طريقة عمل الملوخية وسلق الفراخ بطريقة تدي ريحة ونكهة لذيذة جداً وطريقة الباذنجان المخلل وتسخين العيش بشكل صحي

 

مكونات مرقة سلق الدجاج :-

- بصلة صغيرة .

- قطعة صغيرة من الجنزبيل .

- ورق غار .

- فلفل أسود .

- ملح .

- هيل / حبهان بودر .

طريقة تحضير المرقة :-

في البداية هنقشر البصلة 

ونغسلها كويس بعد كده 

بنعمل زي علامة زائد + في 

البصلة من غير ماتنقطع 

وتنفصل من بعضها 

بعدكده هنضيف البهارات

 والبصلة للماء اللي 

هنسلق فيه الفراخ هنسيب 

الماء يغلي بعد كده هنضيف 

الفراخ للماء بنسبها ربع 

ساعة بعد كده بنقلبها على 

الجهة الأخرى علشان تستوي 

من جميع الجهات بعد تسوية 

الفراخ بنرفعها من مياه 

المرقة ونقدر وقتها نستخدم 

المرقة في الأكل بتعنا الفراخ 

ممكن بعد كده نقليها في

الزيت أو ندهنها بشوية 

زيت وصلصة وندخلها الفرن 

ونحمرها تحت الشواية .

مكونات ومقادير الباذنجان 

المتبل :-

- ماء لسلق الباذنجان .

- نصف ملعقة كبيرة من       

  الملح  لماء السلق .

- ربع ملعقة صغيرة من 

  الفلفل الأسود لماء السلق .

- نصف ملعقة صغيرة من 

  الكمون لماء السلق .

- حبة واحدة من الفلفل 

  الرومي الأخضر مقطع 

  مكعبات صغيرة .

- ملعقة صغيرة من الملح .

- ملعقة صغيرة من الكزبرة 

   الجافة .

- ملعقة صغيرة من الكمون .

- ملعقة صغيرة من النعناع 

  الجاف .

- نصف ملعقة صغيرة من 

   الفلفل الأسود .

- مكسرات مجروشة حسب  

  الرغبة .

- ملعقة صغيرة من هريسة 

  الشطة .

- ليمونة صغيرة .

- خل .

- زيت ذرة + زيت زيتون .

طريقة تحضير الباذنجان 

المتبل :-

في البداية هنغلي الماء على 

النار ونضيف الملح والكمون 

والفلفل الأسود وبعد 

غليان الماء هنضيف 

الباذنجان بعد ما نشيل 

منه الجزء الأخضر اللي من 

فوق ونغسله كويس 

جداً ونقلبه كل شوية في 

الماء المغلي لحد ما يوصل 

للتسوية المطلوبة هنرفعه 

من الماء ونصفيه كويس بعد 

كده هنعمل قطع بالطول في 

الباذنجان من غير ما ينفذ 

القطع من الجهة الأخرى بعد 

كده في الكبة هنفرم الفلفل 

الرومي ونضيف ليه باقي 

المكونات الجافة ونفرمهم 

فرم ناعم بعد كده 

هنعصر عليه ليمونة صغيرة 

ونضيف الهريسة 

والمكسرات ونقلب المكونات 

كويس جداً بعد كده نحشي 

الباذنجان بالتتبيلة الجميلة 

دي وبعد كده في الطبق اللي 

هنحفظ فيه الباذنجان هنرص 

الباذنجان فيه ونوزع على 

الباذنجان شوية خل عليه 

وزيت ذرة وزيت زيتون على 

الباذنجان كله بالتساوي .

مكونات ومقادير الملوخية :-

- شوربة مرق دجاج .

- مكعب مرق دجاج .

- 3 معالق كبرة من الثوم 

  المفروم .

- زبدة + زيت ذرة .

- رشة من الفلفل الأسود .

- ملح .

طريقة تحضير الملوخية :-

هنضيف كمية من ماء مرق 

الفراخ للوعاء اللي هنطبخ 

فيه الملوخية لازم المرق 

يكون سخن بعد كده هنضيف 

كمية الملوخية اللي هنطبخها 

ونضيف عليها رشة من الفلفل 

الأسود وملعقة كبيرة من 

الثوم المفروم ونقلب 

الملوخية كويس في المرقة 

لحد ما تذوب بسيب 

الملوخية تغلي مش أكثر من 

مرتين في الوقت ده نكون 

بنحمر باقي كمية 

الثوم مع نصف ملعقة صغيرة 

من الكزبرة الجافة وكمية من 

الزبدة وزيت الذرة بعد 

ما الملوخية تغلي والثوم 

يكون إحمر وأخذ 

اللون الذهبي هنضيف الثوم 

المحمر للملوخية 

ونقلبهم ونسبهم يغلوا على 

النار مرة واحدة مش أكثر 

بعد كده نطفي النار 

على الملوخية ونسيبها 

مكشوفة ونغرفها على طول 

في أطباق التقديم من غير ما 

نغطيها علشان لونها يفضل 

أخضر وما يغمقش .

ملحوظة :-

لو بتعملوا الملوخية لأول مرة 

ومش عارفين ازاي تعملوا 

مقدار مناسب من ماء 

سلق الدجاج أو أي نوع من 

اللحوم ممكن تذوبوا 

كمية الملوخية المفرومة في 

شوية ماء مرق وتضيفوا 

المرق بالتتدريج لحد ما 

توصلوا للقوام المناسب 

للملوخية .

ملحوظة لتسخين العيش :-

علشان تسخنوا العيش بشكل 

صحي من غير أضرار ومن 

غير تعريضه للنار 

مباشرةً على عين البتوجاز 

تقدروا تسخنوه على 

طاسة صغيرة أو الصاجة 

اللي بنخبز عليها 

العيش أو نعمل فيها الكريب 

الطريقة دي بتكون أفضل من 

تعريضه لنار البتوجاز مباشرة 

وكمان أفضل من تسخينه في 

الفرن علشان الردة بتاعت 

العيش بتملى الفرن 

وتبهدله فكرة حبيت أشاركها 

معكم للي مش عارفينها أو 

مجربوهاش قبل كده ، وبألف 

هنا ... .

فيديو فيه طريقة الوصفة 

بشكل أوضح ⬇

لو بتقرأوا الموضوع ده من 

على الموبايل والفيديو مش 

ظاهر تقدروا تضغطوا على 

جملة ( عرض إصدار الويب ) 

الموجودة أسفل

 المدونة هيظهر الفيديو في 

نهاية الموضوع .

طريقة عمل المسقعة باللحمة المفرومة والبطاطس والباذنجان بالفرن أو بدون فرن

 

المسقعة من الأكلات البسيطة وبتتعمل بطرق متنوعة ومختلفة حبيت أعملها بالبطاطس واللحمة المفرومة لأن المكونات دي بتديها طعم غني وقيمة غذائية ، خطوات بسيطة وسهلة تديها طعم لذيذ جداً آن شاء الله الطريقة تعجبكم .

المكونات والمقادير :-

- 3 حبات متوسطين من الباذنجان الأسود الرومي .

- 350 جرام من اللحمة المفرومة .

- 4 حبات متوسطين من البطاطس .

- 6 حبات متوسطين من الطماطم ومعصورين .

- 3 حبات متوسطين من البصل الأبيض مفرومين ناعم .

- ملعقة كبيرة ثوم مفروم .

- ربع ملعقة صغيرة فلفل أسود .

- نصف ملعقة صغيرة بهار لحمة .

- ربع ملعقة صغيرة قرفة ناعمة .

- ربع ملعقة صغيرة من البابريكا .

- ملعقة صغيرة سكر أبيض .

- مكعب مرق .

- ملح .

- زيت ذرة لتسوية اللحمة .

- زيت دوار الشمس لقلي البطاطس والباذنجان .

طريقة التحضير :-

في البداية هنقشر ونقطع الباذنجان لحلقات أو تقطيع طولي وتكون القطع سمكها متوسط يعني لا تخينة أوي ولا رفيعة زيادة بعد كده هننقع قطع الباذنجان في ماء وملح حوالي ملعقة صغيرة وخل أبيض النقع ده بيساعد الباذنجان انه ميشربش زيت كثير وكمان يخفف من حدة الباذنجان بس النقع لايزيد عن 10دقائق / ربع ساعة قبل القلي علشان الباذنجان ميبقاش طري زيادة عن اللزوم ويشرب الزيت نفس الشئ بالنسبة للبطاطس هنعمل نفس الخطوات بس البطاطس ممكن ننقعها أكثر من ربع ساعة ، بعد كده هنبدأ بقلي البطاطس أولاً ثم نقلي الباذنجان ، بالنسبة للحمة المفرومة هنسخن شوية زيت ذرة على النار وننزل عليه باللحمة المفرومة ونضيف البهار الفلفل الأسود وبهار اللحمة والقرفة ونقلبهم كويس ونبدأ نفصل اللحمة من بعضها الملح يفضل يتحط في النهاية علشان تفضل اللحمة ناعمة ومتكتلش يعني تبقى متقسمة لكتل كبيرة مش صغيرة وناعمة بعد كده هنضيف البصل ونصف كمية الثوم ونقلبهم كويس مع بعض لحد ما البصل يذبل بعد كده هنضيف نصف كمية الطماطم المعصورة وعند عصر الطماطم في الخلاط نضيف ليها السكر علشان يقلل من حموضة الطماطم هنقلب نصف كمية عصير الطماطم مع اللحمة ونضيف مكعب المرق ونتأكد انه ذاب كويس هنسيب اللحمة على النار لحد ما الطماطم تستوي وتتسبك يعني يبدأ الماء اللي فيها يقل وتتشرب اللحمة بعد كده هنرفعها من على النار ونضيف باقي كمية الثوم المفروم ونقلبهم مع بعض بعد كده في طاجن أو صينية بايركس هنضيف في البداية باقي كمية عصير الطماطم ونرش عليه شوية فلفل أسود ونقلبه بعد كده هنبدأ نرص البطاطس فوق عصير الطماطم بعد كده هنضيف طبقة من قطع البذنجان على البطاطس بعد كده هنضيف اللحمة المفرومة ونوزعها في الصينية كلها بالتساوي وعلى اللحمة هنضيف طبقة ثانية من البطاطس و بعدها نضيف طبقة ثانية من الباذنجان وممكن لو حابين تضيفوا جبنة مع اللحمة أو على وش الصينية علشان تأخذ لون في الفرن ينفع جداً بعد كده هندخل الصينية الفرن ونسيبها على درجة حرارة عالية في الأول على ماتبدأ تغلي وبعد كده هنخفض الحرارة مش هتحتاج مدة كبيرة بعد الغليان 10 دقائق فقط وبعد كده ممكن تشغلوا شواية الفرن علشان تدي لون للصينية من فوق ، وبألف هنا ...

فيديو فيه طريقة الوصفة 

بشكل أوضح ⬇

لو بتقرأوا الموضوع ده من 

على الموبايل والفيديو مش 

ظاهر تقدروا تضغطوا على 

جملة ( عرض إصدار الويب ) 

الموجودة أسفل

 المدونة هيظهر الفيديو في 

نهاية الموضوع .

وجبات سريعة وسهلة جداً تنفع لفطور رمضان أو غدا للأيام العادية طريقة عمل الحواوشي والسجق الشرقي

 

كلنا بيجي علينا وقت بنحتار نعمل ايه على الغدا أو على الفطار في رمضان وبنبقى عايزين وجبات تكون سريعة وخفيفة وفي نفس الوقت يكون طعمها لذيذ وتفتح نفسنا على الأكل موضوع النهاردة عن وجبيتين سهلين جداً الحواوشي والسجق الشرقي الاثنين أحلى من

بعض ، أتمنى الطريقة تعجبكم .

مكونات ومقادير السجق :-

- 2 ثمرة طماطم مقشرة 

  ومقطعة لشرائح .

- فلفل رومي أخضر أو ألوان 

  فلفلة واحدة مقطعة قطع  

  متوسطةالحجم .

- بصلة كبيرة مقطعة لشرائح .

- فص ثوم واحد كبير الحجم 

  مفروم .

- زيت .

- ملعقة صغيرة من الهريسة .

- ربع ملعقة صغيرة من 

  الفلفل الأسود .

- ملح إذا كان السجق غير 

  حادق لأنه عادةً بيكون 

  الملح فيه زائد.

طريقة تحضير السجق :-

في البداية هنسخن شوية 

زيت على النار ونضيف ليه 

البصل ونقلبه شوية بعد كده 

هنضيف السجق بعد ما نفصل 

السجق من بعض ونقلبه مع 

البصل بعد ما السجق يبدأ 

ينشف هنضيف ليه الثوم و 

الفلفل الرومي و الفلفل 

الأسود هنقلب المكونات على 

النار ونسيبهم حوالي 10

دقائق على النار بعد 

كده هنضيف الطماطم 

والهريسة ونقلبهم مع بعض 

كويس السجق مابيأخذش 

وقت كبير في التسوية 

تقدروا تقطعوا السجق لقطع 

صغيرة وهو على النار 

بالمعلقة عادي أو ممكن 

تسيبوه بنفس الحجم بدون 

تقطيع مجرد ما الطماطم 

تذبل شوية هنرفع السجق 

والخضار من على النار وإحنا 

بننقل السجق لطبق التقديم 

يفضل إننا نصفيه كويس من 

السوائل اللي نزلت من 

الطماطم والبصل وممكن 

تحتفظوا بشوية منها حسب 

الرغبة .

ملحوظة :-

السجق بيكون متبل جاهز في 

المحلات علشان كده 

مبيحتجش إضافات من 

التوابل لإن كل محل أو 

سوبرماركت بيكون متبله 

بالطريقة الخاصة بيهم وعادةً 

بيكون الملح فيه زيادة 

علشان كده لو حاسين السجق 

مالح زيادة ممكن تغلوا مياه 

على النار وتضيفوا ليها 

السجق لمدة دقائق ويترفع 

من المياه علشان ميستويش 

زيادة عن اللزوم ويقلل من 

الملح الموجود فيه ممكن 

بعد كده تقلوا السجق في 

الزيت الأول وبعد كده 

تضيفواالمكوناتاللي ذكرتها .

مقادير ومكونات الحواوشي 

:-

- نصف كيلو من اللحمة 

  المفرومة .

- نصف كيلو بصل مفروم 

  ناعم .

- فلفلة واحدة من الفلفل 

  الأخضر الرومي مفرومة .

- نصف ملعقة صغيرة من 

  الهريسة حسب الرغبة .

- ربع ملعقة صغيرة من 

  الفلفل الأسود .

- ربع ملعقة صغيرة من 

  بهارات اللحمة .

- نصف ملعقة صغيرة من 

  الملح .

- رشة من القرفة الناعمة .

- زيت ذرة .

طريقة تحضير الحواوشي :-

هنضيف كل المكونات 

المذكورة على اللحمة 

المفرومة ونخلطهم 

كويس جداً مع اللحمة بعد 

كده هنجيب العيش ( الخبز ) 

وعادةً الحواوشي بيتعمل 

بالعيش المصري اللي بالردة 

بنفتح الرغيف من الطرف 

بيكون نصف فتحة بحيث 

نقدر نحشي الرغيف 

باللحمة ، بعد كده هنقسم 

اللحمة ونوزعها في أرغفة 

العيش ونفردها كويس في 

الرغيف بعد كده هنسخن 

الفرن وندهن العيش من فوق 

ومن تحت بالزيت ونضعه في 

صينية وندخله الفرن لحد ما 

يحمر من الأسفل بعد كده 

هنشغل شواية الفرن 

علشان نحمر وجه العيش لو 

حابين يفضل العيش مقرمش 

ويحتفظ بالتحميصة بتاعته 

متغطهوش بعد ما يخرج من 

الفرن أما لو عاوزينه طري 

فغطوه بعد ما يخرج من 

الفرن ، أتمنى تجربوا 

الوصفات دي وتعجبكم وبألف 

هنا...

فيديو فيه طريقة الوصفات 

بشكل أوضح ⬇

لو بتقرأوا الموضوع ده من 

على الموبايل والفيديو مش 

ظاهر تقدروا تضغطوا على 

جملة ( عرض إصدار الويب ) 

الموجودة أسفل

 المدونة هيظهر الفيديو في 

نهاية الموضوع .