بندانة كروشيه من المخمل ( Twist Headband )+ طريقة التحويل من الإنش ( البوصة ) الى السنتيمتر والعكس

 بندانة جميلة وسهلة  جداً لشتاء دافئ 

 

 

بندانة الشعر من الحاجات المميزة اللي ممكن نعملها بالكروشيه بغرز مختلفة بتدي شكل حلو جداً في اللبس و بما إننا دخلنا في فصل الشتاء حبيت أشارك معاكم بندانة كروشيه بغرزة سهلة وبسيطة جداً بس هتديكم في النهاية شكل جميل وكمان تدفئة لمنطقة الرأس والأذن و مريحة في اللبس .

الأدوات اللي هنحتجها :- 

- خيط مخمل .

 نوع الخيط اللي استخدمته (Himalaya Dolphin Baby) 

الخيط ده حجمه 100 جرام لكن البندانة احتاجت مني حوالي 63 جرام من حجم شلة الخيط .

- إبرة كروشيه مقاس 4mm .

- متر لقياس حجم البندانة .

- وطبعاً مقص وإبرة تنظيف .

صورة لشلة الخيط المستخدمة 

الغرز المستخدمة :- 

- غرزة السلسلة .

- الغرزة المزدوجة ( double crochet ) .

في البداية هنحتاج نعمل عدد من غرزة السلسلة بحيث يكون عرض البندانة حوالي 5 انش / بوصة = 12.5 سنتيميتر أنا هنا عملت حوالي 20 غرزة سلسلة علشان تديني العرض المناسب ليه وهو 5 انش وممكن عدد السلاسل يختلف حسب مقاس الخيط والإبرة المستخدمة وكمان حسب مقاس الرأس لو طفلة صغيرة أكيد هتختلف هيكون المقاس أصغر ، 5 انش مناسب للكبار .

 بالنسبة لخيط المخمل هو خيط جميل جداً وناعم وخفيف في اللبس وبيدفي جداً بس هو محتاج حرص في الأستخدام وانتوا بتشتغلوا بيه ، ولو حسيتوا انكم هتتلخبطوا في حساب عدد الغرز لأن نوع الخيط ممكن يخلي الغرز مش واضحة اوي في البداية لو واجهتكم المشكلة دي ممكن تستخدموا العداد الخاص بالكروشيه أو السبحةالإلكترونية 

جدول لقياس محيط الرأس بالسنتيمتر حسب المرحلة العمرية 

طريقة التحويل من الإنش الى السنتيمتر 

البوصة أو الإنش الواحد يعادل 2.54 سنتيمتر

1 بوصة  أو انش = 2.54 سم

في حالة التحويل من انش الى سنتيمتر ، قم بالضرب في 2.54

القيمة بالسنتيمتر = قيمة الانش × 2.54

مثال :-

9 انش كم سم

الحل:-

القيمة بالسنتيمتر = 9 انش × 2.54

= 22.86‬ سم

 

أما في الحالة العكسية ..

اي التحويل من سم الى انش ، قم بالقسمة على 2.54

القيمة بالانش = القيمة بالسم ÷ 2.54

مثال :-

قم بتحويل 20 سم الى انش

القيمة بالانش = 20 سم ÷ 2.54

= تقريباً 7.87 انش

طريقة عمل البندانة هتكون واضحة لِكم من خلال الفيديو التالي مشاهدة ممتعة وأتمنى الفيديو ينال إعجابكم 

  

طريقة المكرونة النجرسكو

 طريقة عمل النجرسكو 

المكرونة أو الباستا خاصة  الإيطالية من أشهى الأطباق اللي الكبار والصغيرين بيحبوها جدا وبتبقى حاضرة في العزومات والمناسبات المختلفة ،حبيت اشارك معاكم طريقة المكرونة النجرسكو بمكونتها الغنية وطعمها اللذيذ والمميز أتمنى الطريقة تنال اعجابكم .

المقادير والمكونات :-

- 800 جرام من المكرونة الشريط العريضة .

( وممكن لو النوع ده مش متوفرنستخدم المكرونة الإسباجتي أو مكرونة القلم لكن في الأساس هي بتتعمل بالمكرونة الشريط العريضة  )

-  ماء لسلق المكرونة .

- معلقة كبيرة ملح لسلق المكرونة .

- زيت ذرة .

طريقة تحضير المكرونة :- 

نغلي ماء على النار ونضيف ليه شوية من الزيت والملح بعد ما الماء يغلي نضيف المكرونة علشان تتسلق ونحركها كويس علشان تفك من بعضها ومتلزقش في بعض هنسبها على النار لحد ما توصل لدرجة التسوية المطلوبة وهنا المكرونة لازم تكون نصف تسوية علشان لسه هتدخل الفرن بعد كده هنصفيها من الماء ونتأكد أنها اتصفت كويس بعد كده هنسبها في الحلة ونغطيها علشان تفضل محتفظة بحرارتها لانها لو بردت النشا اللي في المكرونة هيخليها تمسك في بعضها وهيبقى صعب تفكيكها بعد كده .

مقادير ومكونات الخلطة اللي هنضفها للمكرونة :-

- نصف كيلو من أوراك الدجاج المخلية نقطعها لشرائح متوسطة      الحجم .

- 2حبة بصل متوسطة مقطعة لشرائح (أجنحة ) .

- 2 معلقة كبيرة ثوم مفروم .

- فلفل رومي ألوان مقطع مكعبات أو شرائح .

- 200 جرام من المشروم ( فطر ) .

- زيتون مخلي اسود أو أخضر حسب الرغبة .

- ملح /مكعب مرق دجاج  / نصف معلقة صغيرة من الفلفل الأسود.

- زيت ذرة .

طريقة التحضير :- 

على النار هنضيف شوية زيت ونضيف البصل ونقلب  لحد ما البصل يذبل شوية وتبدأ ريحته تظهر بس منغير ما يحمر بعد كده

هنضيف الثوم ونقلبهم شوية بعد كده نضيف قطع الدجاج والفلفل الأسود والمشروم ونقلب ومن فترة لأخرى هنقلب الدجاج لحد ما نحس أنها نشفت ودخلت في التسوية بعد كده نضيف الملح والفلفل الألوان ونقلب المكونات مع بعض كويس بعد كده لما نتأكد أن الدجاج إكتمل تسويته هنرفع المكونات من على النار ونضيف الزيتون للخليط ونقلبهم مع بعض وده لإن الزيتون طعمه بيتغير وبيدي مرارة للأكل لو أتعرض فترة للنار هنسيب الخليط ده على جنب لحد ما نعمل صوص البشاميل .

مقادير ومكونات صوص البشاميل :-

- 5 معالق كبار من الدقيق الأبيض .

- 5 مكعبات من الزبدة .

- زيت ذرة .

- 2 ونصف لتر حليب .

- 5 معالق كبار من القشطة أو علبة صغيرة من كريمة الطبخ .

- ملح / ربع معلقة صغيرة من الفلفل الأبيض أو اسود حسب            المتوفر .

- هنحتاج جبنة موتزاريلا وشيدر حسب الرغبة وممكن تضيفوا         بدل الشيدرأي نوع تحبوه .

طريقة التحضير :- 

هنضيف الزيت والزبدة على النار ونضيف الدقيق ونقلبهم مع بعض كويس هنفضل نقلب لحد ما الدقيق يتغير لونه ويبقى قريب من لون الطحينة بعد كده هنضيف الحليب ونقلب واحنا بنضيف الحليب علشان الدقيق ميكلكعش ويذوب بشكل أسرع قوام البشاميل في النجرسكو بيكون خفيف غير عن المكرونة بالبشاميل العادية بيكون قوام البشاميل اتخن بعد كده هنضيف الملح والفلفل ونسيب الصوص يغلي شوية على النار بعد كده هنضيف القشطة أو الكريمة ونقلبهم كويس ونرفعها من على النار  .

( صوص البشاميل يفضل استخدامه بعد رفعه من على النار لأنه لما بيبرد قوامه بيكون أثقل واتخن ويبقى صعب توزيعه )

طريقة تجهيز الصينية :- 

هنضيف لخليلط الدجاج شوية من الأجبان المتوفرة ونضيف كمية صغيرة من صوص البشاميل للخليط ونقلبهم مع بعض ونضيفهم للمكرونة المسلوقة ونقلبهم كويس علشان المكونات تندمج كويس مع بعض بعد كده هنضيف شوية من صوص البشاميل في صينية الفرن

ونضيف عليها المكرونة اللي خلطناها مع الدجاج وبعد كده نصب باقي كمية صوص البشاميل بحيث أنها تغطي وجه المكرونة بأكمله ونوزع الجبنة على وجه الصينية وندخلها الفرن ولازم يكون الفرن سخن قبل دخول الصينية ويكون على درجة حرارة 200 

ندخل الصينية على شبكة الفرن وتكون في منتصف الفرن .

( استخدمت في الوصفة دي صينية بايركس مقاس 41×29 وواحدة تانية مقاس 39×27 لأن الكمية كانت كبيرة على صينية واحدة وكمان علشان سمك وارتفاع المكرونة ميكونش عالي اوي )

وبألف هنا ...

شوفوا الفيديو علشان تعرفوا الطريقة بشكل أوضح 😊

فطائر الفلفل ( بالهريسة )

 فطائر الفلفل ( بالهريسة )

المعجنات عالم كبير وواسع نقدر نبتكر فيه طرق لخلطات وحشوات وأشكال كتير جداً في الموضوع ده حبيت أقدم طريقة فطائر لذيذة جداً فطائر هريسة الفلفل أو إخوانا في بلاد الشام بيقولوا عليها محمرة أتمنى الطريقة دي تعجب كل اللي يشوفها وتجربوها                                              بإذن الله  .

مقادير المحمرة :-

- 2 حبة بصل كبار مفرومين ناعم .

- زيت ذرة أو زيت زيتون وانا بحب استخدم النوعين مع بعض في     الوصفة دي .

- 3 ملاعق كبيرة من هريسة الفلفل .

   رابط طريقة عمل هريسة الفلفل

https://lolista93.blogspot.com/2020/09/blog-post_20.html

- 3 ملاعق كبيرة من الكاتشب .

- ملح الكمية حسب الرغبة .

- ملعقة كبيرة من البابريكا .

- سمسم محمرالكمية حسب الرغبة .

طريقة التحضير :-

في البداية بنسوي البصل المفروم مع كمية مناسبة من زيت الذرة

ونقلب البصل لحد ما يذبل شوية بس من غير مايحمر أو ياخد لون 

وبعد كده بنضيف كمية من زيت الزيتون والهريسة وطبعاً الكمية 

ممكن تتحكموا فيها بس خلوا بالكم لو الهريسة فيها شطة حارة فهنا 

لازم تاخدوا بالكم من الكمية اللي هتضيفوها للمحمرةعلشان متبقاش حارة زيادة 

عن اللزوم ، بعد كده هنقلب الهريسة كويس مع البصل ونضيف كمية الملح 

المناسبة ونضيف الكاتشب والبابريكا ونقلب المكونات مع بعض 

كويس ( الكاتشب هنا بديل للطماطم لأن في الطريقة الأساسية بيضاف طماطم للمحمرة لكن أنا حبيت أجربها بالكاتشب كبديل للطماطم ) وفي الحقيقة الكاتشب أضاف 

ليها طعم ورائحة جميلة جداً وبيضيف طعم مسكر للآكل ، هتفضل 

المكونات على النار لحد ما نحس إنها نشفت ومفيش فيها أي سوائل 

بعد كده بنرفعها من على النار ونسبها تهدى وتبرد لحد وقت 

الإستخدام وممكن نحفظها في الفريزر في علبة مخصصة لحفظ 

                    الطعام ونستخدمها في أي وقت .

مقادير عجينة الفطائر :- 

- 2 كيلو دقيق جميع الإستخدامات .

- معلقة واحدة كبيرة من الخميرة الفورية .

- معلقة كبيرة من السكر .

- 3 معالق كبار من الحليب البودر .

- معلقة كبيرة من السكر .

- رشة بسيطة من الملح .

- 2 علبة زبادي صغيرة الحجم .

- كوب إلا ربع من زيت الذرة .

- لتر إلا ربع من الماء الدافئ .

طريقة تحضير الفطائر :-

في العجان الكهربائي أو بالعجن يدوياً بنقوم بنفس الخطوات في 

البداية بنضيف كل المكونات الجافة  ( الملح /السكر/ الخميرة/

الحليب البودر) للدقيق ونخلطهم مع بعض بعد كده نضيف كمية 

الزيت والزبادي ونخلط كويس وبعد كده نبدأ نضيف المياه بالتدريج 

المياه لازم تكون دافئة يعني بنسخن لتر ماء على النار بس منغير 

ما يوصل لدرجة الغليان يعني نقدر نحط إيدنا فيه من غير منحترق  

ونضيف المياه بالتدريج لخليط العجين لحد ما العجينة تبقى متماسكة 

وتبدأ تطرى وتبقى قطعة واحدة انا هنا احتجت لتر إلاربع من الميه 

بس كل نوع دقيق بيختلف عن الأخر .

بعد ما عجنا العجينة كويس هنغطيها ونسبها حوالي ربع لنصف 

ساعة تخمر بعد ماتخمر ويتضاعف حجمها بنبدأ اننا نقسمها كور 

متساوية ونحطهم فى صينية ونمسحها مسحة بسيطة بالزيت أو 

نضيف رشة من الدقيق بطريقة متساوية على الصينية علشان كور 

العجين متلزقش في الصينية بعد كده بنغطيهم بفوطة أو قطعة قطنية 

علشان العجين ما ينشفش بعد كده في صينية الخبز بنمسحها بشوية 

زيت ونبدأ نفرد بالإيد كل كورة على حدى بعد مانخلص فرد الكمية 

اللي هتاخدها الصينية نبدأ نوزع الفلفل أو المحمرة على العجين 

بالتساوي ونسخن الفرن بفترة قبل ماندخل الصينية بعد كده بنخبز 

المعجنات في درجة حرارة 200 ونحط الصينية على الرف في 

                       منتصف الفرن ، وبألف هنا .

تابعوا الفيديو ده علشان الطريقة توضح ليكم أكتر 

أسهل طريقة لشوي البطاطا الحلوة

 أسهل طريقة لشوي البطاطا الحلوة

البطاطا الحلوة من ألذ الأكلات الشعبية في مصر ومن ضمن 

الأكلات المميزة وبنحب نتناولها في فصل الشتاء لإنها بتمدنا 

بالإحساس بالدفء وبيبقى ليها ذكريات جميلة مع لمة العيلة وأكلها 

سواء في البيت أو على عربية البطاطا في الشارع ويسلام لو على 

كورنيش النيل تبقى أحلى وأحلى ، المشكلة اللي بتواجهني شخصياً 

في شوي البطاطا اني لو شويتها بالطريقة التقليدية في الفرن على 

الصاج أو الشبكة في نهاية الشوي بلاقي الفرن اتبهدل جداً وبيبقى 

صعب التنظيف ده غير اني لازم اكون قريبة من الفرن علشان كل 

شوية اقلب البطاطا علشان متتحرقش بس لقيت طريقة جميلة جداً 

حلتلي المشكلة دي كلها وهي اننا نشوي البطاطا في الأكياس 

الحرارية لما عرفت الطريقة دي  قلت لازم اجربها 

وفعلا كانت تجربة جميلة ولذيذة جداً بس قبل ماأتكلم عن الطريقة 

خلونى نعرف مع بعض فوائد البطاطا

فوائد البطاطا الحلوة:

- شَحن الجسم بالطاقة، ولأن البطاطا الحُلوة بتحتوي على 

الكربوهيدرات والتي تعتبر من أهم مصادر الطاقة للجسم.

- الإكثار من تناولها يُحارب النحافة الزائدة ويؤدي إلى زيادة الوزن بشكلٍ ملحوظ.

- تعزيز صحة القلب وضبط مُستويات ضغط الدم.

- تحتوي البطاطا الحُلوة على البوتاسيوم، وتقوم بمعادلة مستويات 

السوائل في الجسم.

- تنظم مُستويات ضغط الدم.

- صحة الجهاز الهضمي، تحتوي البطاطا الحلوة على كمية من 

الألياف التي تساعد في  عملية الهضم والانتهاء والتخلص من 

أعراض الإسهال والإمساك.

- يفيد في الوقاية من سرطان الفم وسرطان الرئة.

- البطاطا الحلوة للجمال، تفيد البطاطا الحلوة للوقاية من التجاعيد 

المُبَكرة وإضفاء إشراق ونعومة على البشرة.

- تحتوي على مضادات الأكسدة (البيتا كاروتين) كما وتحافظ على 

النَظَر من المشاكل والعيوب الصحية.

- تساعد في الوقاية من أمراض الجهاز التنفسي.

فوائد البطاطا الحلوة للأطفال:

- تعزز صحة ونمو العينين .

- تحسن من عملية الهضم .

- تساعد في التطور الصحي لأعضاء الطفل .

- تقوي الجهاز المناعي .

- حماية الطفل من الإصابة بفقر الدم الناتج عن نقص الحديد.

- تقوية عظام الطفل وحمايتها.

- تساعد في زيادة وزن الطفل بالشكل الصحي.

بعد ما عرفنا الفوائد دي كلها للبطاطا أكيد لازم نخليها من الروتين 

الأساسي في أكلنا ، كل اللي هنحتاجه لشوي البطاطا أكياس 

حرارية خاصة بالأفران وصينية للفرن وطبعاً البطاطااللي 

بيكون لونها أحمر من الداخل بتبقى أحلى وأطعم وكمان فيها 

سكر طبيعي ، كل اللي هنعمله هنغسل البطاطا كويس وممكن 

نغسلها بفرشة الخضروات وعلشان تسهل عليكم الغسيل ممكن 

تنقعوها في المياه شوية وبعد كده تكملوا غسلها ،هنوزع البطاطا في 

الأكياس الحرارية ونقفلها كويس بالرباط البلاستيك 

الخاص بيها وده بيجي مع الأكياس وبنكون مسخنين الفرن على 

درجة حرارة 200 درجة وبعد كده بنحط أكياس البطاطا في صينية 

الفرن بدون زيت لان الأكياس دي مبتلزقش وهي صحية جداً 

هندخل الصينية للفرن وممكن تحطوها على الشبكة وتنزلوها لتحت 

شوية علشان الصينية تبقى اقرب للحرارة وبس بعد ما تتشوي 

وتستوي كويس استمتعوا بأكل البطاطا بأحلى طعم وأقل  

مجهود وفوائد عظيمة .

أتمنى تجربوها وبألف هنا .

وده فيديو لطريقة شوي البطاطا في الأكياس الحرارية .

شنطة كروشيه بغزة الباف المائلة

 شنطة كروشيه بغزة الباف المائلة

شنط الكروشيه من الحاجات الجميلة جداً اللي ممكن نتعلمها و نتقنها بسهولة أهم حاجة 

يكون عندنا صبرو طولة بال وطبعاً لما بنكون بنتعلم 

حاجة إحنا بنحبها اكيد النتيجة هتكون على قد حبنا للحاجة دي ، موضوع النهاردة هنتعلم 

فيه إزاي نعمل شنطة جميلة جدا وشيك ممكن 

نستخدمها في السهرات أو حتى مع لبس فورمال  (formal) 

 أتمنى تعجبكم وتستفيدوا من الموضوع 

هتبقى جميلة جداً .

الأدوات اللي هنحتجها هي :- 

- بكرة خيط كليم 900 جرام .

- إبرة كروشيه مقاس 7ملي .

 - إبرة تنظيف تكون فتحتها عريضة علشان خيط الكليم عريض .

- قماش بطانة حرير أو قطن زي ما تحبوا .

- متر علشان نقيس بيه طول وعرض الشنطة ونعرف مقاس البطانة اللي هنحتجها .

- اكسسوارات الشنط زي 2 حلقة معدن وسلسلة للشنطة .

- قفل خاص بالشنط .

الغرز المستخدمة :-  

- غرزة سلسلة .

-غرزة حشو .

- غرزة الباف المائلة .

- الغرزة المنزلقة .

 هتشوفوا الطريقة بالتفصيل في الفيديو التالي  

الجزء الأول

الجزء الثاني

طريقة عمل الهريسة بالشطة

 طريقة عمل الهريسة بالشطة 

الهريسة بتدخل في آكلات كتير زي خلطة المحشي والتتبيلات بأنواعها وكمان ممكن نعمل منها مناقيش الفلفل اللذيذة تقدروا تعملوا منها كمية وتحفظوها في الفريزر هتفضل لشهور وممكن سنة من غير ماتتآثر .

المقادير والمكونات :-

- كيلو من الفلفل الرومي الأحمر . 

- كيلو من فلفل الشطة الأحمر .

- معلقة طعام كبيرة ونصف من السكر .

- معلقتين طعام كبيرة من الملح .

طريقة التحضير :- 

بعد ما نغسل الفلفل والشطة كويس ونشفهم نبدأ نقطع الفلفل الرومي بالطول علشان نطلع 

منه البذر وبعد كده بنقطعه لقطع متوسطة الحجم والشطة كمان نبدأ نقطع الجزء الأخضر 

اللي فيها ونشيل منها البذر وممكن نعمل ده بواسطة المقوار العادي بتاع المحشي الطريقة 

موضحة في الفيديو في نهاية الموضوع هنقطع الشطة بردوا ونخلطها مع الفلفل الرومي ( 

لازم تلبسوا جوانتي  لأن الشطة بتحرق الإيد جداً ممكن تلبسوا كيس نايلون زي كيس 

السندوتشات لو الجوانتي مش متوفر ولو حسيتوا بحرقان ممكن بعد كده تبقوا تدهنوا 

ايديكوا بزيت الآكل العادي او تحطوا ايديكوا في الدقيق ده هيخفف الحرقان جداً ) وبعد ما 

قطعنا الفلفل والشطة نخلطهم مع بعض و  نفرمهم كويس في الكبة وبعدين نحط الخليط 

المفروم في طاسة أو حلة على النار وتكون درجة النار متوسطة علشان لو حطناه على 

درجة حرارة منخفضة هيفضل يسرد الميه اللي في الفلفل وهياخد وقت على ما الفلفل 

يستوى والميه اللي فيه تنشف علشان كده من الأفضل اننا نعلي النار وتكون متوسطة 

هنفضل نقلب الخليط من وقت للتاني لحد منحس ان مية الفلفل بدأت تقل وبدأ الفلفل ينشف 

بعد كده هنضيف السكر والملح ونقلبه كويس والملح هنا مهم يكون طعمه ظاهر  في الفلفل 

بس ميبقاش لدرجة الحدقان بس وهنسبها على النار تكمل التسوية لحد ما الخليط ينشف 

تماماً من المية ويستوي كويس هتلاقوا لونها أحمر جميل من غير إضافة بابريكا ولا 

حاجة هتفضل محافظة على لونها الجميل وكمان طعمها رائع أهم حاجة الفلفل وانتوا 

بتشتروه سواء الرومي أو الشطة لازم يكون لونهم أحمر داكن ويكونوا طازة ومنشلهمش 

في التلاجة بعد الشراء لأ لازم نعمل الوصفة على طول علشان الفلفل ميدبلش ويطرى في 

     التلاجة كده هيديكوا نفس النتيجة اللي هتشوفوها في الفيديو وبإذن الله تعجبكم .

وبألف هنا ...

مخلل الزيتون بأسهل وأحلى طريقة

 مخلل الزيتون بأسهل وأحلى طريقة

الزيتون من المخللات اللي معظمنا بيفضلها جمب الأكل لأنها بتدي طعم لذيذ مع الأكل وكمان تعتبر فاتح للشهية وتفتح النفس للأكل بس طبعاً منكلش منه كتير ونشرب سوائل كتير بالأخص الميه علشان  ميحصلش زيادة في معدل الأملاح بالجسم .

المكونات والمقادير :- 

- 3 كيلو من الزيتون الأخضر النوع اللي استخدمته هنا نوع اسمه زيتون تفاحي .

- كيلو من الليمون الأصفر متوسط الحجم .

- نصف كيلو من الفلفل الأخضر البارد + ربع من الفلفل الأحمر الحار .

- ملح .

- زيت ذرة أو زيت زيتون .

- حوالي 4-5 لتر من الميه المغلية ونخليها تبرد تماماً قبل منستخدمها .

- بيضة علشان نختبر بيها معدل  الملح .

طريقة التحضير :- 

أولاً :- 

بنغسل الزيتون كويس وننقعه في ميه من يوم ليومين وبعد كده نصفيه ونبدأ نعمل خط بالطول بالسكينة في الزتونة من الجنبين علشان محلول الميه والملح يدخل في قلب الزيتون ويساعد في التخليل بشكل سليم .

ثانياً :-

نقطع الليمون لأربع أجزاء وبنستخدمه زي ماهو بدون منعصره او نفرمه ونقص العنقود الأخضر بتاع الفلفل علشان ميأخذش حيز في البطرمان ونعمل فتحة أو خط صغير بالسكينة في الفلفل من دون ميتقطع بيفضل سليم بنفس الحجم وده علشان محلول الميه يدخل في قلبه وميسببش تعفن للفلفل وباقي المخلل بعد كده بنخلط الزيتون والليمون والفلفل مع بعض في طبق بلاستيك غويط .

ثالثاً :- 

بعد منغلي الميه وده زيادة للتعقيم وعلشان تحافظ أكتر على المخلل بنسبها تبرد تماماً وبعد كده بنضيف الملح للميه حوالي 600 جرام من الملح ونقلبه كويس في الميه وبعد كده نجيب البيضة نغسلها ونحطها زي ماهيا في الميه لو طلعت وظهرت على سطح الميه يبقى كده الملح مظبوط ولو البيضة غطست لتحت يبقى الميه محتاجة ملح أكتر وهكذا ودي أسهل طريقة علشان نظبط الملح في الميه .

رابعاً :- 

هنجيب المخلل اللي خلطناه ونبدأ نعبيه في البطرمانات وبعد كده نضيف الزيت حوالي كوب الا ربع حسب حجم البطرمان وبعد كده نضيف الميه للبطرمان ولازم كمية الميه تغطي المخلل بالكامل وممكن نحط الزيت على السطح بعد منضيف الميه بعد كده نبدأ نغطس المخلل بمعلقة علشان الميه تكون اعلى منه علشان لو ارتفع عن الميه ممكن يدخلو هوا ويسببله تعفن بعد منغطسه كويس نجيب كيس نايلون زي كيس الساندوتشات ونتنيه على قد فتحة البطرمان ونغطي بيه سطح المخلل علشان يمنع الهواء من الدخول ونجيب كيس تاني ونفرده على فوهة البطرمان علشان تغطيها ونقفل بعد كده بغطى البطرمان عليها والطريقة هتكون واضحة اكتر في الفيديو .

وبألف هنا...