طريقة عمل الطعمية ( الفلافل ) بالفول والحمص طريقة هشة ولذيذة

 الطعمية بطعمها المميز 

الطعمية / الفلافل من الأكلات الشعبية في الوطن العربي وعليها إجماع كبير في حبها وتعتبر من الأكلات المميزة لوجبة الفطار والعشاء أيضاً حبيت أشارك طريقتها الجميلة والمضمونة بدون ماتفك في القلي وبطعم رائع ، أتمنى تجربوها وتنال إعجابكم .

المقادير والمكونات :-

- 1 كيلو من الفول المجروش .

- نصف كيلو حمص وممكن الحمص يبقى بنفس كمية الفول حسب    الرغبة .

- ربطتين من البقدونس / الكزبرة الخضراء / شبت / كرات لو مش    متوفر ممكن تستخدموا عيدان البصل الأخضر .

  ( لو حابين الخضرة تكون اقل تقدروا تكتفوا بربطة واحدة من كل     نوع ذكرته )

- 10 فصوص ثوم كبار .

- حوالي نصف كيلو بصل مقطع مكعبات صغيرة .

- كمية الملح حسب الرغبة .

- نصف ملعقة طعام من الفلفل الأسود / كمون / بابريكا  

 وممكن تستخدموا بهار الطعمية بيكون جاهزمن عند العطار.

المكونات المستخدمة مع الطعمية قبل القلي مباشرةً :-

- بيضة واحدة وممكن تستغنوا عنها لو مش حابين بس البيضة دي    بتخليها هشة ومتماسكة .

- ربع معلقة صغيرة كورباناتو ( بيكوربونات الصوديو ).

- رشة من الفلفل الأسود و الكمون .

- معلقة صغيرة كزبرة بودر لو مش حاطين كزبرة خضراء في       العجينة .

- سمسم للتزين .

طريقة عمل عجينة الطعمية :-

في البداية لازم بعد مانغسل الفول والحمص كويس بنخلطهم و ننقعهم في مياه عادية لمدة 12 ساعة تقريباً علشان تتفرم بشكل أفضل وبتدي نتيجة أحسن بس لازم نبدل مياه النقع مرتين خلال 12 ساعة ونبدلها مرة اخيرة قبل الفرم علشان مياه النقع بيبقى فيها رغوة كده من تفاعل الفول والحمص ودي اللي بتسبب النفخة للمعدة علشان كده البقوليات عامةً لازم تتنقع قبل استخدامها وكمان نغير مياه النقع كل فترة بعد انتهاء مدة النقع بنصفيهم كويس وبعد كده بنضيف ليهم الكرات والخضرة المقطعة  والثوم والبصل ونخلطهم كويس مع الفول والحمص وبعد كده في المفرمة الخاصة باللحم ممكن تفرموا عجينة الطعمية فيها هي بيبقا ليها قطعتين قطعة للفرم الخشن وقطعة للفرم الناعم الأفضل اننا نستخدم القطعة الخشنة الأول وبعدين القطعة الناعمة لو حابيين العجينة تكون مش ناعمة قوي علشان بعد القلي يبقى فيها اجزاء خشنة ومقرمشة أكتر ممكن متنعموش كل كمية العجينة يعني تنعموا جزء كبير منها والباقي تخلوه خشن ، التنعيم ده بنعمله علشان العجينة تكون متماسكة ومتفكش في القلي لو المفرمة مش موجودة عندكم تقدروا تستخدموا الكبة / محضرة الطعام في فرم العجينة بس هتحتاجوا تضيفوا شوية مياه مع المكونات علشان تسهل عملية الفرم بعد ما نخلص مرحلة الفرم هنضيف البهار للعجينة ونقلبهم كويس مع بعض كده العجينة تكون جاهزة للإستخدام المباشر أو التفريز ممكن تحفظوها في الفريزر لمدة 3-4 شهور في الأكياس الخاصة بالطعام أو علب حفظ الطعام .

طريقة قلي الطعمية :-

قبل القلي مباشرةً لازم نضيف الكورباناتو علشان لو إتساب فترة العجينة هتسمر ، بنضيف البيضة ونخفقها كويس مع العجينة ونضيف رشة من الفلفل الأسود والكمون وممكن نزود كزبرة بودر حسب الرغبة وبعد مانقلب المكونات كويس نبدأ نسخن الزيت في طاسة القلي ولازم يوصل لدرجة الغليان ثم نبدأ نكور العجينة بالإيد أو نستخدم آلة الطعمية هتشوفوها في الفيديو التالي ونضيف السمسم على الطعمية اللي شكلناها وننزلها في الزيت بس نهدي النار واحنا بنزل الطعمية علشان متفكش وبعد ما نملى الطاسة نرجع نعلي النار عليها ومنحطش الطعمية في الزيت على الجهة اللي فيها السمسم علشان ميقعش منها بنحطها في الأول على الجهة اللي من غير سمسم والطريقة هتكون أوضح في الفيديو مشاهدة طيبة .

وبألف هنا ... 

باليرينا ( لكلوك ) لجميع المقاسات + جدول جميع مقاسات القدم

 

باليرينا كروشيه تنفع للأطفال والكبار 

في الشتاء بنبحث دائماً عن تدفئة الجسم خاصةً أكثر أجزاء بتبرد في جسمنا زي الكفوف والقدم بنبقى محتاجين ندفيهم بأي طريقة علشان نقدر نتعايش مع برودة الجو ، علشان كده محبي الكروشيه دايماً بيستنوا الشتاء علشان يعملوا الحاجات الجميلة زي الجوانتي والشرابات أو اللكلوك بخيوط الكروشيه المتنوعة بتمد الجسم بالدفء وكمان بيكون شكلها جميل ورائع وبنستمتع بشغلها وبنعملها بحب لينا ولأفراد عائلتنا ، في الموضوع ده حبيت أشارك معاكم طريقة عمل الكلوك أو باليرينا من الكروشيه وكمان هعرفكم ازاي تعملوها لكل مقاسات القدم المختلفة وازاي نحسب عدد السلاسل لبدء الشغل ، أتمنى الموضوع يعجبكم وتستفيدوا منه .

الأدوات المستخدمة:- 

- إبرة كروشيه مقاس 4mm .

- كرة فرو أو كرة بوم بوم / ابرة خياطة عادية وخيط لتثبيت الكرة .

- متر لقياس عدد سلاسل البداية .

- مقص وإبرة تنظيف .

- دبوس خاص بالكروشيه .

- خيط مخمل .

صورة للخيط اللي استخدمته 

الغرز المستخدمة :- 

- غرزة السلسلة .

- غرزة الحشو .

- غرزة نصف عمود .

- غرزة عمود بلفة .

- غرزة المنزلقة .

- تناقص بغرزة عمود بلفة .

- تناقص بغرزة الحشو . 

في البداية هنحتاج نعرف مقاس القدم اللي هنعملها الباليرينا أو أي منتج للقدم ، في الجدول التالي هتلاقوا كل المقاسات للأطفال والكبار 

بعد ما تختاروا المقاس اللي هتشتغلوا عليه دلوقتي لازم نعرف إزاي نحسب عدد السلاسل اللي هنبدأ بيها في البداية هنشوف مقاس طول القدم ونطرحه من مقاس عرض القدم والناتج هنعمل على أساسه عدد سلاسل البداية بحيث ناتج عدد السلاسل دي تساوي ناتج طرح الطول من العرض بالسنتيمتر 

مثال :- 

لو اخترنا مقاس 38 فالمقاس ده طول القدم فيه 24 سم والعرض 9.5 سم الحساب هيكون كالأتي : هنطرح الطول من العرض

 24 – 9.5 = 14.5 سم يبقى هنحتاج عدد سلاسل = 14.5 سم يعني هنستخدم الخيط والابرة ونبدأ نعمل سلاسل البداية ونقيس السلاسل دي بالمتر ونشوف اذا وصلت 14.5 سم ولالأ وطبعاً الموضوع ممكن يختلف من خيط للثاني حسب مقاس الخيط ومقاس الإبرة يعني ممكن نوع خيط يدينا 18 غرزة سلسلة = 14.5 سم بينما خيط وإبرة بمقاس تاني يدونا 14 غرزة سلسلة وهكذا ...

يفضل اننا واحنا بنختار المقاس نختار مقاس القدم يكون اكبر بدرجة عن المقاس الحقيقي يعني لو مقاسي 39 في الأحذية هختار اشتغل على مقاس 40 علشان الخيط بيفرق عن الأحذية .

الطريقة هتلاقوها بشكل أوضح في الفيديو التالي مشاهدة طيبة 

بندانة كروشيه من المخمل ( Twist Headband )+ طريقة التحويل من الإنش ( البوصة ) الى السنتيمتر والعكس

 بندانة جميلة وسهلة  جداً لشتاء دافئ 

 

 

بندانة الشعر من الحاجات المميزة اللي ممكن نعملها بالكروشيه بغرز مختلفة بتدي شكل حلو جداً في اللبس و بما إننا دخلنا في فصل الشتاء حبيت أشارك معاكم بندانة كروشيه بغرزة سهلة وبسيطة جداً بس هتديكم في النهاية شكل جميل وكمان تدفئة لمنطقة الرأس والأذن و مريحة في اللبس .

الأدوات اللي هنحتجها :- 

- خيط مخمل .

 نوع الخيط اللي استخدمته (Himalaya Dolphin Baby) 

الخيط ده حجمه 100 جرام لكن البندانة احتاجت مني حوالي 63 جرام من حجم شلة الخيط .

- إبرة كروشيه مقاس 4mm .

- متر لقياس حجم البندانة .

- وطبعاً مقص وإبرة تنظيف .

صورة لشلة الخيط المستخدمة 

الغرز المستخدمة :- 

- غرزة السلسلة .

- الغرزة المزدوجة ( double crochet ) .

في البداية هنحتاج نعمل عدد من غرزة السلسلة بحيث يكون عرض البندانة حوالي 5 انش / بوصة = 12.5 سنتيميتر أنا هنا عملت حوالي 20 غرزة سلسلة علشان تديني العرض المناسب ليه وهو 5 انش وممكن عدد السلاسل يختلف حسب مقاس الخيط والإبرة المستخدمة وكمان حسب مقاس الرأس لو طفلة صغيرة أكيد هتختلف هيكون المقاس أصغر ، 5 انش مناسب للكبار .

 بالنسبة لخيط المخمل هو خيط جميل جداً وناعم وخفيف في اللبس وبيدفي جداً بس هو محتاج حرص في الأستخدام وانتوا بتشتغلوا بيه ، ولو حسيتوا انكم هتتلخبطوا في حساب عدد الغرز لأن نوع الخيط ممكن يخلي الغرز مش واضحة اوي في البداية لو واجهتكم المشكلة دي ممكن تستخدموا العداد الخاص بالكروشيه أو السبحةالإلكترونية 

جدول لقياس محيط الرأس بالسنتيمتر حسب المرحلة العمرية 

طريقة التحويل من الإنش الى السنتيمتر 

البوصة أو الإنش الواحد يعادل 2.54 سنتيمتر

1 بوصة  أو انش = 2.54 سم

في حالة التحويل من انش الى سنتيمتر ، قم بالضرب في 2.54

القيمة بالسنتيمتر = قيمة الانش × 2.54

مثال :-

9 انش كم سم

الحل:-

القيمة بالسنتيمتر = 9 انش × 2.54

= 22.86‬ سم

 

أما في الحالة العكسية ..

اي التحويل من سم الى انش ، قم بالقسمة على 2.54

القيمة بالانش = القيمة بالسم ÷ 2.54

مثال :-

قم بتحويل 20 سم الى انش

القيمة بالانش = 20 سم ÷ 2.54

= تقريباً 7.87 انش

طريقة عمل البندانة هتكون واضحة لِكم من خلال الفيديو التالي مشاهدة ممتعة وأتمنى الفيديو ينال إعجابكم 

  

طريقة المكرونة النجرسكو

 طريقة عمل النجرسكو 

المكرونة أو الباستا خاصة  الإيطالية من أشهى الأطباق اللي الكبار والصغيرين بيحبوها جدا وبتبقى حاضرة في العزومات والمناسبات المختلفة ،حبيت اشارك معاكم طريقة المكرونة النجرسكو بمكونتها الغنية وطعمها اللذيذ والمميز أتمنى الطريقة تنال اعجابكم .

المقادير والمكونات :-

- 800 جرام من المكرونة الشريط العريضة .

( وممكن لو النوع ده مش متوفرنستخدم المكرونة الإسباجتي أو مكرونة القلم لكن في الأساس هي بتتعمل بالمكرونة الشريط العريضة  )

-  ماء لسلق المكرونة .

- معلقة كبيرة ملح لسلق المكرونة .

- زيت ذرة .

طريقة تحضير المكرونة :- 

نغلي ماء على النار ونضيف ليه شوية من الزيت والملح بعد ما الماء يغلي نضيف المكرونة علشان تتسلق ونحركها كويس علشان تفك من بعضها ومتلزقش في بعض هنسبها على النار لحد ما توصل لدرجة التسوية المطلوبة وهنا المكرونة لازم تكون نصف تسوية علشان لسه هتدخل الفرن بعد كده هنصفيها من الماء ونتأكد أنها اتصفت كويس بعد كده هنسبها في الحلة ونغطيها علشان تفضل محتفظة بحرارتها لانها لو بردت النشا اللي في المكرونة هيخليها تمسك في بعضها وهيبقى صعب تفكيكها بعد كده .

مقادير ومكونات الخلطة اللي هنضفها للمكرونة :-

- نصف كيلو من أوراك الدجاج المخلية نقطعها لشرائح متوسطة      الحجم .

- 2حبة بصل متوسطة مقطعة لشرائح (أجنحة ) .

- 2 معلقة كبيرة ثوم مفروم .

- فلفل رومي ألوان مقطع مكعبات أو شرائح .

- 200 جرام من المشروم ( فطر ) .

- زيتون مخلي اسود أو أخضر حسب الرغبة .

- ملح /مكعب مرق دجاج  / نصف معلقة صغيرة من الفلفل الأسود.

- زيت ذرة .

طريقة التحضير :- 

على النار هنضيف شوية زيت ونضيف البصل ونقلب  لحد ما البصل يذبل شوية وتبدأ ريحته تظهر بس منغير ما يحمر بعد كده

هنضيف الثوم ونقلبهم شوية بعد كده نضيف قطع الدجاج والفلفل الأسود والمشروم ونقلب ومن فترة لأخرى هنقلب الدجاج لحد ما نحس أنها نشفت ودخلت في التسوية بعد كده نضيف الملح والفلفل الألوان ونقلب المكونات مع بعض كويس بعد كده لما نتأكد أن الدجاج إكتمل تسويته هنرفع المكونات من على النار ونضيف الزيتون للخليط ونقلبهم مع بعض وده لإن الزيتون طعمه بيتغير وبيدي مرارة للأكل لو أتعرض فترة للنار هنسيب الخليط ده على جنب لحد ما نعمل صوص البشاميل .

مقادير ومكونات صوص البشاميل :-

- 5 معالق كبار من الدقيق الأبيض .

- 5 مكعبات من الزبدة .

- زيت ذرة .

- 2 ونصف لتر حليب .

- 5 معالق كبار من القشطة أو علبة صغيرة من كريمة الطبخ .

- ملح / ربع معلقة صغيرة من الفلفل الأبيض أو اسود حسب            المتوفر .

- هنحتاج جبنة موتزاريلا وشيدر حسب الرغبة وممكن تضيفوا         بدل الشيدرأي نوع تحبوه .

طريقة التحضير :- 

هنضيف الزيت والزبدة على النار ونضيف الدقيق ونقلبهم مع بعض كويس هنفضل نقلب لحد ما الدقيق يتغير لونه ويبقى قريب من لون الطحينة بعد كده هنضيف الحليب ونقلب واحنا بنضيف الحليب علشان الدقيق ميكلكعش ويذوب بشكل أسرع قوام البشاميل في النجرسكو بيكون خفيف غير عن المكرونة بالبشاميل العادية بيكون قوام البشاميل اتخن بعد كده هنضيف الملح والفلفل ونسيب الصوص يغلي شوية على النار بعد كده هنضيف القشطة أو الكريمة ونقلبهم كويس ونرفعها من على النار  .

( صوص البشاميل يفضل استخدامه بعد رفعه من على النار لأنه لما بيبرد قوامه بيكون أثقل واتخن ويبقى صعب توزيعه )

طريقة تجهيز الصينية :- 

هنضيف لخليلط الدجاج شوية من الأجبان المتوفرة ونضيف كمية صغيرة من صوص البشاميل للخليط ونقلبهم مع بعض ونضيفهم للمكرونة المسلوقة ونقلبهم كويس علشان المكونات تندمج كويس مع بعض بعد كده هنضيف شوية من صوص البشاميل في صينية الفرن

ونضيف عليها المكرونة اللي خلطناها مع الدجاج وبعد كده نصب باقي كمية صوص البشاميل بحيث أنها تغطي وجه المكرونة بأكمله ونوزع الجبنة على وجه الصينية وندخلها الفرن ولازم يكون الفرن سخن قبل دخول الصينية ويكون على درجة حرارة 200 

ندخل الصينية على شبكة الفرن وتكون في منتصف الفرن .

( استخدمت في الوصفة دي صينية بايركس مقاس 41×29 وواحدة تانية مقاس 39×27 لأن الكمية كانت كبيرة على صينية واحدة وكمان علشان سمك وارتفاع المكرونة ميكونش عالي اوي )

وبألف هنا ...

شوفوا الفيديو علشان تعرفوا الطريقة بشكل أوضح 😊

فطائر الفلفل ( بالهريسة )

 فطائر الفلفل ( بالهريسة )

المعجنات عالم كبير وواسع نقدر نبتكر فيه طرق لخلطات وحشوات وأشكال كتير جداً في الموضوع ده حبيت أقدم طريقة فطائر لذيذة جداً فطائر هريسة الفلفل أو إخوانا في بلاد الشام بيقولوا عليها محمرة أتمنى الطريقة دي تعجب كل اللي يشوفها وتجربوها                                              بإذن الله  .

مقادير المحمرة :-

- 2 حبة بصل كبار مفرومين ناعم .

- زيت ذرة أو زيت زيتون وانا بحب استخدم النوعين مع بعض في     الوصفة دي .

- 3 ملاعق كبيرة من هريسة الفلفل .

   رابط طريقة عمل هريسة الفلفل

https://lolista93.blogspot.com/2020/09/blog-post_20.html

- 3 ملاعق كبيرة من الكاتشب .

- ملح الكمية حسب الرغبة .

- ملعقة كبيرة من البابريكا .

- سمسم محمرالكمية حسب الرغبة .

طريقة التحضير :-

في البداية بنسوي البصل المفروم مع كمية مناسبة من زيت الذرة

ونقلب البصل لحد ما يذبل شوية بس من غير مايحمر أو ياخد لون 

وبعد كده بنضيف كمية من زيت الزيتون والهريسة وطبعاً الكمية 

ممكن تتحكموا فيها بس خلوا بالكم لو الهريسة فيها شطة حارة فهنا 

لازم تاخدوا بالكم من الكمية اللي هتضيفوها للمحمرةعلشان متبقاش حارة زيادة 

عن اللزوم ، بعد كده هنقلب الهريسة كويس مع البصل ونضيف كمية الملح 

المناسبة ونضيف الكاتشب والبابريكا ونقلب المكونات مع بعض 

كويس ( الكاتشب هنا بديل للطماطم لأن في الطريقة الأساسية بيضاف طماطم للمحمرة لكن أنا حبيت أجربها بالكاتشب كبديل للطماطم ) وفي الحقيقة الكاتشب أضاف 

ليها طعم ورائحة جميلة جداً وبيضيف طعم مسكر للآكل ، هتفضل 

المكونات على النار لحد ما نحس إنها نشفت ومفيش فيها أي سوائل 

بعد كده بنرفعها من على النار ونسبها تهدى وتبرد لحد وقت 

الإستخدام وممكن نحفظها في الفريزر في علبة مخصصة لحفظ 

                    الطعام ونستخدمها في أي وقت .

مقادير عجينة الفطائر :- 

- 2 كيلو دقيق جميع الإستخدامات .

- معلقة واحدة كبيرة من الخميرة الفورية .

- معلقة كبيرة من السكر .

- 3 معالق كبار من الحليب البودر .

- معلقة كبيرة من السكر .

- رشة بسيطة من الملح .

- 2 علبة زبادي صغيرة الحجم .

- كوب إلا ربع من زيت الذرة .

- لتر إلا ربع من الماء الدافئ .

طريقة تحضير الفطائر :-

في العجان الكهربائي أو بالعجن يدوياً بنقوم بنفس الخطوات في 

البداية بنضيف كل المكونات الجافة  ( الملح /السكر/ الخميرة/

الحليب البودر) للدقيق ونخلطهم مع بعض بعد كده نضيف كمية 

الزيت والزبادي ونخلط كويس وبعد كده نبدأ نضيف المياه بالتدريج 

المياه لازم تكون دافئة يعني بنسخن لتر ماء على النار بس منغير 

ما يوصل لدرجة الغليان يعني نقدر نحط إيدنا فيه من غير منحترق  

ونضيف المياه بالتدريج لخليط العجين لحد ما العجينة تبقى متماسكة 

وتبدأ تطرى وتبقى قطعة واحدة انا هنا احتجت لتر إلاربع من الميه 

بس كل نوع دقيق بيختلف عن الأخر .

بعد ما عجنا العجينة كويس هنغطيها ونسبها حوالي ربع لنصف 

ساعة تخمر بعد ماتخمر ويتضاعف حجمها بنبدأ اننا نقسمها كور 

متساوية ونحطهم فى صينية ونمسحها مسحة بسيطة بالزيت أو 

نضيف رشة من الدقيق بطريقة متساوية على الصينية علشان كور 

العجين متلزقش في الصينية بعد كده بنغطيهم بفوطة أو قطعة قطنية 

علشان العجين ما ينشفش بعد كده في صينية الخبز بنمسحها بشوية 

زيت ونبدأ نفرد بالإيد كل كورة على حدى بعد مانخلص فرد الكمية 

اللي هتاخدها الصينية نبدأ نوزع الفلفل أو المحمرة على العجين 

بالتساوي ونسخن الفرن بفترة قبل ماندخل الصينية بعد كده بنخبز 

المعجنات في درجة حرارة 200 ونحط الصينية على الرف في 

                       منتصف الفرن ، وبألف هنا .

تابعوا الفيديو ده علشان الطريقة توضح ليكم أكتر 

أسهل طريقة لشوي البطاطا الحلوة

 أسهل طريقة لشوي البطاطا الحلوة

البطاطا الحلوة من ألذ الأكلات الشعبية في مصر ومن ضمن 

الأكلات المميزة وبنحب نتناولها في فصل الشتاء لإنها بتمدنا 

بالإحساس بالدفء وبيبقى ليها ذكريات جميلة مع لمة العيلة وأكلها 

سواء في البيت أو على عربية البطاطا في الشارع ويسلام لو على 

كورنيش النيل تبقى أحلى وأحلى ، المشكلة اللي بتواجهني شخصياً 

في شوي البطاطا اني لو شويتها بالطريقة التقليدية في الفرن على 

الصاج أو الشبكة في نهاية الشوي بلاقي الفرن اتبهدل جداً وبيبقى 

صعب التنظيف ده غير اني لازم اكون قريبة من الفرن علشان كل 

شوية اقلب البطاطا علشان متتحرقش بس لقيت طريقة جميلة جداً 

حلتلي المشكلة دي كلها وهي اننا نشوي البطاطا في الأكياس 

الحرارية لما عرفت الطريقة دي  قلت لازم اجربها 

وفعلا كانت تجربة جميلة ولذيذة جداً بس قبل ماأتكلم عن الطريقة 

خلونى نعرف مع بعض فوائد البطاطا

فوائد البطاطا الحلوة:

- شَحن الجسم بالطاقة، ولأن البطاطا الحُلوة بتحتوي على 

الكربوهيدرات والتي تعتبر من أهم مصادر الطاقة للجسم.

- الإكثار من تناولها يُحارب النحافة الزائدة ويؤدي إلى زيادة الوزن بشكلٍ ملحوظ.

- تعزيز صحة القلب وضبط مُستويات ضغط الدم.

- تحتوي البطاطا الحُلوة على البوتاسيوم، وتقوم بمعادلة مستويات 

السوائل في الجسم.

- تنظم مُستويات ضغط الدم.

- صحة الجهاز الهضمي، تحتوي البطاطا الحلوة على كمية من 

الألياف التي تساعد في  عملية الهضم والانتهاء والتخلص من 

أعراض الإسهال والإمساك.

- يفيد في الوقاية من سرطان الفم وسرطان الرئة.

- البطاطا الحلوة للجمال، تفيد البطاطا الحلوة للوقاية من التجاعيد 

المُبَكرة وإضفاء إشراق ونعومة على البشرة.

- تحتوي على مضادات الأكسدة (البيتا كاروتين) كما وتحافظ على 

النَظَر من المشاكل والعيوب الصحية.

- تساعد في الوقاية من أمراض الجهاز التنفسي.

فوائد البطاطا الحلوة للأطفال:

- تعزز صحة ونمو العينين .

- تحسن من عملية الهضم .

- تساعد في التطور الصحي لأعضاء الطفل .

- تقوي الجهاز المناعي .

- حماية الطفل من الإصابة بفقر الدم الناتج عن نقص الحديد.

- تقوية عظام الطفل وحمايتها.

- تساعد في زيادة وزن الطفل بالشكل الصحي.

بعد ما عرفنا الفوائد دي كلها للبطاطا أكيد لازم نخليها من الروتين 

الأساسي في أكلنا ، كل اللي هنحتاجه لشوي البطاطا أكياس 

حرارية خاصة بالأفران وصينية للفرن وطبعاً البطاطااللي 

بيكون لونها أحمر من الداخل بتبقى أحلى وأطعم وكمان فيها 

سكر طبيعي ، كل اللي هنعمله هنغسل البطاطا كويس وممكن 

نغسلها بفرشة الخضروات وعلشان تسهل عليكم الغسيل ممكن 

تنقعوها في المياه شوية وبعد كده تكملوا غسلها ،هنوزع البطاطا في 

الأكياس الحرارية ونقفلها كويس بالرباط البلاستيك 

الخاص بيها وده بيجي مع الأكياس وبنكون مسخنين الفرن على 

درجة حرارة 200 درجة وبعد كده بنحط أكياس البطاطا في صينية 

الفرن بدون زيت لان الأكياس دي مبتلزقش وهي صحية جداً 

هندخل الصينية للفرن وممكن تحطوها على الشبكة وتنزلوها لتحت 

شوية علشان الصينية تبقى اقرب للحرارة وبس بعد ما تتشوي 

وتستوي كويس استمتعوا بأكل البطاطا بأحلى طعم وأقل  

مجهود وفوائد عظيمة .

أتمنى تجربوها وبألف هنا .

وده فيديو لطريقة شوي البطاطا في الأكياس الحرارية .

شنطة كروشيه بغزة الباف المائلة

 شنطة كروشيه بغزة الباف المائلة

شنط الكروشيه من الحاجات الجميلة جداً اللي ممكن نتعلمها و نتقنها بسهولة أهم حاجة 

يكون عندنا صبرو طولة بال وطبعاً لما بنكون بنتعلم 

حاجة إحنا بنحبها اكيد النتيجة هتكون على قد حبنا للحاجة دي ، موضوع النهاردة هنتعلم 

فيه إزاي نعمل شنطة جميلة جدا وشيك ممكن 

نستخدمها في السهرات أو حتى مع لبس فورمال  (formal) 

 أتمنى تعجبكم وتستفيدوا من الموضوع 

هتبقى جميلة جداً .

الأدوات اللي هنحتجها هي :- 

- بكرة خيط كليم 900 جرام .

- إبرة كروشيه مقاس 7ملي .

 - إبرة تنظيف تكون فتحتها عريضة علشان خيط الكليم عريض .

- قماش بطانة حرير أو قطن زي ما تحبوا .

- متر علشان نقيس بيه طول وعرض الشنطة ونعرف مقاس البطانة اللي هنحتجها .

- اكسسوارات الشنط زي 2 حلقة معدن وسلسلة للشنطة .

- قفل خاص بالشنط .

الغرز المستخدمة :-  

- غرزة سلسلة .

-غرزة حشو .

- غرزة الباف المائلة .

- الغرزة المنزلقة .

 هتشوفوا الطريقة بالتفصيل في الفيديو التالي  

الجزء الأول

الجزء الثاني