طريقة عمل الهريسة بالشطة
الهريسة بتدخل في آكلات كتير زي خلطة المحشي والتتبيلات بأنواعها وكمان ممكن نعمل منها مناقيش الفلفل اللذيذة تقدروا تعملوا منها كمية وتحفظوها في الفريزر هتفضل لشهور وممكن سنة من غير ماتتآثر .
المقادير والمكونات :-
- كيلو ونصف من الفلفل الرومي الأحمر .
- نصف كيلو من فلفل الشطة الأحمر .
- معلقة طعام كبيرة من السكر .
- معلقتين طعام ونصف من الملح .
- ملعقتين كبار من بابريكا.
- زيت طعام.
طريقة التحضير :-
بعد ما نغسل الفلفل والشطة كويس ونشفهم نبدأ نقطع الفلفل الرومي بالطول علشان نطلع منه البذر وبعد كده بنقطعه لقطع متوسطة الحجم والشطة كمان نبدأ نقطع الجزء الأخضر اللي فيها ونشيل منها البذر وممكن نعمل ده بواسطة المقوار العادي بتاع المحشي ( لازم تلبسوا جوانتي لأن الشطة بتحرق الإيد جداً ) وبعد ما قطعنا الفلفل والشطة نخلطهم مع بعض و نفرمهم كويس في الكبة وبعدين نحط الخليط المفروم في طاسة أو حلة على النار وتكون درجة النار متوسطة علشان لو حطناه على درجة حرارة منخفضة هيفضل يسرد الميه اللي في الفلفل وهياخد وقت على ما الفلفل يستوى والميه اللي فيه تنشف علشان كده من الأفضل اننا نعلي النار وتكون متوسطة هنفضل نقلب الخليط من وقت للتاني لحد منحس ان مية الفلفل بدأت تقل وبدأ الفلفل ينشف بعد كده هنضيف السكر والملح والبابريكا ونقلبه كويس والملح هنا مهم يكون طعمه ظاهر في الفلفل بس ميبقاش لدرجة الحدقان بس وهنسبها على النار تكمل التسوية لحد ما الخليط ينشف تماماً من المية ويستوي كويس هتلاقوا لونها أحمر جميل أهم حاجة الفلفل وانتوا بتشتروه سواء الرومي أو الشطة لازم يكون لونهم أحمر داكن ويكونوا طازة ومنشلهمش في التلاجة بعد الشراء لأ لازم نعمل الوصفة على طول علشان الفلفل ميدبلش ويطرى في التلاجة كده هيديكوا نفس النتيجة اللي هتشوفوها في الفيديو ⬇ وبإذن الله تعجبكم ، معلومة أخيرة هنجهز البطرمانات اللي هنعبي فيهم الهريسة بعد ما نغسلهم ونشفهم كويس من الماء لازم نعقمهم بالحرارة اتأكدوا
ان البطرمانات تتحمل الحرارة قبل ما تدخلوهم الفرن أو الميكرويف لو هيدخلوا الفرن يبقى تسخنوا الفرن كويس الأول وبعدين تطفو نار الفرن وتدخلوا البطرمانات تتعقم وبعد كده نسبها لحد ما تبرد وكمان الهريسة تكون بردت ثم نبدأ نعبي البطرمانات ونسيب فراغ بسيط في الأعلى علشان نغطي الهريسة بشوية زيت ثم ندخلهم الفريزر . تقدروا تشوفوا الفيديو ⬇ لمعرفة تفاصيل أكثر.
وبألف هنا ...
