طبق فريك بقطع الدجاج

      

     طبق فريك بقطع الدجاج      

الفريك من الأكلات المميزة والمفيدة جدا لأنه بيحتوي على فيتامين ب المركب وفيتامين ه 

اللي بيساعد على استرخاء العضلات وبيعمل على تحسن الحالة المزاجية وبيقلل من 

التوتروالقلق النفسي وكمان بيحتوي على العديد من الألياف اللي بتساعد فى الحماية من 

أمراض الجهاز الهضمي زي الإمساك والتخلص من السموم في الجسم ، كل الفوائد دي 

واكثر من كدة فوائد كثيرة ومتعددة للفريك تخليه يستحق التجربة آن شاء الله الطريقة دي 

تعجبكم .  

*المقادير والمكونات :-

نصف كيلو من أوراك الفراخ مخلية ومقطعة لقطع متوسطة الحجم .

- نصف كيلو فريك .

- زيت وزبدة .

 

- بصلتين متوسطين مفرومين .

- فصين ثوم كبار .

- جزرة كبيرة مبشورة .

- حبة صغيرة من الفلفل الأخضر الرومي .

- حبتين طماطم منزوعة القشرة .

- 2 مكعب مرق دجاج .

- ملح الكمية حسب الرغبة .

- ربع معلقة صغيرة فلفل أسود .

- نصف معلقة صغيرة كمون .

- نصف معلقة صغيرة بابريكا .

طريقة التحضير:-

أول حاجة بنغسل الفريك كويس وبعد كده ننقعه في ميه لمدة ربع ساعة ( الفريك اللي 

استخدمته في الوصفة دي هو الفريك الأصفر مش الأخضر لأن الأخضر بيفضل جامد في 

المضغ حتى بعد التسوية فيفضل استخدام الفريك الأصفر )  بعد كده هنحضر اوراك 

الفراخ بعد منغسلها ونصفيها نقطعها لقطع متوسطة ومتساوية بعد كده نحمر البصل والثوم 

في الزيت والزبدة لحد مايأخذ اللون الذهبي بعد كده نضيف قطع الفراخ والملح وباقي 

البهار الفلفل الأسود والكمون والبابريكا ونقلبهم كويس مع البصل والثوم ونسيب الفراخ 

تتشوح شوية مع البصل وتبقى متماسكة بعد كده هنصفي الفريك من الميه ونضيفه لقطع 

الفراخ ونضيف ليه مكعبات المرق ونقلبهم كويس مع بعض ونسيبه شوية على النارلحد ما 

ينشف من الميه اللي كان منقوع فيها نقطع 

الطماطم والفلفل الرومي لقطع متوسطة الحجم ونبشر الجزرة ونضيفهم للفريك ونقلب لحد 

ما المكونات تتمزج كويس مع بعض وبعد حوالي 10 دقائق نضيف حوالي نصف لتر من 

الميه المغلية ونقلبهم ونسيب الفريك لغاية مايغلي وبعد كده نهدي النار ونسيب الفريك 

يستوي ويشرب الميه او ممكن ننقله في طاجن ويستوي في الفرن ، وبكده يكون الفريك 

جاهز للأكل بألف هنا .

تقدروا تشوفوا الطريقة مصورة في الفيديو أسفل الموضوع .

           

حلوى العاشوراء مغذية ولذيذة

 

 حلوى العاشوراء مغذية ولذيذة 

 

حلوى العاشوراء أو العاشورا بالعامية هي من الحلويات التاريخية لأنها مش وليدة العصر الحديث ويقال أنها اتعرفت في مصر في فترة حكم الفاطميين لمصر وسبب التسمية إن المسلمين بيصوموا اليوم التاسع والعاشر من شهر محرم اقتداءا بالرسول عليه الصلاة والسلام اللي صامهم بعد هجرته من مكة إلى المدينة وعرف أن اليهود صايمين اليوم ده لان ده اليوم اللي نجى فيه ربنا سبحانه وتعالى سيدنا موسى من آل فرعون فقرر الرسول عليه السلام يصوم اليوم ده وقال إن العام المقبل نصوم يوم قبله وهما التاسع والعاشر من محرم لأننا أولى منهم بسيدنا موسى عليه السلام .   

المكونات :- 

300 جرام من القمح 

كوب من الأرز

2لتر حليب

كوب ونصف سكر

معلقة كبيرة من نشا الذرة مذابة في نصف كوب ماء 

3معالق كبار من ماء الورد حسب الرغبة 

مكسرات مجروشة وجوزهند وزبيب للتزيين

   الطريقة :- 

بعد ما ننقي القمح ونغسله كويس بننقعه في ميه وتكون الميه مغطية القمح  لمدة 5 ساعات 

وبعدها نغلي ميه على النار وبعد الغليان نضيف ليها القمح ونسيبه يستوي على النارونقلبه 

من فترة للتانية علشان نتأكد أن الميه اللي فيه مناسبة لتسوية القمح وبعد مايستوي نصفيه 

كويس وبعدها نجيب الرز ونسلقه برده في ميه ونقلبه من فترة للتانية علشان ميلزقش 

وكمان نتأكد أن لسه فيه ميه يكمل بيها التسوية وبعد ما يستوي الرز نضيف ليه الحليب 

من غير ما نصفي الرز احنا بنستخدمه بمية الرز علشان فيها قيمة غذائية وفي نفس الوقت 

أخف من مية القمح ونسيب الحليب يغلي مع الرز شوية وبعد كده نضيف السكر ونقلبهم 

كويس وبعد شوية نضيف النشا المذاب ونقلب الخليط كويس ونتأكد من القوام انه اصبح 

سميك شوية ونرفعه من على النار وبعدها نضيف ماء الورد حسب الرغبة وبكده تكون 

جاهزة ولازم نصبها على طول في اطباق التقديم علشان لو سبناها هتتخن اكتر وهيكون 

صعب توزيعها ونقدر نزين العاشورا بعد توزيعها في الأطباق بالمكسرات وجوزالهند 

والزبيب وطبعاً ده حسب الرغبة .  

تقدروا تشوفوا الفيديو لطريقة التحضير وبألف هنا👌

 

مفرش ورد من الكروشيه بطريقة بسيطة مناسب للمبتدئين في الكروشيه

مفرش ورد من الكروشيه سهل وبسيط 

موضوع النهاردة هيكون عن طريقة سهلة ومناسبة للمبتدئين في الكروشيه وهي مفرش من الورد بسيط وحلو في نفس الوقت هنستخدم فيه 3 غرز سهلة وبسيطة جدا

الغرز المستخدمة :-

- غرزة السلسة .

- غرزة الحشو .

- غرزة المنزلقة .

الأدوات المستخدمة:-

- إبرة كروشيه مقاس 4m .

- خيوط مناسبة لمقاس الإبرة وممكن نستخدم بواقي الخيوط أنا هنا استخدمت خيوط قطن

- ابرة تنظيف .

- ممكن علشان نضيف لمسة جمالية اكتر للمفرش نستخدم فصوص لولي نصف دائرة أوأي خرز نصف دائرة .

طريقة عمل المفرش وتزيينه بالخرز هتلاقوها في الفيديو التالي أتمنى تنال إعجابكم  

 

مهلبية السحلب وقمر الدين

 المهلبية اللذيذة

قمر الدين من الحاجات الأساسية  في رمضان سواء كان عصير أو حلويات بس بعد رمضان بيتبقى عندنا  من قمر الدين والخشاف علشان كده ممكن نستغل الحاجات دي في حلويات زي المهلبية وآكلات تانية مختلفة كمان حبيت اجرب السحلب مع المهلبية والحمدلله كانت التجربة حلوة ، وكمان هنشوف مع بعض ازاي نخلي طبق المهلبية البسيط يبقى طبق مميز وحلو للضيوف خاصة انها من اسرع الحلويات اللي ممكن تتعمل في اي وقت ، اسبكم مع المقادير وطريقة التحضير.

مقادير المهلبية بالسحلب :-  

 - 3 أكواب من الحليب .

- 4  معالق كبار سكر.

- معلقة كبيرة من النشا .

- 2 معلقة كبيرة من السحلب .

الكمية دي تكفي 6 كاسات لو هنضيف عليها من قمر الدين يعني الكاسة يكون نصها مهلبية عادية والنصف التاني مهلبية قمر الدين و طبعا حسب حجم الكاسة   

طريقة التحضير:- 

اول حاجة بنبدأ نضيف الحليب على نار هادية وبعد كده بنضيف باقي المكونات ونقلبهم 

كويس لغاية ما يدوب النشا والسحلب وممكن نستخدم المضرب اليدوي علشان ندوبهم 

كويس المهم أننا نعمل الحركة دي قبل ما الحليب يبدأ يسخن علشان النشا متكلكعش مننا 

ويبقى صعب اننا ندوبها ونستمر بعد كده في التقليب كل حين لغاية ما المهلبية القوام بتعها 

يبدأ يتخن وتغلي كويس وتوصل للقوام اللي احنا عايزينه بعد كده نبدأ نصبها في كاسات 

التقديم على طول قبل ما تبرد علشان متكلكعش

مقادير مهلبية قمر الدين :- 

- ربع كيلو قمر الدين .

- 4 كوب من الماء .

- 12 معلقة كبيرة من السكر .

- 4 معالق كبار من النشا مذابة في نصف كوب ماء .

طريقة التحضير :-

بنقطع كمية القمر الدين اللي هنستخدمها لقطع صغيرة علشان تدوب بسهولة وبعد كده 

بنضفها لكمية الميه ونسبهم على النار لغاية ما قمرالدين يدوب تماما لو في قطع مش 

عايزة تدوب ممكن ندكها بالمعلقة ونسيبه يغلي شوية بعد كده نضيف كمية السكر ونسيبه 

يغلي تاني مع السكر لغاية مايدوب السكرونكون محضرين النشا و ندوبها في الميه كويس 

ونضيفها ليه علشان يبدأ القوام يتخن ويبقى مهلبية نقلب الخليط كويس وبعدما الخليط يغلي 

شوية ويأخذ القوام المطلوب نرفعه من على النار ونبدأ نصبه في كاسات التقديم

ممكن كمان لو عندنا فاكهة مجففة نقطعها ونضفها للمهلبية بعد مانرفعها من على النار ونقلبهم بسرعة ونصب الخليط بعد كده في كاسات التقديم

وده فيديو للطريقة صوت وصورة وبألف هنا

أساور الصداقة بطريقة سهلة وبسيطة

 أساور الصداقة بخيوط الكروشيه 

في الموضوع ده هنتعلم طريقة مميزة وبسيطة نقدر نعمل بيها أشكال متنوعة من الأساور 

زي أساور الصداقة وطبعا تقدروا تتحكموا في ألوانها وأشكال الخرز اللي هتستخدموه 

وطبعا كل ما كانت الحاجة مصنوعة بإيدنا كل ماكانت مميزة اكتر عن الحاجة الجاهزة

 النوع ده من الأساور سهلة وتقدروا تنفذوها بكل سهولة    

كل اللي هنحتاجه :-

- خرز باللون والشكل اللي تحبوه انا هنا استخدمت خرز كريستال .

- فواصل وده اسمها في خامات الاكسسوارات بتتحط بين الخرز وبيكون حجمها أصغر من حجم الخرز المستخدم وممكن استبدال الفواصل بخرز يكون حجمه أصغر من الخرز الأساسي .

- خيط للأساور وده في منه أنواع زي النايلون أو المكرمية الخاصة بالأساور بس انا هنا استخدمت خيط كروشيه من  إليزا ديفا وطبعا اللون حسب اختياركم .

- ابرة خياطة بس تكون خاصة بتطريز الخرز علشان الخرز يدخل في الإبرة بسهولة وخيط خياطة عادي وهتعرفوا استخدامه وطريقة تنفيذ الأساور من خلال الفيديو التالي . 

اتمنى الطريقة تعجبكم وتكون الفكرة واضحة

القهوة العربي طريقتها وفوائدها

 القهوة العربي مع التمر

للقهوة العربي فوائد كتير زي:-

- تحسين الوظائف الإدراكية .

- تحسين المزاج ومكافحة الاكتئاب .

- الحفاظ على صحة الفم .

- ده غير فوائدها للبشرة لاحتوائها على مضادات للأكسدة .

ده غير ان طعمها مميز عن باقي أنواع القهوة بس طبعا الإفراط في شربها بيؤدي لأضرار يعني الاعتدال مهم في كل حاجة حتى في  شرب القهوة

المقادير :-

-  لتر من الماء .

 - نصف معلقة صغيرة من الهيل ( حبهان ) مطحون . 

- معلقين ونصف كبار من القهوة العربية .

طريقة التحضير :-

هنغلي الميه على النار وهنضيف بعدها مقدار القهوة ونقلبه كويس وبعد كده نسيبه لحد ما 

يغلي كويس مرتين تلاتة وبعد كده بنضيف الهيل للدلة أو ترمس القهوة وبعد كده نصب 

عليها القهوة وبنعمل كده علشان نكهة الهيل بتضيف طعم مميز للقهوة كل مفضلت لوقت 

اكبر وبكده تكون جاهزة للتقديم .

طبعا القهوة العربية بتتشرب بدون اي إضافات للسكر لأن هي حلاوتها في مرارتها  والمرارة اللي فيها مقبولة لو جربتوها هتحبوها وممكن تقدموا معاها تمر أو كعك أو بقلاوة على سبيل المثال

وده فيديو بيوضح أكتر طريقة تحضيرها

طريقة الفطائر أو المناقيش بحشوات مختلفة لذيذة جداً

الموضوع ده هيكون عن المعجنات وازاي نعمل فطائر بطعم وشكل حلو جداً

المكونات اللي هنحتجها للعجينة هي :-

- 2كيلو دقيق أبيض لجميع الاستخدامات 

- معلقتين كبار من السكر الأبيض

- معلقة كبيرة واحدة من الخميرة الفورية

- 4 ملاعق كبيرة من الحليب البودر

- رشة من الملح 

- 4 ملاعق من الزيت وممكن نستخدم زيت الزيتون مع زيت الذرة 

- 4 أكواب ونصف من الماء الدافيء

الطريقة :-                                                                             

كل اللي هنعمله اننا هنخلط المكونات الجافة الأول مع الدقيق ونقلبهم سواء بالايد أو 

بالعجان وبعد كده بنضيف الزيت ونقلب ونضيف         

الماء المناسب حسب نوع الدقيق بالتدريج لان مش كل أنواع الدقيق بتحتاج نفس كمية 

الميه اللي استخدمتها في الوصفة ونعجن كويس          

لحد منلاحظ ان العجينة بدأت تلم بسهولة ومش ناشفة أو طرية زيادة عن اللزوم .

مكونات عمل حشوة السبانخ :-

- هنحتاج سبانخ مقطعة تقطيع ناعم وممكن نستخدم السبانخ المجمدة 

- بصلة كبيرة مفرومة ناعم وممكن نزود كمية البصل حسب الرغبة 

- معلقة كبيرة من السماق 

- كزبرة ناشفة أو بودر وومكن نستغنى عن الكزبرة لو مش حبنها

- ملح / فلفل أسود 

- هريسة 

- جبنة مشكلة 

- زيت زيتون 

طريقة تحضير السبانخ :-                                                                             

        بعد غسل السبانخ كويس جداً نسبها تصفي من الميه وبعد كده نقطعها تقطيع ناعم 

ونعصرها كويس جداً علشان تسرد كل السائل اللي فيها

وبعد فرم البصل بنعسره كويس علشان نتخلص من اي سوائل ممكن تبوظ العجينة بعد كده 

بنخلط المكونات مع بعض ونقلبهم كويس 

ومبنحتجش نعرضهم للنار لانها بتتعمل زي السلطة وممكن نضيف أنواع مختلفة من الجبن

زي منحب المهم ان السبانخ ميكونش فيها 

سوائل علشان لما نشكل العجينة متفتحش مننا .

أما بالنسبة لحشوة اللحمة  فهنحتاج :-

- نصف كيلو من اللحم المفروم 

- بصلة واحدة كبيرة ومفرومة 

- ربع ملعقة صغيرة من الملح / الفلفل الأسود / قرفة

- مكعب واحد من مرق الدجاج

- 2 حبة طماطم متوسطة الحجم ومبشورة 

- جبنة مشكلة 

- فلفل أحمر رومي 

طريقة حشوة اللحمة :-                                                                                                                                   

 نفرم البصل ونضيف اليه الزيت وتوضع  على النار لغاية ميكون لونه ذهبي بعد كده 

نضيف اللحمة المفرومة مع الفلفل الأسود 

ومكعب المرق والقرفة ونقلبهم كويس مع البصل ونفكك اللحمة من بعضها ( نضيف الملح 

الى اللحم بعد تسويته قليلاً علشان تكون ناعمة  ومتتكتلش 

أمالو حطينا الملح من البداية هيصعب تفكيك اللحم وتكون مكتلة ) هنسيب اللحم على النار 

لغاية ميتغير لونه الوردي ثم نضيف بشر الطماطم 

والملح ونقلبهم كويس حتى تستوي الطماطم وتتشرب مية الطماطم وبعد كده ممكن نضيف 

الفلفل الرومي وممكن نضيف الجبنة بعد متبرد 

تماما لانه لسه هتتعرض للنار في الفرن .

وكمان ممكن نعمل فطائر من الزعتر أو مجموعة من الأجبان حسب رغبتنا العجينة 

                   بتحتاج من ربع لنصف ساعة علشان تخمر ولازم 

نغطيها كويس ونخليها في مكان دافي لو بنعملها في الشتاء بعد كده بنجيب صينية كبيرة 

                        وندهنها بالزيت ونبدأ نكور العجين لكور  

متوسطة ونبدأ في فرد العجينة واضافة الحشو وللتوضيح أكتر تقدروا تشوفوا الفيديو  

                      هتلاقو الطريقة بالتفصيل وأتمنى انها تعجبكم