توزيعه )

طريقة تجهيز الصينية :- 

هنضيف لخليلط الدجاج شوية من الأجبان المتوفرة ونضيف كمية صغيرة من صوص البشاميل للخليط ونقلبهم مع بعض ونضيفهم للمكرونة المسلوقة ونقلبهم كويس علشان المكونات تندمج كويس مع بعض بعد كده هنضيف شوية من صوص البشاميل في صينية الفرن

ونضيف عليها المكرونة اللي خلطناها مع الدجاج وبعد كده نصب باقي كمية صوص البشاميل بحيث أنها تغطي وجه المكرونة بأكمله ونوزع الجبنة على وجه الصينية وندخلها الفرن ولازم يكون الفرن سخن قبل دخول الصينية ويكون على درجة حرارة 200 

ندخل الصينية على شبكة الفرن وتكون في منتصف الفرن .

( استخدمت في الوصفة دي صينية بايركس مقاس 41×29 وواحدة تانية مقاس 39×27 لأن الكمية كانت كبيرة على صينية واحدة وكمان علشان سمك وارتفاع المكرونة ميكونش عالي اوي )

وبألف هنا ...

شوفوا الفيديو علشان تعرفوا الطريقة بشكل أوضح 😊