طريقة عمل خبز الصاج بالخميرة ومن غير فرن

 

مكونات ومقادير خبز الصاج بالخميرة :-

- كيلو دقيق .

- ملعقة طعام من الخميرة .

- ملعقة صغيرة من السكر .

- رشة ملح .

- 3 ملاعق كبار من زيت الذرة .

- لتر إلا ربع من الماء الدافئ .

طريقة تحضير خبز الصاج بالخميرة :-

في البداية بنخلط المواد الجافة وممكن ننخل الدقيق لو موجود 

عندنا من فترة أما لو كان جديد ممكن نستخدمه على طول بدون 

مننخلُه هنخلط المكونات الجافة لو متأكدين من جودة الخميرة 

اللي بنستخدمها ممكن نستخدمها على الدقيق على طول من غير 

ما نختبرها في الماء لوحدها ونستنى لحد ما تخمر ، بعد كده 

هنضيف الزيت على المكونات الجافة ونبدأ نضيف الماء بالتدريج 

ونبدأ نعجن بالإيد أو في العجان لازم نضيف الماء بالتدريج لأن 

الدقيق ممكن يحتاج كمية أقل من الكمية المذكورة ولازم يكون 

الماء دافئ هنفضل نعجن لحد ما نحس إن العجينة بدأت تلم 

بسهولة ومبقتش تلزق في الإيد ويفضل إنها متكونش لزجة 

وبتلزق علشان متغلبناش في الفرد وكمان متكونش جامدة 

وناشفة زيادة علشان هتكون صعبة وقاسية في الفرد، بعد العجن 

هنغطي العجينة كويس ونسيبها حوالي نصف ساعة لو في 

الصيف علشان تخمر بعد كده هنقسم العجينة ونبدأ نأخذ منها 

جزء نكوره حسب الحجم اللي إحنا عاوزينه هنكور كل الأجزاء 

بتاعت العجينة وبعد كده هنسيبها تخمر شوية لمدة دقائق بعد 

كده هنبدأ نفرد العجين ولو كانت العجينة بتلزق ممكن نرش 

عليها شوية دقيق وعلى السطح اللي بنشتغل عليه وكمان 

النشابة اللي بنفرد بيها العجين بعد ما نفرد العجين كله هنسيبه 

برده لدقائق علشان يخمر ويرتاح ولازم دايماً نكون مغطيين 

العجين بقماش قطن وممكن بعد الفرد نفرشه على قطعة قماش 

قطن ونغطيه علشان مينشفش ، بعد كده هنسخسن طاسة 

( مقلاة ) تكون واسعة ومصنوعة من مادة غير لاصقة بعد ما 

نسخنها كويس نبدأ نخبز العيش بتعنا ونبدأ طبعاً بأول عيش 

فردناه علشان بيكون أخذ وقته الكافي في التخمير وإحنا بنخبز 

العيش بتكون الحرارة متوسطة ولما يبدأ ينتفخ بنقلبه على الجهة 

الأخرى ممكن نضغط عليه شوية بالاداة اللي هتستخدموها في 

قلب العيش علشان النفخ اللي حصل في الأول بيعمل ثقوب 

صغيرة فبتمنع انتفاخ العيش من الجهة الأخرى فالضغط ده بيسد

الثقوب وبيساعد على انتفاخ العيش ، أهم حاجة ان كل ما 

تخبزوا رغيف تغطوه على طول علشان يفضل طري وسخن 

وتستمتعوا بأكله بألف هنا ...

فيديو فيه طريقة الوصفة 

بشكل أوضح ⬇

لو بتقرأوا الموضوع ده من 

على الموبايل والفيديو مش 

ظاهر تقدروا تضغطوا على 

جملة ( عرض إصدار الويب ) 

الموجودة أسفل

 المدونة هيظهر الفيديو في 

نهاية الموضوع .

الأرز بالخلطة ( بالكبد وقوانص الفراخ )

 

مقادير سلق الكبد والقوانص :-

- كبد وقوانص الدجاج .

- 3 أعواد من القرنفل .

- 3 ورق غار .

- ربع ملعقة صغيرة من الفلفل الأسود .

- بصلة صغيرة لسلق الكبد والقوانص .

- ملعقتين طعام من الخل .

 طريقة سلق الكبد والقوانص :-

في الماء نضع جميع المكونات السابقة ماعدا الخل بالنسبة 

للبصلة هنضفها زي ماهي بدون تقطيع بس هنشيل القشرة 

الخارجية ونعمل علامة + على البصلة من فوق دون تقطيع بعد 

غليان الماء هنضيف الخل والكبد والقوانص هنضيفهم في مصفى 

علشان يصفوا من ماء السلق كويس لحد ما نستخدمهم تاني

القوانص والكبد هتكون مستوية نصف تسوية .

مقادير الأرز بالخلطة :-

- بصلتين كبار مفرومين ناعم .

- زيت + زبدة ( الزبدة حسب الرغبة ) .

- ملح + مكعب واحد مرق دجاج .

- عود واحد قرفة .

- 2 ليمونة مجففة .

- 3 ورق غار .

- ربع ملعقة صغيرة من الفلفل الأسود .

- حبة واحدة من الطماطم مقشرة ومقطعة لمكعبات صغيرة .

- جزرة واحدة مبشورة .

- فلفل رومي ألوان أو أخضر فقط مقطع لمكعبات صغيرة الكمية 

  حسب الرغبة .

- كيلو من الأرز البسمتي .

- ربع ملعقة صغيرة من بودرة الزعفران .

- كبد وقوانص مسلوقة .

طريقة تحضير الأرز بالخلطة :-

في البداية هنضيف البصل المفروم مع زيت ذرة وزبدة على النار 

هنقلب البصل لحد ما يذبل شوية بعد كده هنضيف القوانص الأول 

علشان نكمل تسويتها هنقلبها مع البصل ونضيف عليها الليمون 

المجفف وورق الغار والقرفة هنقلبهم مع بعض كويس بعد كده 

هنضيف الملح والفلفل الأسود ومكعب المرق ونتأكد انه ذاب 

كويس بعد كده هنضيف الطماطم ونقلب المكونات مع بعض 

ونضيف عليهم شوية ماء مغلي علشان نكمل تسوية القوانص 

قبل ما نضيف الكبد ، بعد تسوية القوانص هنضيف الكبد ونضيف 

ماء مغلي كميته تكون مناسبة لتسوية الأرز البسمتي هو بيحتاج 

من كوب ونصف ماء الى 2 كوب بس ممكن لو بتستخدموا نوع 

جديد ومش متأكدين من كمية الماء المناسبة ليه ضيفوا كمية أقل 

من الماء وتابعوا الأرز شوفوا هيحتاج ماء تاني ولا لأ

هنضيف بعد الماء الجزر والفلفل الرومي والأرز هنسيب الأرز 

لحد ما يستوي بعد كده هندوب بودرة الزعفران في شوية ماء 

ساخن ونوزعهم على الأرز من فوق فقط بعد كده هنقلب الأرز 

من الأربع جهات ومنقلبش كتير علشان حبات الأرز ما تتكسرش 

الزعفران هيدي لون جميل للأرز وهيبقى ملون حبة بيضاء 

وحبة حمراء بسبب الزعفران وبكده تكون الأكلة جاهزة 

وبألف هنا ...

فيديو فيه طريقة الوصفة 

بشكل أوضح ⬇

لو بتقرأوا الموضوع ده من 

على الموبايل والفيديو مش 

ظاهر تقدروا تضغطوا على 

جملة ( عرض إصدار الويب ) 

الموجودة أسفل

 المدونة هيظهر الفيديو في 

نهاية الموضوع .

طريقة عمل الملوخية وسلق الفراخ بطريقة تدي ريحة ونكهة لذيذة جداً وطريقة الباذنجان المخلل وتسخين العيش بشكل صحي

 

مكونات مرقة سلق الدجاج :-

- بصلة صغيرة .

- قطعة صغيرة من الجنزبيل .

- ورق غار .

- فلفل أسود .

- ملح .

- هيل / حبهان بودر .

طريقة تحضير المرقة :-

في البداية هنقشر البصلة 

ونغسلها كويس بعد كده 

بنعمل زي علامة زائد + في 

البصلة من غير ماتنقطع 

وتنفصل من بعضها 

بعدكده هنضيف البهارات

 والبصلة للماء اللي 

هنسلق فيه الفراخ هنسيب 

الماء يغلي بعد كده هنضيف 

الفراخ للماء بنسبها ربع 

ساعة بعد كده بنقلبها على 

الجهة الأخرى علشان تستوي 

من جميع الجهات بعد تسوية 

الفراخ بنرفعها من مياه 

المرقة ونقدر وقتها نستخدم 

المرقة في الأكل بتعنا الفراخ 

ممكن بعد كده نقليها في

الزيت أو ندهنها بشوية 

زيت وصلصة وندخلها الفرن 

ونحمرها تحت الشواية .

مكونات ومقادير الباذنجان 

المتبل :-

- ماء لسلق الباذنجان .

- نصف ملعقة كبيرة من       

  الملح  لماء السلق .

- ربع ملعقة صغيرة من 

  الفلفل الأسود لماء السلق .

- نصف ملعقة صغيرة من 

  الكمون لماء السلق .

- حبة واحدة من الفلفل 

  الرومي الأخضر مقطع 

  مكعبات صغيرة .

- ملعقة صغيرة من الملح .

- ملعقة صغيرة من الكزبرة 

   الجافة .

- ملعقة صغيرة من الكمون .

- ملعقة صغيرة من النعناع 

  الجاف .

- نصف ملعقة صغيرة من 

   الفلفل الأسود .

- مكسرات مجروشة حسب  

  الرغبة .

- ملعقة صغيرة من هريسة 

  الشطة .

- ليمونة صغيرة .

- خل .

- زيت ذرة + زيت زيتون .

طريقة تحضير الباذنجان 

المتبل :-

في البداية هنغلي الماء على 

النار ونضيف الملح والكمون 

والفلفل الأسود وبعد 

غليان الماء هنضيف 

الباذنجان بعد ما نشيل 

منه الجزء الأخضر اللي من 

فوق ونغسله كويس 

جداً ونقلبه كل شوية في 

الماء المغلي لحد ما يوصل 

للتسوية المطلوبة هنرفعه 

من الماء ونصفيه كويس بعد 

كده هنعمل قطع بالطول في 

الباذنجان من غير ما ينفذ 

القطع من الجهة الأخرى بعد 

كده في الكبة هنفرم الفلفل 

الرومي ونضيف ليه باقي 

المكونات الجافة ونفرمهم 

فرم ناعم بعد كده 

هنعصر عليه ليمونة صغيرة 

ونضيف الهريسة 

والمكسرات ونقلب المكونات 

كويس جداً بعد كده نحشي 

الباذنجان بالتتبيلة الجميلة 

دي وبعد كده في الطبق اللي 

هنحفظ فيه الباذنجان هنرص 

الباذنجان فيه ونوزع على 

الباذنجان شوية خل عليه 

وزيت ذرة وزيت زيتون على 

الباذنجان كله بالتساوي .

مكونات ومقادير الملوخية :-

- شوربة مرق دجاج .

- مكعب مرق دجاج .

- 3 معالق كبرة من الثوم 

  المفروم .

- زبدة + زيت ذرة .

- رشة من الفلفل الأسود .

- ملح .

طريقة تحضير الملوخية :-

هنضيف كمية من ماء مرق 

الفراخ للوعاء اللي هنطبخ 

فيه الملوخية لازم المرق 

يكون سخن بعد كده هنضيف 

كمية الملوخية اللي هنطبخها 

ونضيف عليها رشة من الفلفل 

الأسود وملعقة كبيرة من 

الثوم المفروم ونقلب 

الملوخية كويس في المرقة 

لحد ما تذوب بسيب 

الملوخية تغلي مش أكثر من 

مرتين في الوقت ده نكون 

بنحمر باقي كمية 

الثوم مع نصف ملعقة صغيرة 

من الكزبرة الجافة وكمية من 

الزبدة وزيت الذرة بعد 

ما الملوخية تغلي والثوم 

يكون إحمر وأخذ 

اللون الذهبي هنضيف الثوم 

المحمر للملوخية 

ونقلبهم ونسبهم يغلوا على 

النار مرة واحدة مش أكثر 

بعد كده نطفي النار 

على الملوخية ونسيبها 

مكشوفة ونغرفها على طول 

في أطباق التقديم من غير ما 

نغطيها علشان لونها يفضل 

أخضر وما يغمقش .

ملحوظة :-

لو بتعملوا الملوخية لأول مرة 

ومش عارفين ازاي تعملوا 

مقدار مناسب من ماء 

سلق الدجاج أو أي نوع من 

اللحوم ممكن تذوبوا 

كمية الملوخية المفرومة في 

شوية ماء مرق وتضيفوا 

المرق بالتتدريج لحد ما 

توصلوا للقوام المناسب 

للملوخية .

ملحوظة لتسخين العيش :-

علشان تسخنوا العيش بشكل 

صحي من غير أضرار ومن 

غير تعريضه للنار 

مباشرةً على عين البتوجاز 

تقدروا تسخنوه على 

طاسة صغيرة أو الصاجة 

اللي بنخبز عليها 

العيش أو نعمل فيها الكريب 

الطريقة دي بتكون أفضل من 

تعريضه لنار البتوجاز مباشرة 

وكمان أفضل من تسخينه في 

الفرن علشان الردة بتاعت 

العيش بتملى الفرن 

وتبهدله فكرة حبيت أشاركها 

معكم للي مش عارفينها أو 

مجربوهاش قبل كده ، وبألف 

هنا ... .

فيديو فيه طريقة الوصفة 

بشكل أوضح ⬇

لو بتقرأوا الموضوع ده من 

على الموبايل والفيديو مش 

ظاهر تقدروا تضغطوا على 

جملة ( عرض إصدار الويب ) 

الموجودة أسفل

 المدونة هيظهر الفيديو في 

نهاية الموضوع .

طريقة عمل المسقعة باللحمة المفرومة والبطاطس والباذنجان بالفرن أو بدون فرن

 

المسقعة من الأكلات البسيطة وبتتعمل بطرق متنوعة ومختلفة حبيت أعملها بالبطاطس واللحمة المفرومة لأن المكونات دي بتديها طعم غني وقيمة غذائية ، خطوات بسيطة وسهلة تديها طعم لذيذ جداً آن شاء الله الطريقة تعجبكم .

المكونات والمقادير :-

- 3 حبات متوسطين من الباذنجان الأسود الرومي .

- 350 جرام من اللحمة المفرومة .

- 4 حبات متوسطين من البطاطس .

- 6 حبات متوسطين من الطماطم ومعصورين .

- 3 حبات متوسطين من البصل الأبيض مفرومين ناعم .

- ملعقة كبيرة ثوم مفروم .

- ربع ملعقة صغيرة فلفل أسود .

- نصف ملعقة صغيرة بهار لحمة .

- ربع ملعقة صغيرة قرفة ناعمة .

- ربع ملعقة صغيرة من البابريكا .

- ملعقة صغيرة سكر أبيض .

- مكعب مرق .

- ملح .

- زيت ذرة لتسوية اللحمة .

- زيت دوار الشمس لقلي البطاطس والباذنجان .

طريقة التحضير :-

في البداية هنقشر ونقطع الباذنجان لحلقات أو تقطيع طولي وتكون القطع سمكها متوسط يعني لا تخينة أوي ولا رفيعة زيادة بعد كده هننقع قطع الباذنجان في ماء وملح حوالي ملعقة صغيرة وخل أبيض النقع ده بيساعد الباذنجان انه ميشربش زيت كثير وكمان يخفف من حدة الباذنجان بس النقع لايزيد عن 10دقائق / ربع ساعة قبل القلي علشان الباذنجان ميبقاش طري زيادة عن اللزوم ويشرب الزيت نفس الشئ بالنسبة للبطاطس هنعمل نفس الخطوات بس البطاطس ممكن ننقعها أكثر من ربع ساعة ، بعد كده هنبدأ بقلي البطاطس أولاً ثم نقلي الباذنجان ، بالنسبة للحمة المفرومة هنسخن شوية زيت ذرة على النار وننزل عليه باللحمة المفرومة ونضيف البهار الفلفل الأسود وبهار اللحمة والقرفة ونقلبهم كويس ونبدأ نفصل اللحمة من بعضها الملح يفضل يتحط في النهاية علشان تفضل اللحمة ناعمة ومتكتلش يعني تبقى متقسمة لكتل كبيرة مش صغيرة وناعمة بعد كده هنضيف البصل ونصف كمية الثوم ونقلبهم كويس مع بعض لحد ما البصل يذبل بعد كده هنضيف نصف كمية الطماطم المعصورة وعند عصر الطماطم في الخلاط نضيف ليها السكر علشان يقلل من حموضة الطماطم هنقلب نصف كمية عصير الطماطم مع اللحمة ونضيف مكعب المرق ونتأكد انه ذاب كويس هنسيب اللحمة على النار لحد ما الطماطم تستوي وتتسبك يعني يبدأ الماء اللي فيها يقل وتتشرب اللحمة بعد كده هنرفعها من على النار ونضيف باقي كمية الثوم المفروم ونقلبهم مع بعض بعد كده في طاجن أو صينية بايركس هنضيف في البداية باقي كمية عصير الطماطم ونرش عليه شوية فلفل أسود ونقلبه بعد كده هنبدأ نرص البطاطس فوق عصير الطماطم بعد كده هنضيف طبقة من قطع البذنجان على البطاطس بعد كده هنضيف اللحمة المفرومة ونوزعها في الصينية كلها بالتساوي وعلى اللحمة هنضيف طبقة ثانية من البطاطس و بعدها نضيف طبقة ثانية من الباذنجان وممكن لو حابين تضيفوا جبنة مع اللحمة أو على وش الصينية علشان تأخذ لون في الفرن ينفع جداً بعد كده هندخل الصينية الفرن ونسيبها على درجة حرارة عالية في الأول على ماتبدأ تغلي وبعد كده هنخفض الحرارة مش هتحتاج مدة كبيرة بعد الغليان 10 دقائق فقط وبعد كده ممكن تشغلوا شواية الفرن علشان تدي لون للصينية من فوق ، وبألف هنا ...

فيديو فيه طريقة الوصفة 

بشكل أوضح ⬇

لو بتقرأوا الموضوع ده من 

على الموبايل والفيديو مش 

ظاهر تقدروا تضغطوا على 

جملة ( عرض إصدار الويب ) 

الموجودة أسفل

 المدونة هيظهر الفيديو في 

نهاية الموضوع .