جسم الإنسان بيحتاج للدهون زي ما بيحتاج للكربوهيدرات والبروتين والفيتامينات والمعادن لأن كل حاجة منهم ليها فائدة وأهمية كبيرة للجسم بس طبعا مع الإعتدال في تناولها لإن كل شئ زاد عن حده بيتحول لضرر وبيسبب مشاكل للجسم فمحتاجين نستخدم العناصر الغذائية بإعتدال علشان نستفيد من وظيفتها وفوائدها الصحية لأجسامنا ، زمان كانوا بيخوفوا الناس من السمنة والزبدة الطبيعية وأنا هنا قصدي على الطبيعية المصنوعة من حليب الأبقار أو الجاموس من دون إضافة أي زيوت سواء كانت مهدرجة أو غير مهدرجة وكانوا بيقنعوا الناس أن الدهون الطبيعية دي بتسبب تصلب شرايين وأمراض القلب والسمنة والكلام ده عاري تماما من الصحة والحقيقة إن الإعتماد على الزيوت بشكل أكبر هو اللي بيسبب التهابات داخلية في الجسم وتصلب الشرايين وغيرها ، والدليل أن أجدادنا اتربوا وكبروا على تناول الزبدة والسمنة أكثر من الزيوت وكانت صحتهم أفضل وده لإن حياتهم كانت مليئة بالحركة والمهام اللي يقدروا يحرقوا فيها الدهون ومتتراكمش داخل الجسم بس طبعا لو حد منهم كان بيتناول دهون أكثر من إحتياج جسمه فبالتالي أكيد هتصيبه الأمراض اللي بتسببها زيادة الدهون في الجسم ، وبعد سنين طويلة من اللغط اللي كان حاصل بين الناس عن استخدام الزيوت ولا الزبدة والسمنة الطبيعية أخيرا منظمة الصحة والغذاء العالمية رجعت في كلامها عن الهرم الغذائي القديم واعترفت انه كان سبب لأمراض زي داء السكري والسمنة وغيرهم بسبب اعتماد الهرم على الكربوهيدرات والنشويات أكثر من البروتينات وكمان كلامهم عن الدهون الطبيعية اتغير وأصبح دلوقتي الاتجاه الأمثل في الغذاء أننا نعتمد على الزبدة والسمن الطبيعين .
اتأكدوا عند شراء الزبدة من السوبرماركت أنها تكون مصنوعة من حليب طبيعي وخلوها من الزيوت حتى لو كانت غير مهدرجة ولو هتشتروها من سيدات بيقوموا بصناعتها بأنفسهم اشتروا كمية بسيطة في الأول تجربوها وتتأكدوا أنها مصنوعة بشكل جيد وتقدروا ساعتها تعتمدوها عند الطلب مرة أخرى .
علامات تبين اذا كانت الزبدة جيدة أم لا ، أولا لازم تكون نظيفة مفيش فيها شوائب يعني لونها لون الحليب المصنوعة منه لو حليب جاموس فهي هتكون بيضاء لو حليب بقري هتبقى صفراء ميكونش عليها شوائب سواء قش أو غيره لأن ده دليل على عدم نظافة المكان اللي بتتصنع فيه ، كمان عند تذويبها على النار بيكون ليها رائحة غير مقبولة وقوية ده بيكون سببه ناتج عن أن البقرة أو الجاموسةأكلهم غير جيد وضعيف وده بينعكس على طعم ورائحة اللبن والزبدة ، كمان من العلامات المهمة أن الزبدة جيدة أنها عند ذوبانها متفقدش كتير من وزنها يعني لو ذوبنا كيلو زبدة ينقص منها ربع الكمية او ثلثه فقط أكثر من كده فهو معناه أن الزبدة مصنوعة بغير احترافية ونسبة السوائل فيها عالية وممكن تكون بتحتوي على الماء مش لبن (حليب ) فقط .
طريقة تحويل الزبدة إلى سمنة تجدوها في الفيديو شرح صوت وصورة ⬇
زيارتي لأكبر متحف بالعالم بيضم حضارة واحدة من أعظم حضارات العالم
( الحضارة المصرية القديمة ) إحساس كبير بالفخر أن في بلدي متاحف بتضم حضارتنا وتاريخنا وثقافتنا وتراثنا المصري ، مش محتاجين نسرق أثار أو نعمل متاحف بتتكلم عن حضارات أخرى لا تنتسب للبلد اللي بتضم المتحف نفسه لأنهم مش أصحابه لكننا كمصريين أصحاب حضارة وتاريخ عظيم العالم كله بيتمنى يزور بلدنا ويشوف ويسمع ويتعلم من حضارتنا ، حتى إحساس الفخر ده السائحين بيحسوا بيه وبيكونوا سعداء جدا وهما واقفين أمام أثارنا وبيسمعوا قصص أصحابها أصحاب الحضارة المصرية ، وده اللي أنا شوفته ولاحظته لما زرت المتحف المصري الكبير متحف جميل جدا كتصميم وتنفيذ المبنى بشكل يليق بحضارتنا وأثارنا العريقة كانت تجربة مميزة جدا ورائعة وإحساس الفخر زاد من أول وصولي ووقوفي عند بوابات دخول المتحف وشوفت الزحام اللي موجود في توابير لناس من مختلف أنحاء العالم وبسمع أكثر من لغة لدول وجنسيات مختلفة جمعهم حب الحضارة المصرية وجمعهم المتحف علشان يشبع حبهم وشغفهم بالحضارة المصرية ، المتحف مناسب لزيارة جميع أفراد الأسرة كبار وصغار شباب / مسنين أو ذوي الإحتياجات الخاصة لأن تصميم المتحف وبنائه بيراعي جميع الأعمار والإحتياجات مكان منظم / نظيف وفسحة ثقافية ممتعة وذكريات لا تنسى لما تزوروا المتحف وتقضوا يوم فيه مع أحبابكم من الأسرة أو الأصدقاء ، المتحف لا تكفيه زيارة واحدة هو محتاج أكثر من زيارة علشان تقدروا تستمتعوا وتتعرفوا على كل الأثار اللي في المتحف علشان كده لو انتوا مش مقيمين في مصر ومش هتقدروا تزوروا المتحف غير مرة واحدة فالأفضل أنكم تذهبوا للمتحف من الصبح بدري علشان تقضوا فيه أكبر وقت ممكن وتستمتعوا بيه براحتكم وتشوفوا أغلب الأثار في قاعات المتحف على قد ما تقدروا ، والمتحف بيه منطقة مخصصة للمطاعم والكافيهات وكمان حنفيات مياه مفلترة في أماكن كثيرة ومختلفة في المتحف علشان تملوا زجاجات المياه اللي معاكم وتشربوا براحتكم كمان دورات المياه نظيفة ومرتبة حتى في أوقات الزحام .
معلومات عن المتحف
تبلغ مساحة المتحف 490 ألف متر مربع ، ويضم عدد من قاعات العرض والتي تعتبر الواحدة منها أكبر من العديد من المتاحف الحالية بمصر والعالم ، ويعد المتحف أحد أهم إنجازات مصر الحديثة ، يحتوي المتحف على أكثر من 750 ألف قطعة أثرية ، فهو يغطي الحقبة من 700 ألف سنة قبل الميلاد حتى سنة 349 ميلادية .
المدخل الرئيسي
تبلغ مساحة المدخل الرئيسي حوالي 7 ألاف متر مربع ويتوسطه تمثال الملك رمسيس الثاني ، تمثال من الجرانيت الوردي طوله 11.3 متر ووزنه 83 طن .
المسلة المعلقة
هي مسلة الملك رمسيس الثاني مصنوعة من الجرانيت الوردي وزنها 110 طن واكتشفت في منطقة صان الحجر بمحافظة الشرقية وتحمل خرطوش الملك رمسيس الثاني المنقوش أسفل المسلة .
الدرج العظيم
تصطف على جانبيه تماثيل شامخة لملوك مصر ، بارتفاع يصل إلى 6 طوابق في مشهد مهيب يجسد فخامة التصميم وضخامة البناء .
قاعة الملك توت عنخ أمون
على مساحة حوالي 7.5 الف متر مربع وتضم أكثر من 5 ألاف قطعة من كنوز الملك مجتمعة لأول مرة .
قاعات العرض
يحتوي المتحف على 12 قاعة عرض رئيسية على مساحة حوالي 18 ألف متر مربع ، يضم المتحف بين جنباته أماكن خاصة بالأنشطة الثقافية والفعاليات مثل متحف الطفل على مساحة حوالي 5000 متر مربع ومركز تعليمي وسينما ومركز للمؤتمرات ، وكذلك العديد من المناطق التجارية والتي تشمل محال تجارية كافيتريات ومطاعم بالإضافة إلى الحدائق .
وصفة الأرز اللي بقدمها هي وصفة لذيذة وسهلة جدا ومناسبة مع أكلات كتير ممكن تتقدم جنبها وتنفع كمان في العزومات ، أنا بحب أعمل الوصفة دي مع صينية فراخ ( دجاج ) مشوية بالفرن تقدروا تشوفوا طريقتها من خلال اللينك ⬇ولما أحب أعملها في عزومة بعمل معاها طبخة بسلة بالجزر واللحمة بتبقى لذيذة جدا أو ممكن مع صينية بطاطس وفراخ أو لحمة زي ما تحبوا وطبعا لو حابين تعملوا مشويات فقط ويكون معاه طبق أرز مميز فالوصفة دي مناسبة جدا ، أتمنى تعجبكم .
- زعفران يمكن استخدام شعيرات الزعفران أو الزعفران البودر .
- ماء مغلي ( كل كوب من الأرز البسمتي يحتاج إلى كوب ونصف من الماء وقد يحتاج أقل حسب نوع الأرز)
- مكعب مرق دجاج .
- ملح .
- ثلاث أوراق غار + ثلاث أعواد من القرنفل + عود من القرفة
- ربع ملعقة صغيرة من الفلفل الأسود .
- نصف ملعقة صغيرة من الحبهان ( الهيل المطحون ) / كاري / بهارات مجبوس .
طريقة التحضير :-
بعد غسل الأرز جيدا في فنجان صغير نضع أقل من ربع الفنجان ماء مغلي ونضيف له الزعفران ونقلبه جيدا ونتكره حتى يلون الماء ثم في وعاء الطهي نضع كمية مناسبة من السمن ثم نضع القرنفل والقرفة وورق الغار ونقلبهم من الحين والآخر حتى تظهر رائحة البهارات النار تكون متوسطة لكي لا تنحرق البهارات ثم ثم نضع الأرز ونقلبه جيدا من الحين والآخر حتى ينشف ماء غسل الأرز منه ثم نضع مكعب المرق وباقي البهارات المطحونة والملح ونقلب قليلا حتى يمتزج البهار مع الأرز جيدا ثم نضع قليلا من السمن عليه ونقلبه لكي يجعله لامعا عند التقديم وأكثر طراوة ثم نضيف الماء المغلي المناسبة لتسوية الأرز وبعد الغليان نخفض النار تماما حى يستوي الأرز بعد أن يشرب الأرز الماء تماما نرش ماء الزعفران على الأرز ولا نقلب فورا ننتظر حتى يمتص الأرز ماء الزعفران ثم نقلب الأرز بشوكة ومن الأطراف فقط لكي لا يختلط الزعفران بالأرز كله لاننا نريد أن يبقى جزء أبيض وجزء أصفر نتركه لدقائق بعد التقليب ثم يكون جاهزا للتقديم ، بألف هنا .
الفراخ المشوية من الوصفات المحببة للكثيرين ومن الأكلات السهلة وممكن تتعمل بطرق مختلفة بس الطريقة اللي هتقرؤوها دلوقتي تعتبر من الطرق الصحية اللذيذة جدا وفي نفس الوقت مبتحتجش مجهود ولا وقت كبير ، آن شاء الله تعجبكم .
المكونات والمقادير :-
- قطع دجاج ( استخدمت في هذه الوصفة دجاجة مقطعة لأربع قطع بالعظم ).
- بصلة واحدة كبيرة الحجم مقطعة لشرائح .
- ثمرتين من الطماطم متوسطة الحجم .
- 6 فصوص ثوم مقطع لشرائح .
- ملح .
- نصف ملعقة صغيرة من الفلفل أسود .
- ملعقة صغيرة ممسوحة من كمون / زعتر جاف / بهارات الدجاج / ورق غار بودر .
- زيت ذرة .
طريقة التحضير :-
نضع البصل مع الطماطم والثوم في وعاء عميق للتبيلة ثم نضع البهارات والملح ونقلبهم جيدا ونتركهم لمدة نصف ساعة سيتكون صوص بسيط بسبب ترك الخضار مع التتبيلة ثم نضع عليهم قطع الدجاج ونقلبهم جيدا ونتأكد من أن التتبيلة توزعت على الدجاج وداخل الجلد جيدا ثم نتركهم مجددا في الثلاجة تركهم يوم كامل أو ساعة إلى ساعتين قبل التسوية يعطي نكهة أفضل وأقوى لقطع الدجاج ، نقوم بتسخين الفرن ثم في صينية الشوي نبدأ بوضع الخضار المقطع أولا في الصينية ونوزعه ثم نضع قطع الدجاج فوقه والصوص السائل نضع عليه قليلا من الزيت ونقلبه ثم نوزعه على قطع الدجاج من ناحية الجلد تكون ناحية الجلد لفوق والعظم لأسفل ونغطي الصينية وندخلها الفرن على الرف الأوسط بعد أن يستوي الدجاج ننزع غطاء الصينية ونشعل شواية الفرن لتحمير قطع الدجاج ، هكذا يكون الدجاج جاهزا للأكل مع صوص لذيذ ونتيجة رائعة لشوي الدجاج بالفرن .
المانجا من الفواكه الصيفية الرائعة واللذيذة جدا ومحبينها كثر وخاصة المانجا المصرية من ألذ وأجود أنواع المانجا عالميا في مصر عندنا حوالي 18 نوع من المانجا منها العويس والفص والزبدية والنعومي والفنس والسكري وغيرهم عندنا في البيت احنا من محبي المانجا النعومي هي حلوة جدا في كل حاجة مذاقها ورائحتها وحتى شكلها والمميز فيها كمان أنها مش من أنواع المانجا اللي بيكون فيها شعيرات صغيرة بتدايق في الأكل والشرب فالنعومي خالية من الشعيرات دي فبتكون سهلة وسلسة في أكلها وكمان مبنحتجش نصفيها لما نعملها عصير و بتبقى لذيذة جدا ، جربنا طرق مختلفة منها أننا نفرزها وهي معصورة بس يكون قوامها تخين ونخففها لما نطلعها من الفريزر وجربنا نفرزها مقطعة بس بعد أكثر من تجربة اكتشفنا أن أفضل حاجة لتفريز المانجا أننا نشيلها سليمة بقشرها من غير عصر ولا تقطيع وده الأفضل من وجهة نظري ، كل اللي بعمله أن بغسل المانجا كويس جدا وممكن انقعها 3 ل 5 دقائق فقط في ماء وخل وبعد كده اشطفها كويس من الخل و نسبها في مصفى تتصفى من الماء بعد كده بنشفها وابدأ اوزعها في أكياس حفظ الطعام حسب الكمية والحجم يعني أنا بختار كل ثمرتين من المانجا يكونوا متوسطي الحجم بضعهم مع بعض في كيس وكل ثمرة حجمها كبير بخليها في كيس لوحدها ، لما أحتاج اعمل عصير بطلع كيس المانجا واخليه لمدة بسيطة في حرارة الغرفة لحد ما ألاحظ انه بدأ يفك من الثلج وأقدر اني أقدر المانجا هي هتكون لسه باردة بس علشان أسهل مسكها بحاول ادخل شوكة الطعام في جزء منها والمانجا تكون موضوعة في طبق وامسك الشوكة اللي دخلتها في المانجا بإيد واليد الثانية بمبشرة الخضرورات اللي بتتمسك باليد ونقشر بيها المانجا زي السكينة وده علشان المانجا بتكون باردة فصعب نمسكها باليد ونقشرها الطريقة اللي ذكرتها بتكون أفضل ، اللي خلاني أفضل طريقة تخزين المانجا بقشرها هو أن المانجا طعمها مش هيتغير ولا هتلقط ريحة الأكل أو الثلج بسبب التفريز لأن حتى الثلج نفسه أحيانا بيغير طعم الأكل بس الطريقة دي بتحافظ على طعم المانجا من السنة للسنة وكمان بتحافظ على العناصر الغذائية الموجودة في المانجا لأنها اتحفظت سليمة بدون تقطيع ولا عصر ، أتمنى أن الطريقة دي تعجبكم وتجربوها وتكون مفيدة لكم .
اتعودنا في البيت عندنا نفرز الملوخية بعد ما نفرمها ونضيف ليها شوية مرقة و نقلبهم كويس ، كنا متعودين على الطريقة دي لحد ما جربنا طريقة مختلفة وهي أننا نحفظ الملوخية وهي ورق طبعا الأول بعد تقطيف أوراق الملوخية بنغسلها كويس ونصفيها من الماء على قد ما نقدر وبعدين على قطعة قماش قطن نوزع أوراق الملوخية على قطعة القماش بالتساوي ونسيبها لحد ما تنشف من الماء لو في مروحة بنوجها على الملوخية علشان تنشف بشكل أسرع بعد كده في أكياس الثلاجة نوزع الملوخية حسب الطبخة كل كيس فيه كمية مناسبة من الملوخية على قد الطبخة طبعا الكمية بتختلف من بيت لأخر حسب أفراد الأسرة ، واحنا بنعبي الملوخية في الأكياس لازم تفضل مفرودة مبنجمعش الأوراق على بعض لأ بنخلي الورق مفرود على طول الكيس ونسيب أقل من ربع الكيس فاضي بعد كده نطبق الكيس زي الورقة واحنا بنطبق الكيس نضغط عليه كويس علشان نخرج الهواء من الكيس ونكمل تطبيق الكيس ونكمل بنفس الطريقة مع باقي أوراق الملوخية بعد كده نجمع الأكياس ونحفظهم في كيس أو مجموعة أكياس حسب المساحة المتوفرة في الفريزر لتخزين الملوخية ، الطريقة دي بسيطة بس بتفرق في طعم الملوخية بعد ما نطبخها بتكون ألذ ، عند الطبخ بنطلع كيس الملوخية قبل الطهي مباشرة ونفرم الملوخية ولازم يكون في مرقة سخنة علشان بعد فرم الملوخية نضيفها للمرقة على طول ونكمل طبخ الملوخية بالطريقة المعتادة ، الطريقة دي في تفريز الملوخية حلوة جدا وبتدي نكهة جميلة للملوخية وبيفضل لونها أخضر كأنها فريش مش مخزنة في الفريز جربوها آن شاء الله تعجبكم ، شوفوا الفيديو علشان تعرفوا الطريقة بشكل أوضح ⬇
التيراميسو من الحلويات اللذيذة والمميزة في فصل الصيف مزيج جميل ما بينالقهوة والكاكاو والكريمة والبسكويت وصفة جميلة وسهلة ، بما انها وصفة إيطالية في بعض المكونات ممكن نجدها بصعوبة أو لا نجدها إطلاقا في السوبر ماركت علشان كده حبيت أجربها بالبدائل المتوفرة اللي أقدر اجدها بسهولة ، في الجزء الخاص بمكونات الوصفة هذكر المكونات الأساسية وبجانبها البديل الخاص بيها .
-المكونات والمقادير :-
- قهوة اسبريسو أو أي نوع جيد من القهوة سريعة التحضير .
- كوب جبنة ماسكربون البديل أي نوع جبنة كريمي جيد أو علبة زبادي يوناني .
- بسكويت ليدي فنجر البديل ممكن نستخدم أي نوع بسكوت سادة بدون نكهات بس يكون سميك شوية .
- كاكاو بودر للتزيين .
- كوب من كريمة خفق .
- ملعقتين كبار من السكر .
- ربع ملعقة صغيرة من الفانيليا .
- كوب ماء دافئ لتذويب القهوة .
- طريقة التحضير :-
في البداية نذيب القهوة في المياه الدافئة مذاق القهوة يفضل أن يكون قويا حتى يضيف طعم واضح للوصفة ، ثم نبدأ بعمل طبقة الكريمة نقوم بخفق الكريم شانتيه البودر مع الحليب البارد أو نخفقه بماء بارد كمية السائل سواء حليب أو ماء يفضل أن تكون أقل قليلا عن الكمية المكتوبة على ظرف الكريم شانتيه لكي يكون القوام أثقل الكمية التي تكون مذكورة على ظرف كريمة الخفق تجعله خفيف قليلا ، نخفق الكريمة جيدا حتى يصبح القوام ثقيل ومتماسك ثم نضيف السكر والجبنة والفانيليا الى الكريمة المخفوقة ونخفقهم جميعا بشكل جيد حتى يصبح القوام ثقيلا نضعها في الثلاجة من ساعة إلى ساعتين لتكون متماسكة أكثر ثم في كاسات التقديم أو صينية حسب الرغبة في طريقة التقديم نبدأ في رص طبقة من البسكويت ثم بملعقة نأخذ قليل من القهوة ونوزعها على البسكوت أو يمكننا أن نغطس البسكوت في مشروب القهوة ثم نضعه في وعاء التقديم اذا كان قوام البسكوت يتحمل ذلك ولا ينكسر بسهولة ، بعد رص طبقة البسكوت نقوم بوضع طبقة الكريمة ثم نضع طبقة أخرى من البسكوت المسقي بالقهوة يمكنكم تكرار الطبقات حسب الرغبة ثم بعد أخر طبقة للبسكوت نقوم برش الكاكاو ويفضل أن يكون الكاكاو مستساغ الطعم وليس مر لكي يحافظ على طعم حلو المذاق للوصفة . وبألف هنا.
لعبة صيد السمك من الألعاب الجميلة للأطفال فوق 3 سنوات ، من فترة كنت ببحث عن هدية لطفل عمره 4 سنوات كنت محتارة بين ألعاب كثير كنت حابة أجيب لعبة يقدر يلعب بيها لوحده أو مع كذا طفل أو حتى أخواته الأكبر منه وفي نفس الوقت ممكن يتعلم منها حاجة وتكون مسلية وممتعة يفصل بيها عن الشاشات خاصة الموبايل لأنه أصبح مشكلة العصر مع الأطفال ، لما لقيت لعبة صيد السمك افتكرت نفسي وأنا صغيرة كان عندي وحدة زيها كنت بحب ألعب بيها جدا المهم تحمست وطلبتها اللعبة كان فيها شوية تغيرات عن لعبتي وأنا صغيرة الجديدة كانت أكبر وفيها أحواض مقسمة بألوان مختلفة علشان لو أكثر من طفل بيلعبوا مع بعض وبيتنافسوا كل واحد يجمع أسماكه في الحوض الخاص بيه وكمان الصنارات اللي مع اللعبة كلها من البلاستيك بتعتي وأنا صغيرة كانت الصنارة اليد بلاستيك لكن خيط الصيد عبارة عن خيط وده كان سهل القطع بس الجديدة الصنارة كلها من البلاستيك ، حبيت في اللعبة أنها بتعلم الصبر وروح التنافس وكمان الطفل ممكن يتدرب على العد من خلال عد السمك اللي اصطاده وكمان يتعلم يميز بين الألوان ، مشكلتها الوحيدة أن فيها موسيقى أنا شايفة أن ملهاش لازمة بس ممكن نخفض صوتها لو لزقنا عليها قطعة كرتون صغيرة وكمان الصنارة في البداية بيكون صعب الاصطياد بيها بس مع المحاولة بيبدأ الموضوع يبقى أسهل ، هي متوفرة في أماكن بيع لعب الأطفال أو المكتبات أحيانا بيكون في قسم للألعاب في المكتبات ممكن يكون موجود فيها لكن أنا اشتريتها من جوميا مصر . لتفاصيل أكثر ممكن تشوفوا الفيديو ⬇
كاتبة ، استشاري الصحة النفسية والعلاقات الإنسانية والإجتماعية وتطوير الذات ، حاصلة على درجة الدكتوراه في العلاج السلوكي المعرفي من جامعة بوسطن .
نبذة عن الكتاب :-
هذا الكتاب هو دليل عملي رائع لكل من يبحث عن إعادة اكتشاف نفسه وكل من يسعى للراحة والسكينة ، كتاب مهم للشباب والمتزوجين والطلاب وربات البيوت وأصحاب الأعمال ولمحبي الإستجمام والباحثين عن الراحة والهدوء .
رأي الشخصي :-
أنهيت قرأة كتاب قهوة صباحية مع النفس من فترة قريبة هو من الكتب التي يمكن قرائتها على فترات اذا أنهيت جزء يمكنك التمعن والتركيز على جميع النصائح المذكورة فيه والإجابة على الأسئلة التي تحتويه أو حل التمارين والإجابة عليها والخروج من الجزء الذي قرأته مع كامل الإستفادة ومحاولة تطبيق كل النصائح التي جاءت فيه هكذا أضمن لكم الإستفادة الكبيرة التي ستشعرون بها مع قراءة كل جزء من هذا الكتاب لذلك إن كانت قراءة كل جزء من الكتاب بهذه الطريقة وبتلك الخطوات التي ذكرتها ستشعركم بالتباطئ أو التأخر في الإنتهاء من قراءة الكتاب فهذه ليست مشكلة على الإطلاق فالكاتبة ذكرت في الكتاب أنه يمكن للقارئ قراءة الكتاب بداية من الجزء الذي يفضله أو يشعر أنه بحاجة الى البدء به فلا يهم قراءة الكتاب بالترتيب الأهم هو الإستفادة القصوى من تقسيمات الكتاب المميزة ولا يهم الوقت المستغرق في قراءة الكتاب بل الأهم هو مدى الإستفادة منه ، قرائتي لهذا الكتاب جعلتني أشعر وكأني مع مدرب يوجهني ويعلمني كيف أتعرف على نفسي أكثر وأتعرف على شخصيتي و تفكيري وكيف أحسن منهم وهذا بفضل طريقة الكاتب للكتاب بشكل مبسط وواضح وسرد الأمثلة لأشخاص كثر والتحدث عن تجاربهم الحياتية وما خاضوه من صعاب وأزمات وكيف تغلبوا عليها وغيرت فيهم للأفضل وجعلت من تجاربهم قصص ملهمة للأخرين ، من خلاصة كل جزء قرأته شعرت أنه أصبح من الأسهل التعرف على نفسي وترتيب أفكاري والتغلب على المعوقات و المخاوف التي قد تتغلب على رغباتنا في تحقيق أهدافنا وكيف نسيطر عليها بعد معرفة الطريقة يبقى التطبيق العملي التي ذكرت الكاتبة طريقته أيضا وهنا يبقى التنفيذ علينا بعد قرائتنا للكتاب .
الكتاب مقسم إلى رشفات لأن الكاتبة ذكرت أنها تفضل قراءته مع فنجان قهوة أو أي مشروب ساخن نفضله ومع كل رشفة تكون بداية للتعلم والإدراك بما يدور في داخلنا من أفكار ومشاكل وأحلام ومعوقات ومخاوف وغيرهم ....
شاي الكرك من المشروبات المميزة والأساسية في الهند وإنتقل لدول الخليج وأصبح هناك كافيهات وكافتيريات خاصة لمشروب الكرك والجباتي ( خبز هندي وبيتعمل بيه ساندويتشات زي الكيما ودي عبارة عن بازيلاء ( بسلة ) مطبوخة بالطريقة الهندية ) في مصر بنحب جدا نشرب الشاي بلبن ( حليب ) مع البقسماط أو بسكويت / كعك بس أنا بحب الشاي يكون ليه نكهة معاه يعني ميبقاش شاي سادة لأ بحب يكون فيه نكهة زي الهيل / النعناع / قرنفل فبالنسبة لي شاي الكرك مناسب جدا لذوقي في شرب الشاي لأن بيضاف ليه الهيل ومبيأثرش طعمه على الحليب يعني الثلاث مكونات الحليب / الشاي / الهيل ميكس حلو جدا وطعمهم لائق مع بعض .
المكونات والمقادير :-
- ملعقة صغيرة من الشاي .
- 2 كوب حليب سائل .
- سكر الكمية حسب الرغبة.
- نصف ملعقة صغيرة هيل .
طريقة التحضير :-
الطريقة دي أنا جربتها وهي المفضلة عندي في وصفات أخرى بيستخدموا فيها الماء لعمل الشاي وبعد كده بيضيفوا الحليب البودر أو الحليب المبخر لكن أنا بستخدم طريقة بحس أنها أفضل و ألذ ، أول حاجة في وعاء مناسب لغلي الحليب بضيف كمية الحليب مع السكر والهيل وبعد مايغلوا بضيف الشاي على الحليب مبستخدمش الماء ابدا وبعد إضافة الشاي بسيبه يغلي مرة واحدة فقط ، ده أفضل لعمل الشاي علشان الطعم والفائدة الأفضل ميغليش كثير على النار ، بعد كده برفع الكرك من على النار واتركه 3 - 5 دقائق فقط قبل ما أصفيه وبكده يكون جاهز للتقديم .
في وصفات أخرى بيضيفوا مجموعة من البهارات زي الجنزبيل والهيل والقرنفل والقرفة بس لما جربتها حسيت إن الطعم مش لائق مع مشروب شاي بالحليب حسيت اني بشرب شاي بطعم بهار الأرز البسمتي ففضلت أكثر الهيل فقط مع الشاي بالحليب .
فيديو فيه وصفة ساندويتشات شاورما بالرقاق الطري + طريقة شاي الكرك ⬇
في الشتاء من أكثر الأكلات اللي بنحب نعملها هي شوربة الخضروات ، لأنها كلها فوائد ومناسبة لأجواء الشتاء الباردة ومغذية ولذيذة في نفس الوقت ، في طرق مختلفة لهذه الشوربة زي مثلا في ناس بتحب تفرم الخضروات بعد ما تستوي وتضيف لها كريمة الطهي ، أحنا بنحب نعملها بطريقة بسيطة وسهلة هشاركها معكم في هذه التدوينة ، كمان تقدروا تضيفوا أنواع الخضروات اللي بتحبوها وتكون مناسبة مع بعضها أو تحذفوا نوع لو أنتم مش بتحبوه .
المكونات والمقادير :-
- نصف كيلو من الفاصوليا الخضراء .
- نصف كيلو من الكوسة .
- 5 حبات من البطاطس متوسطة الحجم .
- 3 حبات من الجزر .
- بصلة كبيرة مفرومة .
- 6 فصوص ثوم مفروم .
- بهارات ( كمون / فلفل أسود / ملح ) .
كمية البهار كسب كمية الخضروات أنا بوزع كل نوع بهار على الخضروات بالتساوي .
- مكعب مرق حسب الرغبة .
- مرق دجاج أو لحم لتسوية الشوربة .
أنا إستخدمت مرقة دجاج .
- زيت ذرة و 2 مكعب زبدة .
طريقة التحضير :-
بفرم الثوم والبصل وبعد غسل الخضروات جيدا بصفيها جيدا وأقطعها قطع متوسطة الحجم تشبه المكعب أو غيره المهم أن تكون القطع متوسطة الحجم بعد تقطيع الخضروات ادمجهم مع بعض كويس ثم في حلة الطهي اسخنها على النار وأضيف قليل من زيت الذرة ومكعبين من الزبدة ثم أضيف عليهم البصل والثوم وأقلب جيدا حتى يذبل البصل قليلا على النار ثم أضيف عليهم الخضروات وأقلبهم مع بعض جميعا وأضيف البهارات ومكعب المرق واتركهم على نار متوسطة لمدة عشر دقائق وأقلبهم من حين لأخر ، وأغلي المرق الذي سأستخدمه في تسوية الخضروات ، بعد العشر دقائق أخفض النار ثم أبدأ في إضافة المرق أضيف منه كمية كافية لتسوية الخضروات وزيادة لتكون الشوربة وفيرة بالمرق الذي يشرب ساخنا مع الخضروات ، ثم أعلي النار لكي تغلي المرق وأقوم بتذوقها لمعرفة احتياجها من الملح أظبط الملح ثم أخفض النار واتركها على النار حتى تستوي الخضروات ثم تقدم ساخنة بجانب طعام الغذاء أو الإكتفاء بها في وجبة العشاء كوجبة خفيفة مفيدة ولذيذة في نفس الوقت ، وبألف هنا.
من فترة في بداية الشتاء والدتي اتعرضت لدور برد شديد وفي الفترة دي الكبار والصغار بيعانوا من دور البرد وفي فيروسات متحورة من فيروس كورونا منتشرة من بداية الشتاء والأمر صعب ، لكن الحمد لله على كل حال ، في فترة مرض والدتي الدكتور كتبلها على الأدوية المناسبة وكمان طلب منها تعمل جلسات بخار علشان تفتح الشعب الهوائية لإن كان عندها بلغم في الصدر ونصحها تشرب مشروبات ساخنة على مدار اليوم علشان تهدي الكحة وتساعد في علاج الالتهابات ، احنا كل شتاء لما كان يجي لحد فينا دور برد وكحة نطلب علاج من الصيدلية لو الموضوع مش كبير ومفيش ارتفاع في درجة الحرارة فكنا أحيانا بنجيب علاج الكحة اسمه برونشكم وهو علاج معروف على مستوى العالم وبيتعمل من الزعتر ومواد أخرى بس المادة الغالبة في تركيبته هي الزعتر ، لما والدتي تعبت والدكتور طلب منها تشرب مشروبات ساخنة خطر على بالي مشروب الزعتر لأن علاج برونشكم مش مناسب لحالتها في المرة دي كانت محتاجة حاجة أقوى بس قولت الزعتر ليه فوائد كثيرة ومناسب في المساعدة على علاج الكحة بجانب الأدوية ولما سألت الدكتور قالي انه مفيد فعلا ، ووالدتي كانت بترتاح لما بتشربه أكثر من باقي المشروبات زي التيليو وورق الجوافة واليانسون كانت بترتاح أكثر مع الزعتر .
طريقة التحضير :-
في الوصفة دي أنا إستخدمت الزعتر الجاف اللي بنستخدمه في التتبيلات وبعض الأكلات ، كل اللي بعمله اني بغلي كوب من الماء وبعد الغليان بضع نصف ملعقة كبيرة من الزعتر ويغلي غلوة واحدة فقط ثم اطفئ النار وأغطيه واتركه مدة 3 ل 5 دقائق بعد كده أصفي المشروب من الزعتر علشان يسهل شربه وبس كده ، قبل ما تشربوا قولوا بسم الله الشافي وبإذن الله يكون فيه الشفاء مع أخذ الأدوية المناسبة طبعا .
لو حابين ممكن تحلوه بالسكر أو بالعسل الأبيض حسب الرغبة أنا بحب طعمه عادي من غير تحلية لا سكر ولا عسل وفعلا ريحته وطعمه حلوين جدا ريحة الزعتر بتبقى جميلة ومريحة فعلا لما تستنشقوه وهو سخن .
من كام سنة كنت مقيمة في إحدى الدول العربية أتولدت وعشت فيها فترة طويلة من حياتي وكنت بستخدم منتجات للعناية من المنتجات المستوردة بما إن ده المتاح في الدولة اللي كنت عايشة فيها ولما رجعت مصر طبعا وجدت فرق كبير في الأسعار وحسيت الأسعار مبالغ فيها في البداية كنت مستمرة على نفس المنتجات اللي كنت بستخدمها وكنت أظن أن مفيش بديل مصري للمنتجات دي وكان عندي عقدة الخواجة زي ما بنقول في مصر ولكن بعد فترة بدأت أسمع عن منتجات مصرية محلية الصنع وقولت لنفسي يعني أنا مصرية وعايشة في مصر وبلدي بتصنع المنتجات دي ليه متمسكة بالمستورد مع إن أنا عارفة أن المستورد مش دايما بيكون كويس وجودته عالية ومش كل الأنواع بتناسبني يعني المستورد فيه الحلو وفيه الوحش فأكيد المصري برده فيه الحلو وفيه الوحش ليه بقى مديش فرصة للصناعة المحلية وزي ما بجرب في أنواع المستورد المختلفة لحد ما الاقي اللي يناسبني أجرب برده في المصري ، والحمد لله أن ربنا هداني لهذه الفكرة لأن فعلا مع الوقت اكتشفت أن بلدي فيها ميزة التصنيع و إنتاج منتجات تنافس المستورد لو تم استغلالها من قبل شعبها منتجاتها هتبقى عالمية بإذن الله ، في حين إن في دول لا تستطيع فعل ذلك ومعندهاش بدائل محلية فبتعتمد على المستورد فقط ، كمان بعد الأحداث في غزة حسيت قد ايه قرار الإستغناء عن المنتجات الأجنبية كان من أفضل قرار أخذته وإني كنت صح وبقيت بشوف ايه المنتجات الأجنبية اللي لسه بعتمد عليها واستغني عنها بالمنتجات المصرية اللي مش بس بتصنع في مصر لأ هي كمان شركات مصرية مش شركات أصلها أجنبي ، في التدوينة دي هشارك معكم تجربتي مع بعض المنتجات اللي جربتها وفادتني .
غسول البشرة من ستارفيل مناسب للبشرة الدهنية أو المختلطة المعرضة لحب الشباب ، بيساعد على تنظيم إفراز الدهون وبينظف البشرة بعمق من الدهون والشوائب ، وكمان مضاد للبكتيريا المصاحبة لحب الشباب يعمل على تقشير البشرة بلطف مهدئ للبشرة من الالتهابات لمنع تكوين أثار الحبوب ، المميز كمان في المنتج ده انه مصنوع من مواد ومكونات طبية غير مضرة حتى مع الإستخدام المتكرر على المدى البعيد زي منتجات أخرى تجارية ممكن تكون أرخص بس بتحتوي على مكونات مضرة للبشرة والجسم مع الإستخدام على المدى البعيد ، فهو منتج متميز بمكوناته ونتائجه وكمان سعره مناسب ومعقول متوفر منه أحجام مختلفة وفي حجم مناسب للسفر ودي تعتبر ميزة أخرى ، من تجربتي الشخصية للمنتج أقدر أحكم عليه بإنه أكثر غسول جربته وناسبني إلى الأن أنا كانت مشكلتي مع الأنواع اللي كنت بستخدمها المستوردة انهم يا إما بيكونوا غير مناسبين لبشرتي بيسببوا لي حساسية أو المنتج يكون قوي ويسبب الجفاف يا إما المنتج سعره يزيد فجأة بشكل مبالغ وكمان يقل في السوق ويكون صعب شراءه ، بالنسبة لغسول ستارفيل حللي كل المشاكل اللي ذكرتها هو بينظف البشرة ويقشرها لاحتواءه على مادة السالسليك أسد وفي نفس الوقت بيرطب البشرة لاحتواءه على البانثينول المرطب اللي بيخلي البشرة ملمسها رطب بعد التنظيف وكأنها مترطبة ولكن ده لا يغني عن المرطب الخاص ببشرة الوجه لأن قلة الترحيب حتى مع البشرة الدهنية بتسبب الجفاف فلازم نستخدم كريم مرطب مناسب لنوع بشرتنا بعد التنظيف بالغسول ، بالنسبة لفعالية الغسول في تنظيف البشرة انا بلاحظ فرق في بشرتي بعد إستخدامه وكمان في تحكمه في إفراز الدهون فعلا كويس في النقطة دي وبيخفف من شكل الرؤوس السوداء والبيضاء لكن مش بيقضي عليها تماما ، وطبعا لازم الإستمرارية في استخدامه علشان النتيجة تكون مفيدة .
لو حابين تعرفوا مكونات المنتج أكثر ففي موقع للشركة بيكتبوا عليه وصف المنتج والمكونات ودي ميزة كمان مهمة وتقدروا تطلبوا المنتج ومنتجات أخرى كثير من خلال الموقع :-
هو منتج طبي فعال في إزالة المكياج أنا بستخدمه لهذا السبب فقط كمزيل للمكياج ، وبيزيل الكحل والايلاينر والمسكرا بسهولة وبينطف البشرة من المكياج بضمير أنااستخدمته مع المكياج long asting اللي بيدوم لفترة طويلة من الوقت وكان ممتاز بس مجربتش استخدمه مع المكياج المقاوم للماء مش عارفة هيكون بنفس الفعالية ولا لأ ، لم يسبب لي أي حساسية على البشرة لكن عند دخوله في العين بيسبب لي حرقة بسيطة في العين لو نقطة لمست بياض العين بالغلط لأني بستخدم قطن الأذن بضيف عليه قليل من الميسيلار وبمسح بيه الكحل والمسكرا فلو قطنة الأذن لمست بياض عيني بالغلط عيني بتحرقني منه بس بتروح على طول أعتقد غير مناسب للإستخدام اليومي للناس اللي عينيهم حساسة .
بوباي صن سكرين جل بمعامل حماية +50 :-
يوفر حماية عالية ضد الأثار الضارة للأشعة فوق البنفسجية UVA & UVB ، هو مناسب للبشرة الدهنية والمختلطة يحتوي على هيالورونات الصوديوم للترطيب مضاد للأكسدة بيحتوي على فيتامين E سريع الامتصاص لا يسبب مظهر دهني أو لمعان زائد على البشرة سهل التوزيع قوامه خفيف سريع الإنتصار ، مقاوم للمياه والتعرق مناسب للوجه واليد ، منتج ممتاز فعليا لا يسبب حبوب للبشرة مميزاته دي كلها وسعره معقول جدا مقارنة بأنواع أخرى مستوردة أو مصرية ، جميل جدا وناسب بشرتي وجربته في المصيف قبل كده وبضع منه حول العين والفم لأن العين مهم نستعمل لها واقي للشمس علشان نحافظ عليها من التصبغات والتجاعيد لكن ضروري نتجنب التعرض لأشعة الشمس المباشرة الصن سكرين بيحمي ولكن مش لوحده لازم نتجنب أشعة الشمس المباشرة والجلوس أو البقاء تحت أشعة الشمس لفترات طويلة .
شان مرطب للجسم Shaan body milk :-
مرطب للجسم والبشرة الجافة والحساسة ترطيبه جميل بس بيحتاج استخدام متكرر في اليوم بالذات على الأماكن شديدة الجفاف وحلو جدا لليدين بيخلي البشرة مترطبة لفترة طويلة لو متعرضتش للمياه كمان قوامه غير ثقيل على البشرة سهل الامتصاص لا يترك ملمس دهني مش بيلزق على عكس أنواع أخرى مكونات طبية خالي من البرابين ، وفي منه برائحة الفانيليا وفي برائحة الورد والعطور فيه بتكون طبيعية علشان متسببش حساسية وفقا لوصف المنتج من قبل الشركة المنتجة ، أنا إستخدمت النوع العادي الخالي من العطور كان ممتاز ومناسب كمان للإستخدام بعد الشيفنج لو كان خالي من العطور وللأماكن الحساسة زي منطقة البكيني .
- مرطب للشفاه من Infinity Naturals :-
بيحمي الشفاه من الجفاف والتشقق ترطيبه حلو مش ثقيل وفي نفس بيرطب حلو جدا من غير تلزيق ليه رائحة فراولة خفيفة بس من غير لون مكوناته أمنة للإستخدام ، استخدامه بشكل يومي بيدي نتيجة أفضل من الإستخدام المتقطع عبوته زجاج حجمها صغير جميلة وبسيطة وأنا بفضل الزجاج عن البلاستيك مشكلة العبوة فقط في الغطاء لو مسكت العبوة منه الغطاء أحيانا بيفلت والعبوة بتقع لم عرفت بقيت بمسكه من تحت من العبوة نفسها ، منتج حلو جدا أفضل من الفازيلين .
من أكثر الأكلات اللي بحبها هي صينية البطاطس بحب أعملها وبستمتع بطعمها اللذيذ ، طريقتها بسيطة وسهلة ، وفي نهاية التدوينة دي هتلاقوا فيديو عن الوصفة ⬇أتمنى تعجبكم .
المكونات والمقادير :-
- 6 حبات من البطاطس متوسطة الحجم .
- 2 حبتين من البصل متوسطة الحجم .
- 6 حبات من الطماطم متوسطة الحجم .
- 8 فصوص ثوم .
- 3 حبات صغار من الفلفل الرومي الأخضر ( يمكنكم استخدام الفلفل الألوان حسب الرغبة ) .
- زيت ذرة .
- ملعقة صغيرة ممسوحة من البهارات ( الفلفل الأسود / الكمون / بابريكا ) .
- ملعقة طعام كبيرة من معجون صلصة الطماطم .
- ملعقة صغيرة من السكر .
- مكعب مرق دجاج .
- ملح .
- قطع الدجاج ( قمنا بتقطيع الدجاجة إلى 5 أجزاء حسب حجم الدجاجة ووزنها ) .
طريقة التحضير :-
في البداية نقوم بتقطيع البطاطس لحلقات وكذلك البصل والطماطم والفلفل الرومي يمكن تقطيعها لحلقات دائرية أو تقطيعها لشرائح ( نأخذ حبتين فقط من الطماطم و باقي كمية الطماطم نقوم بعصرها ) لكن البطاطس يفضل أن تكون حلقات دائرية متوسطة الحجم لا تكون رفيعة فتستوي قبل الدجاج ولن تتحمل مدة التسوية ويجب أيضا مراعاة أن لا تكون حلقات البطاطس سميكة زيادة لكي تستوي في نفس مدة الدجاج ولا تحتاج لتسوية أكثر بعد استواء الدجاج ، بعد تقطيع الخضار نفرم الثوم ونضيفه إلى الخضار المقطع ونضع عليهم نصف كمية البهار من الكمون والبابريكا والفلفل الأسود ونقلبهم جيدا مع الخضار والثوم ، بعد ذلك نعصر الطماطم ونضيف عليها القليل من الماء وملعقة طعام كبيرة من معجون صلصة الطماطم و السكر والملح وباقي كمية البهار من الكمون والبابريكا والفلفل الأسود ومكعب المرق ( نفرم مكعب المرق بالسكين ليسهل توزيعه وذوبانه ) ثم نأخذ جزء من خليط عصير الطماطم ونضعه على البطاطس والخضار ونقلبهم جيدا ثم نحضر صينية الفرن أنا استخدمت صينية بايركس وضعت فيها الخضار ووزعته وتركت أماكن لقطع الدجاج ووزعتها على تلك الأماكن ، نأخذ كل قطعة من الدجاج ونغطسها في خليط الطماطم ثم نضعها في مكانها بالصينية الجزء المغطى بجلد الدجاج يكون اتجاهه للأعلى والعظم للأسفل ثم نوزع القليل من زيت الذرة على محتويات الصينية ثم نضيف عليها باقي عصير الطماطم ونوزعه على الخضار والدجاج بالتساوي الأن تكون الصينية جاهزة للتسوية في الفرن ، نغطيها بورق قصدير ويفضل وضع طبقة من ورق الزبدة تحت ورق القصدير عند تغطية الصينية قبل ادخالها للفرن لكي لا يتعرض الطعام للقصدير المضر بالصحة ، توضع على الرف الأسفل في الفرن على درجة حرارة عالية في البداية حتى تغلي ثم نخفض درجة الحرارة قليلا ، بعد أن يستوي الدجاج والبطاطس نزيل القصدير ونشعل شواية الفرن لنحمر قطع الدجاج ، ( يمكن ترك الصينية لفترة من الوقت حوالي نصف ساعة قبل إدخالها للفرن لتتشرب المكونات من بعضها البعض ) ، هكذا تكون الوصفة جاهزة للتقديم بألف هنا .
ملحوظة :-
( إذا استخدمتم صينية من البيركس لا تقوموا بتشغيل الفرن قبل وقت من إدخال الصينية لأن البيركس زجاج والزجاج إذا كان باردا ودخل الفرن وهو ساخن سوف ينكسر ، يتم تشغيل الفرن مباشرة قبل إدخال الصينية وليس قبلها بوقت ) .
في بداية مرحلتي الجامعية وأنا بدأت أفكر في ممارسة التمارين الرياضية وكان وقتها اليوتيوب ومواقع التواصل الإجتماعي لم تكن بالشهرة والأهمية الموجودة حاليا بإستثناء الفيسبوك ولكن لم يكن يحتوي على محتوى تعليمي للتمارين اللي في بالي في تلك الفترة كنت حابة أمارس تمارين لياقة بدنية وسمعت وقتها عن تمارين المقاومة اللي بتساعد في الحفاظ على لياقة ومرونة الجسم والعظام وأيضا بتقوي العضلات فكانت تلك التمارين هي المرغوبة بالنسبة لي وحبيت أبدأ أمارسها واللي شجعني وقتها لما كنت في أحد الهايبرماركت لقيت دمبلز ( أوزان / أثقال ) كانت بأحجام وأوزان مختلفة وسعرها كان معقول في ذلك الوقت فقررت أشتري اثنين بنفس الوزن وكان وزنهم مناسب لقدرتي على حمل أوزان ثقيلة بدأت بوزن خفيف في البداية لم أكن أعلم حينها آن تمارين المقاومة ممكن تتم بوزن الجسم فقط دون الحاجة لأوزان طبعا من خلال ممارسة تمارين بتكنيك مختلف عن التمارين بالأورزان ، وبدأت بالتمرين في المنزل وكانت الفيديوهات والمواضيع اللي بتتكلم عن هذا الموضوع قليلة على الإنترنت في تلك الفترة فحسيت بعد فترة بالملل بسبب تكرار نفس التمارين ولم أجد حينها محتوى أكثر تفصيلا عن ذلك النوع من التمارين ولكن ظل الموضوع في بالي لم أنساه وبعدها بعدة سنوات وجدت محتوى على اليوتيوب قناة إسمها سارة بوب فيت أو الإسم كما مكتوب على اليوتيوب Sara PopFit وكان محتواها عن تمارين المقاومة والكارديو والهيت وكلها تمارين بوزن الجسم دون الحاجة للأثقال وكمان بتتكلم عن التغذية المناسبة للناس اللي بتتمرن حسب هدفهم إذا كان التنحيف أو زيادة الوزن أو الحفاظ على الوزن كانت ومازالت بتعلم فيديوهات بشرح بسيط للسيدات اللي حابين يمارسوا التمارين الرياضية ويحققوا هدفهم على مستوى الصحة الجسدية بممارسة الرياضة والتغذية السليمة وكمان فيديوهاتها بتشجع البنات إنهم يبدؤوا تمرين من البيت بدون الحاجة للجيم أو أثقال أو معدات وأجهزة معقدة فالمحتوى ده شجعني أرجع أتمرن تاني لإن ده المحتوى اللي كنت محتجاه ، وعلى فكرة هي سيدة عربية سورية فمحتواها بالعربي ، وبعد فترة مع سارة بوب فيت قررت إني أخوض تجربة الجيم وأغير إسلوب التمارين وأجرب معدات الجيم وإني أستخدم أوزان أعلى علشان أبني عضلات لإن نسبتها كانت قليلة عندي وفعلا قدمت في جيم قريب من المنزل واشتركت لمدة عام علشان أضمن إني طالما دفعت الإشتراك يبقى هواظب على الذهاب للجيم بس الحقيقة اللي حصل إني واظبت في البداية كويس وفي النصف كان بيحصلي ظروف فكنت بكسل أروح وحسيت بفقدان الشغف بس في نفس الوقت أنا حبيت فكرة التمارين والرياضة و حبيت أستمر فيها ولكن من المنزل لأني حسيت إن التمرين في المنزل بالنسبة لي هيكون أفضل و هواظب أكثر على التمرين علشان كده قررت أكمل التمرين ورحلتي مع الرياضة بالطريقة اللي هتكون أكثر راحة ومناسبة لي واللي شجعني إن إكتشفت إن في منتجات بتحل محل الدمبلز تعتبر بديل ليه من حيث الوزن هي لا بتحتاج مكان للتخزين أو بتأخذ حيذ ولا بتكون ثقيلة في حملها زي الأثقال بس في نفس الوقت بتؤدي نفس الغرض لإنها مصنوعة من البلاستيك بس بيكون قوي ومتنوع في المتانة ويأخذ شكل الحزام بيكون زي حلقة متصلة وبيجي في مقاسات مختلفة ولكن المقاس من حيث المتانة كل حزام ليه لون وحسب اللون بتكون متانته وشدته أقوى من غيره المتانة بتكون في المادة المصنوع منها كل ما كانت أشد وأقوى كل ما زادت شدة مقومتها أثناء التمرين ، وكمان سعرهم أقل بكثير عن الدمبلز واللي شجعني على شرائهم إني شوفت أكونت على انستجرام
fitness_momness لمدربة أمريكية بتقدم فيديوهات بأدوات ومنتجات مختلفة أيا كان الأدوات المتاحة لكل شخص بنت أو سيدة هتلاقي فيديوهات عندها بالتمارين المناسبة لكل أداة أو منتج ، إشتريت مجموعة عبارة عن خمس أحزمة متصلة وفي منهم بيكون مفتوح وكل شكل ليه استخدامه ومميزاته لكن اللي اشترتهم كانوا من النوع المقفول بيجوا مجموعة من خمس ألوان كل لون ليه شدة مختلفة عن الأخر وبيبقى مكتوب على كل حزام مدى الشدة بتاعته وكمان النوع اللي اشتريته كان معاه ورقة فيها صور للتمارين اللي ممكن تتعمل بيهم وكمان فيها جدول بيشرح كل لون بيساوي قد ايه من الدمبل بوحدة القياس LBS وكمان بوحدة قياس الكيلو ، يعني عل سبيل المثال اللون الأخضربيساوي من 10 - 15 واللون الأزرق بيساوي من 15 -20LBS وهكذا وبيبدأوا من أخف شدة في المقاومة الى الأكثر شدة بالتدريج وكمان الأحزمة دي في منها نوع زي النسيج منسوج بطريقة ومن خامة أقوى من البلاستيك وده بيكون لتمارين الأرجل والجزء السفلي من الجسم والنوع ده بيكون أقوى وبيستحمل النوع ده من التمارين أكثر ، اشتريت منه مجموعة مكونة من ثلاث أحزمة كمان كل واحد ليه شدة مختلفة ، وأخر حاجة اشترتها هي mat الخاصة بالتمرين ودي كان سمكها 6 ملي ولقيتها مناسبة وكويسة في تأدية الغرض منها ، اللي حابة أوصله من خلال التدوينة دي إن ممارسة التمارين والمحافظة على صحة العظام والجسم بشكل عام هو أمر سهل وبسيط وحاليا ومن فترة طويلة والموضوع بيتطور وبيكون أبسط كمان فيديوهات المختصين في هذا المجال أصبحت كثيرة ومنتشرة في منها المجاني وفي منها اللي بيكون بمقابل مادي وكل واحد يقدر يتمرن بالطريقة المناسبة ليه حسب ظروفه والإمكانيات المتاحة ليه ، أتمنى أكون وصلت الفكرة بشكل سليم وواضح وهسيب روابط شراء المنتجات اللي ذكرتها في الأسفل 👇 للي حابب يطلع عليها أو يشتريها ، المنتجات اشتريتها من موقع جوميا مصر لأنه بديل لشركات المقاطعة مثل أمازون ونون لكن إذا لم يكن لديكم نفس الموقع في بلدكم أو لا يوجد توصيل منه لديكم فيمكنكم أخذ بيانات وصور المنتجات والبحث عنها في المواقع المتاحة لديكم أو البحث في المحال التجارية المتخصصة في بيع الأدوات الرياضية ، أيضا في الأسفل 👇 يوجد فيديو قمت بتصويره ورفعه على يوتيوب عن تلك المنتجات .
الأيس كريم من الحلويات المفضلة لدى الجميع معتقدش أن في حد ممكن يكون مبيحبش الأيس كريم أو ممكن يكون نسبة بسيطة من الناس ليها رأي تاني ، نكهات الأيس كريم التقليدية المفضلة عندي هي الفانيليا والشيكولاتة خاصة اللي بتكون مع stick فانيليا ومغطاة بالشيكولاتة والفراولة بس طبعا صناعة الأيس كريم مبقتش مقتصرة فقط على النكهات دي لأ أصبح في تطور عام بعد عام في النكهات وطريقة التقديم والتغليف وغيرهم ، وطبعا أغلب الشركات اللي كانت منتشرة في السوق المصري والعربي بشكل عام هي الشركات الأجنبية زي( نستلة / دولسي / ميجا / كيمو كونو / برادايس / كارنفاليتا / أوريو / سنيكرز / دايري ميلك / كولد ستون ) وكل الشركات السابق ذكرها حتى لو كانت بتصنع في دولنا العربية إلا أنها تظل شركات أجنبية أرباح مشترياتنا من تلك الشركات بتروح للشركة الأم وبالتالي الإقبال الكبير عليها بيخلي شركات كتير تقبل على شراء أسهم في تلك الشركات من أجل التربح خاصة أن كل الشركات السابق ذكرها مدرجة في سوق البورصة الأمريكية وبالتالي شركات زي شركات بلاك روك وفانجرد الداعمين للكيان الصهيوني بيكون ليهم نسبة من تلك الأرباح ومن بعد أحداث 7 أكتوبر 2023 أصبح في وعي أكثر عند الناس بأهمية مقاطعة أي منتج أجنبي بيكون من ضمن المالكين لأكبر نسبة في الأسهم الخاصة بهم زي شركات بلاك روك و فانجرد ودي مش رفاهية ده واجب وأقل شئ نعمله كبشر ، و طبعا ده مش مقتصر على الايس كريم والشيبس أكيد لأ المقاطعة بتشمل كل المجالات سواء في الأغذية والمشروبات والتجميل والملابس الأحذية الشنط ملابس الرياضة الإكسسوارات وغيرهم .... طالما في بدائل تبقى المقاطعة واجب علينا وحتى المنتجات لو ملهاش بديل ونقدر نستغني عنها لأنها مش أساسية أو فيها حياتنا وممتنا يبقى الأفضل نستغني عنها .
من الأيس كريم اللي جربته بعد المقاطعة وعجبني جدا هو أيس كريم Wonderville في نكهات حبيتها جدا زي :-
- أيس كريم الفانيليا مع قمع البسكويت ( cone ) طعمه كان لذيذ جدا والكمية كبيرة يعني الأيس كريم موجود لحد أخر قطعة في البسكوت بجد تحسوا بشبع وانتوا بتكلوه وأخر جزء من طرف البسكوت محطوط عليها صوص شيكولاتة ، كمان في من نفس لاين البسكوت نكهات تانية بس أنا جربت فقط الفانيليا وغزل البنات ( cotton candy ) غزل البنات كمان كان حلو بس سكره زيادة وأنا مبحبش الحلويات يكون فيها سكر زيادة عن اللزوم علشان كده حبيت أكثر اللي بالفانيليا.
- جربت كمان أيس كريم زبادي بالتوت مغطى بالشيكولاتة البيضاء مع استيك ( stick ) الخشب الشيكولاتة البيضاء طعمها كان حلو بس الأيس كريم نفسه من جوه كان طعمه فيه مزازة يعني علشان بالزبادي وكده بس ده محبتهوش يمكن لو المزازة أخف شوية كنت حبيته أكثر ، كمان كان فيه قطع كده بطعم التوت على الشيكولاتة والأيس كريم بس مشكلتي في المزازة اللي في الطعم .
- كمان جربت أيس كريم بنكهة الفراولة كان في عبوة بلاستيك صغيرة دي كانت حلوة جدا عجبني الطعم والعبوة نفسها الألوان وكل حاجة فيها كانت حلوة هما عموما التغليف والألوان والتصميمات الخاصة بالمنتجات عندهم حلوة وفيها ذوق ، بالنسبة للعبوة البلاستيك الصغيرة اللي بنكهة الفراولة بيجي معاها ملعقة صغيرة بلاستيك بيضاء بتبقى مثبتة في غطاء العبوة من الداخل يعني لو أكلت جزء من الأيس كريم أقدر أقفل العبوة وأثبت فيها الملعقة وأحفظها في الفريزر لما أحب أكلها مرة تانية حبيت فكرتها جدا .
وطبعا في نكهات أخرى بس دي النكهات اللي جربتها وعجبتني لحد دلوقتي ، أنا من الناس اللي مبحبش أجرب حاجات كتير خاصة في الأكل والشرب بجرب كام حاجة ولما استقر على حاجة عجبتني وحبتها خلاص مبجربش حاجة تانية غير بعد فترة لما أحس إني محتاجة أجرب حاجة جديدة .
- في نوع من أنواع الشيبس المصري الموجود في السوق اسمه Raw وهو مصري المنشأ والشركة المالكة للمنتج شركة مصرية هي ظهرت في مصر من فترة طويلة من قبل أحداث 7 أكتوبر والمقاطعة ومن وقت ما ظهر أنا جربته وكان بالنسبالي من المفضلات في الشيبس لأنه فعليا من أنظف أنواع الشيبس الموجودة في السوق جودته عالية جدا الشيبس بتاعه نظيف مبقلقش وأنا باكل أن يكون فيه واحدة شيبس غير سليمة أو غير صالحة للأكل باكل منه وأنا مطمئنة كمان النكهات بتاعته رائعة والطعم واضح يعني مش نكهة ضعيفة أو بعيدة عن النكهة المكتوبة على الكيس لأ النكهات عندهم جميلة جدا وواضحة ، ورأي دي عن النكهات اللي أنا جربتها زي نكهة الكريمة الحامضة مع الأعشاب ونكهة الفلفل الحلو بس مشكلتي مع الفلفل الحلو انه حار لو بارد كان هيبقى التوب بالنسبالي وكمان جربت نكهة الهالوبينو ودي مع أنها حارة شوية بس طعمها تحفة وبيرجعني لذكريات جميلة لأن نكهته نفس نكهة شيبس عمان الموجود في الخليج وأنا كنت بحبه في الفترة اللي كنت مقيمة فيها في الخليج كنت بحب شيبس عمان و سلاطة وده كان اسم لنوع تاني من الشيبس العماني اللي كان موجود في الأسواق الخليجية ومازال بس لأن في مصر شيبس عمان غير متوفر عندنا فكان أقرب طعم ليه ويكاد يكون نفسه هو شيبس Raw بالهالوبينو .
لو حابين تتعرفواعلى قناتي على اليوتيوب ممكن تشوفوا الفيديو ⬇
الفطائر من الأكلات المميزة وكتير من الناس بيفضلوها خاصة إنها بتتعمل بطرق متعددة وحشوات متنوعة ، مشكلتها الوحيدة بالنسبة لي المجهود والوقت اللي بتأخذه في التشكيل علشان أقسم كمية العجين وأعمل فطائر صغيرة على حسب كمية العجين ده بيحتاج وقت ومجهود كبير ، حبيت أختصر الموضوع وأعمل بدل الفطائر الصغيرة أعمل فطيرة واحدة كبيرة وأقسمها بعد التسوية لأحجام صغيرة وبكده أكون سهلت عليا الموضوع واختصرت الوقت والمجهود بالذات في أيام الصيف الحارة اللي بنعاني منها هذا العام ، وقفة المطبخ بتكون صعبة في هذه الأجواء الحارة علشان كده حبيت أجرب الطريقة دي وفعلا كانت تجربة ناجحة وعجبتني جدا ، أنا إستخدمت في الحشوات الجبنة والزعتر فقط تقدروا تستخدموا حشوات أخرى مختلفة الطريقة كانت سريعة جدا والطعم لذيذ ، في الأسفل فيديو بيوضح الطريقة أتمنى تجربوها وتعجبكم .
- المقادير والمكونات :-
- كيلو من الدقيق الأبيض حوالي 4 أكواب .
- نصف ملعقة كبيرة من البيكنج بودر .
- ملعقة كبيرة ونصف من الخميرة الفورية .
- ملعقة صغيرة من السكر .
- رشة بسيطة من الملح .
- كوب ونصف من الحليب .
- ربع كوب من زيت الزيتون . ( يمكن استبداله بزيت الذرة )
( قد يختلف إحتياج الدقيق للسوائل من الحليب والزيت حسب نوع الدقيق ، يختلف من نوع لأخر )
( المكونات جميعها بدرجة حرارة الغرفة )
- المكونات الخاصة بالحشوات :-
- سمسم .
- زعتر أخضر بالسمسم المخصص للطعام .
- زيت زيتون وزيت ذرة لخلطهم مع الزعتر .
- أنواع مختلفة من الجبن حسب المتوفر في هذه الوصفة استخدمت خليط من الأجبان السورية من الجبن النابلسي والجبن المجدول هذه الأجبان عند تعرضها للحرارة تعطي نتيجة مثل الموزاريلا وأفضل من حيث الطعم ولكن من الممكن استخدام أي نوع من الأجبان المتوفرة لديكم حسب الرغبة مع إضافة جبن الموزاريلا .
- طريقة التحضير :-
في وعاء عميق للعجن نضيف المكونات الجافة الدقيق ثم السكر والخميرة والبيكنج بودر والملح ونقلبهم جيدا ، ثم نضيف الحليب ونقلب قليلا ثم نبدأ بالعجن بعد أن يندمج الحليب جيدا مع العجين نبدأ في إضافة الزيت ونكمل العجن حتى تصبح العجينة متماسكة وطرية لا هي ناشفة ولا طرية زيادة عن اللزوم حتى لا تلتصق في اليد عند فردها ، يمكننا زيادة الحليب قليلا وبالتدريج إذا كانت العجينة ناشفة وإذا كانت طرية زيادة عن اللزوم نضيف القليل من الدقيق ، أحيانا تكون العجينة جيدة ولكن مازالت تلتصق في اليد هذا من الممكن أن يكون بسبب اليد إذا مسحنا اليد بقليل من الزيت سيحل الأمر .
بعد الإنتهاء من العجن نقوم بتغطية الوعاء جيدا وتركه قليلا حوالي نصف ساعة بالنسبة لفصل الصيف حتى يختمر العجين ثم بعد التخمر نضع العجينة في صينية مدهونةبالزيت تكون مناسبة لحجم العجينة وحسب حجم الفطيرة التي نحتاجها ثم نفردها جيدا ونمرر الشوكة على العجينة ونصنع نقاط بسيطة على سطح العجينة بالشوكة ثم نبدأ في وضع الحشوات ثم تترك الفطيرةحوالي ربع ساعة قبل وضعها في الفرن ، يمكننا تقسيم الفطيرة بالحشوات حسب الرغبة ، كما موضح بالفيديو ⬇
.jpg "زيارة أكبر متحف في العالم")
