طريقة مختلفة للوبيا ( لوبيا بالكفتة )

 

اللوبيا من البقوليات اللي بتحتوي على بروتين نباتي بنسبة عالية علشان كده هي من الأكلات المغذية جداً ممكن تجربوها مع الكفتة ، زي كفتة داود باشا بس بدل ما تكون مع صوص طماطم فقط هنعملها باللوبيا، أتمنى الطريقة تعجبكم .

مكونات ومقادير اللوبيا :-

- 2 بصلة متوسطة الحجم .

- نصف كيلو من الطماطم معصورة .

- ملعقتين كبار من الثوم المفروم .

- نصف كيلو من اللوبيا .

- ملعقة صغيرة من الكزبرة الجافة .

- ملعقة كبيرة من صلصة الطماطم .

- نصف ملعقة صغيرة من الكمون .

- نصف ملعقة صغيرة من الفلفل الأسود .

- ملعقة صغيرة سكر .

-2 مكعب مرق لحم أو دجاج. 

 - ملح .

- زيت / زبدة .

طريقة تحضير اللوبيا :-

الأول هننقع اللوبيا في الماء لمدة ساعة - ساعتين بعدها هنبدأ بسلق اللوبيا هنضيف اللوبيا للماء علشان تتسلق الماء يكون مغطي اللوبيا بزيادة وعند الغليان هنشيل الريم الأبيض اللي بيظهر على سطح الماء لأن الريم ده بيكون فيه الغازات الموجودة في اللوبيا واللي بتسبب انتفاخ المعدة فلازم يتشال بعد كده هنسيب اللوبيا في الماء على النار لحد ما تستوي نصف تسوية تغلي مرتين فقط ونطفي النار عليها  لأننا هنكمل تسويتها في صوص الطماطم فلازم اللوبيا متستويش بالكامل عند سلقها علشان تستحمل التسوية في الصوص بعد ما ننتهي من سلق اللوبيا هنصفيها من الماء كويس ونبدأ بفرم البصل فرم ناعم بعد كده هنحمر البصل على النار مع نصف كمية الثوم المفروم لحد ما يبقى لونهم ذهبي بعد كده هنضيف عصير الطماطم مع السكر وصلصة الطماطم والكمون والفلفل الأسود والكزبرة ومكعب المرق هنسيب الخليط يغلى على النار وبعد كده هنخفض النار  ونسيب عصير الطماطم يتسبك ( يصبح قوامه ثقيل والماء اللي فيه يتبخر ) بعد كده هنضيف باقي كمية الثوم المفروم واللوبيا المسلوقة ونقلبها كويس مع الطماطم والثوم والبصل ونكون غالين ماء على النار يكفي حسب كمية الطبخة وعدد الأفراد بعد ما نضيف اللوبيا هنزيد عليه الماء ونسيبه على نار عالية في البداية لحد ما تغلي على النار ثم نخفض النار ونسيب الطبخة لحد ما اللوبيا تقرب تستوي في الوقت ده هنضيف الكفتة للوبيا ونتركهم يكملوا تسوية ( الكفتة مش هتحتاج تستوي فلازم يكون فاضل وقت بسيط للوبيا علشان تستوي وبعد كده نضيف الكفتة ) كده تكون اللوبيا بالكفتة جاهزة للأكل .

مكونات ومقادير الكفتة :-

- نصف كيلو من اللحمة المفرومة .

- بصلة واحدة متوسطة و مفرومة فرم ناعم .

- ملح .

- ربع ملعقة صغيرة من الفلفل الأسود .

- نصف ملعقة صغيرة من بهارات اللحمة .

- نصف ملعقة صغيرة من الكمون .

- ربع ملعقة صغيرة من القرفةالبودر 

 ( أقل بقليل من ربع الملعقة ).

طريقة تحضير الكفتة :-

هنضيف البصل والبهارات للحمة ونخلطهم مع بعض كويس جداً لحد ما المكونات تندمج مع اللحمة بعد كده هنسيب اللحمة في الثلاجة لمدة نصف ساعة لو مستعجلين أو لو عندكوا وقت خلوها في الثلاجة أكثر علشان تتماسك ونقدر نشكلها بعد كده بسهولة وكمان تأخذ نكهة البصل والبهارات اللي ضفناها ، بعد كده هنخرجها من الثلاجة ونبدأ في تشكيلها ممكن نعملها بالشكل الدائري أو أصابع كفتة عادية حسب إختياركم بعد كده هنقليها على النار في زيت سخن لحد ما تتحمر هنصفيها من الزيت كويس و بعد كده نضيفها للوبيا .

وبكده الأكلة تكون جاهزة  ، وبألف هنا...

طريقة تخليل اللفت والجزر بطريقة سهلة ومضمونة👌

 

لكل فصل من فصول السنة أكله اللي بيميزه وبيكون مناسب ليه حسب احتياج الجسم في كل فصل من ضمن الأكلات دي هي مخلل اللفت اللي بيكون موجود في الشتاء وبيبقى حلو جداً جمب الأكل

المكونات والمقادير :-

 - 2 كيلو من اللفت .

- نصف كيلو من الجزر .

- حبة واحدة من البنجر

  ( الشمندر ) .

 - 4ملاعق كبار من الملح .

- 4 ملاعق كبار من الخل الأبيض .

 - 2 ملعقة كبيرة من السكر .

- ربع ملعقة كبيرة من الشطة البودر ( اختياري ) .

- 2 لتر من الماء .

طريقة التحضير :-

في البداية هنغلي 2 لتر من الماء ونسيبه يبرد تماماً وبعد كده هنبدأ نقطع السيقان الخضرة اللي موجودة في اللفت وممكن نسيب جزء بسيط منها بيفضل ملتصق باللفت نفسه والجزء ده من السيقان بنشيل كم ساق من الجزء الخارجي ونسيب السيقان اللي من الداخل زي ما موضح في الفيديو ( في ناس بتحب تأكل السيقان دي لو مش حابينها تقدروا تتخلصوا منها بالكامل ) وبنشيل الجزء الأبيض اللي في اللفت من تحت اللي بيكون فيه الجذور بتاعت اللفت ولو فيه أي جزء في قشر اللفت غير سليم بنشيله بس من غير مانشيل القشرة كلها وبنكون مجهزين طبق عميق ونضيف فيه ماء وقليل من الخل وكل ما نخلص وحدة لفت نحطها في الماء والخل علشان أي أوساخ على اللفت تتشال بعد كده بسهولة لما نيجي نغسله بعد ما نخلص كمية اللفت كلها هنقشر الجزر وبعد كده هنبدأ نغسلهم كويس جداً تحت الماء ونسبهم يصفوا من الماء ونبدأ بعدها نقطع اللفت والجزر لدوائر وبعدها نقطعهم لأصابع ونقشر حبة البنجر ونقطعها بنفس الطريقة ونخلطهم كلهم مع بعض بعد كده هنضيف للماء اللي غليناه الملح والسكر والخل والشطة ونقلبهم كويس في الماء وبعد كده نعبي البطرمانات اللي هنخلل فيها هنعبيها بخليط اللفت والجزر والبنجر هنملأ البطرمانت ونسيب جزء بسيط وبعد كده نضيف الماء للبطرمانات ونسيب ربع البطرمان فاضي من غير ماء علشان اللفت هينزل ماء منه وبالتالي الماء اللي في البطرمان هيزيد فلازم يكون في جزء في البطرمان فاضي ونقفل البطرمان كويس علشان الهواء ميدخلش للبطرمان وبكده تقدروا تأكلوا أحلى مخلل لفت وجزرهيأخذ حوالي 4 أيام وبعدها تقدروا تأكلوا منه  ، وبألف هنا...

أسهل وأسرع طريقة لتخزين القلقاس

 

بما إن موسم القلقاس بدأ حبيت أشارك معكم طريقة سهلة وسريعة لحفظ القلقاس في الفريزر لفترة طويلة من غير ما يغير طعمه أو يتأثر ، طريقة جميلة مبتحتجش وقت ولا مجهود كبير .

  المكونات :-

- 2 كيلو من القلقاس .

- 2 ليمون أصفر صغيرمن النوع صغير الحجم .

- أكياس حفظ الطعام أو علب حفظ الطعام .

 طريقة التحضير :-

في البداية هنغسل القلقاس تحت ماء جاري ويكون سخن يعني درجة حرارته تقدر إيدينا تستحملها هنغسله ونظفه بفرشاة خاصة بالخضروات بحركات دائرية هنظف القلقاس كويس علشان نشيل من عليه أي أوساخ ، بعد تنظيف القلقاس هنسيبه يصفي كويس من الماء تماماً وبعد التصفيه ننشفه برده بفوطة ناشفة علشان نتأكد انه تخلص من كل الماء اللي عليه ، بعد كده هنبدأ نقطعه لحلقات الأول قبل التقشير علشان يسهل عملية التقشير بدل ما نقشره قبل التقطيع وهو سليم ، بعد تقطيعه لحلقات وتقشيره هنأخذ كل قطعة من القلقاس ونمسحها بمنديل مطبخ غير مبلل ( لازم القلقاس ميتعرضش للماء أبداً بعد غسله وتجفيفه من الماء أول مرة وبنمسحه بمناديل المطبخ علشان لو عليه أي أجزاء بسيطة من القشرة الخارجية نشيلها ونظفه بالمنديل) بعد كده هنقطعه لأصابع متوسطة الحجم ثم نقطع أصابع القلقاس لمكعبات ونحاول نساوي مكعبات القلقاس في الحجم علشان عند طبخها تستوي في وقت واحد وتأخذ نفس التسوية ، بعد تقطيع كمية القلقاس اللي هنخزنها هنعصر عليه الليمون ونقلب القلقاس كويس جداً علشان يختلط بالليمون ويندمج معاه بشكل متساوي ، الليمون هيساعد على حفظ القلقاس ويفضل محتفظ بلونه من غير مايتغير بسبب التجميد ولا طعمه يتغير وبكده القلقاس يكون جاهز للتفريز تقدروا تقسموا القلقاس حسب الطبخة والكمية اللي هتحتاجوها كل مرة عند طهي القلقاس ممكن تحفظوه في الأكياس المخصصة لحفظ الطعام أو تحفظوه في علب التفريز أهم حاجة الأكياس أو العلب تكون محكمة الغلق علشان هواء الفريزر ميكونش ثلج داخل الأكياس أو العلب لأن ده هيأثر على طعم وجودة القلقاس ( مهم جداً إن أي أداة بتستخدموها في تقطيع القلقاس وتقشيره وكمان الأطباق ولوح التقطيع لازم كل الأدوات تكون جافة تماماً من الماء علشان المادة اللزجة الموجودة في القلقاس متظهرش ) وبكده تقدروا تحفظوا القلقاس لفترة طويلة وانتوا مطمئنين وبطريقة سهلة وسريعة  ، وبألف هنا...

طريقة عمل محشي الكوسة وورق العنب بالأرز واللحمة المفرومة

 

المقادير  :-

- 2 كيلو كوسة .

- ورق عنب .

- 8 حبات من الطماطم متوسطة الحجم معصورين .

- 3 حبات كبار من البصل مفرومين .

- 8 فصوص ثوم صغيرين مفرومين .

- نصف كيلو من اللحمة المفرومة .

- ربطة صغيرة من  ( الكزبرة / الشبت ) .

- ملعقة صغيرة سكر .

- ربع ملعقة صغيرة قرفة ناعمة .

- نصف ملعقة صغيرة من بهارات اللحمة .

- ملعقة صغيرة من الكمون .

- ملعقة صغيرة من البابريكا .

- ربع ملعقة صغيرة من الفلفل الأسود .

- ملح .

- 2 مكعب مرق .

- 1 كيلو أرز مصري .

- مرق لتسوية المحشي .

- زيت .

 

 التحضير :-

هنفرم الثوم ثم البصل كل نوع لوحده بعد كده على النار هنسخن زيت ذرة ونضيف عليها البصل المفروم هنقلب البصل ونسيبه لحد ما يذبل بعد كده هنضيف اللحمة المفرومة ونبدأ نفككها من بعضها وإحنا بنقلبها مع البصل نسيبها لحد ما اللون الوردي يتغير واللحمة تسمر شوية بعد كده هنضيف البهار 

( البابريكا / القرفة / الفلفل الأسود / بهار اللحمة ) ونقلبهم بشكل جيد مع اللحمة هنسيب اللحمة شوية على النار لحد ما تكون ناعمة تماماً ومفيهاش تكتلات بعد كده هنضيف الملح وعصير الطماطم والسكر على اللحمة ونقلبهم مع بعض هنسيب الطماطم تغلي وبعد كده هنضيف نصف كمية الخضرة المقطعة تقطيع متوسط 

( الكزبرة / الشبت ) والثوم ونقلبهم مع باقي المكونات ونسيبهم لحد ما الطماطم تستوي وتتسبك بعد كده نضيف الأرز والكمون  وباقي كمية الخضار المفروم ونقلب كل المكونات مع بعض بشكل جيد لحد ما المكونات تتداخل وتتجانس مع بعضها هنسيب المكونات على النار لمدة وبعد كده هنرفعها من على النار لحد ما تبرد وبعد كده نبدأ نحشي الكوسة وورق العنب وممكن كمان تحشوا بنفس الخلطة الفلفل الرومي بيبقى حلو كمان بالخلطة دي بعد ما نرص الكوسة في الحلة ( إناء الطهي ) ممكن نضيف على الوجه مكعب مرق بالنوع اللي تختاروه نفركه على كمية المحشي كلها على الوجه ونسقي المحشي بشوربة المرق سواء كانت دجاج أو بط أو لحمة هنضيف كمية من المرق تكفي لتسوية المحشي كذلك مع ورق العنب بس في ورق العنب ممكن بعد ما نملى الحلة لنصفها نفرك عليها مكعب مرق بشكل متساوي وبعدين نكمل رص باقي ورق العنب في الحلة ونسقيه بعد ما نخلص رص بكمية مناسبة من المرق لتسويته حاولوا وأنتم بتضيفوا المرق لورق العنب إنكم توزعوه في كل الاتجاهات وتحركوا الحلة وتهزوها شوية علشان المرق يتوغل لكل الطبقات ويستوي بشكل جيد ، وبألف هنا...

فيديو فيه طريقة الوصفة 

بشكل أوضح ⬇

لو بتقرأوا الموضوع ده من 

على الموبايل والفيديو مش 

ظاهر تقدروا تضغطوا على 

جملة ( عرض إصدار الويب ) 

الموجودة أسفل

 المدونة هيظهر الفيديو في 

نهاية الموضوع .

أسرع بيتزا ممكن تعملوها بيتزا التوست بسيطة ولذيذة جداً 👌

 

المكونات والمقادير :-

- 7 شرائح من التوست .

  ( الكمية دي تكفي لفردين )

- 4 أصابع من النقانق .

  ( هوت دوج )

- بصلة صغيرة مفرومة .

- 3 بيضات .

- 3 ملاعق كبار حليب .

- فلفل أسود .

- ملح .

- كاتشب ⬇

 أو صوص بيتزا أو صوص باربيكيو حسب المتوفر .

- جبنة موزاريلا وشيدر .

طريقة التحضير :-

هنبدأ بالبصل المفروم نسخن طاسة فيها شوية زيت ونضع عليه البصل لو حابين تحمروا البصل شوية هنسيبه على النار ونقلب من وقت للأخر لحد ما يبدأ يأخذ لون ذهبي بعد كده هنضيف عليه النقانق ( تقطع أصابع النقانق لدوائر متوسطة الحجم ) هنقلب النقانق مع البصل ونسيبها لحد ماتحمر والبصل يبقى ذهبي أما لوحابين البصل يذبل فقط على النار من غير ما يأخذ لون يبقى تضيفوا النقانق مع البصل من البداية علشان النقان تحمر والبصل يفضل أبيض ، بعد كده هنجهز طبقة التوست البديلة لعجينة البيتزا هنقطع شرائح التوست لمكعبات متوسطة ومتساوية الحجم بعد كده هنجهز خليط البيض هنضيف عليه الحليب بيكون ممتاز مع البيض وبيشيل زفارة البيض ونضيف رشة فلفل أسود وملح ونخفق البيض جيداً بعد كده في طبق عميق نضيف التوست ونصب عليه البيض المخفوق ونقلب التوست مع البيض لحد ما التوست يتشرب البيض كله بعد كده هنجيب طاسة ونوزع عليها التوست بشكل جيد

 البيض هيخلي التوست يتماسك مع بعضه ولما يستوي على النار طبقة التوست هتبقى قرص متماسك بعد ما وزعنا طبقة التوست في الطاسة هنجيب أي صوص جاهز ممكن نستخدم الكاتشب كبديل لصوص البيتزا أو صوص الباربيكيو اللي أنا عن نفسي استخدمته في الوصفة وكان طعمه لذيذ جداً ، هنبدأ بفرشة نوزع الصوص على التوست وعلى أطراف التوست بعد كده هنضيف طبقة بسيطة من الجبنة وبعدها بنضيف النقانق والبصل ونرجع نضيف طبقة ثانية من الجبنة فوق حشوة البيتزا ( النقانق والبصل ) وممكن نوزع شوية من الصوص اللي استخدمناه قبل كده نوزعه على الجبنة من فوق بيدي طعم أقوى وأحلى للبيتزا ، بعد كده هنضع الطاسة على النار على درجة حرارة منخفضة ونغطي عليها علشان تسخن من فوق والجبنة تسيح ، لازم تخلوا بالكم لأنها مش هتحتاج وقت كبير على النار مجرد ما طبقة التوست تحمر من تحت والجبنة تسيح إرفعوها على طول علشان البيض ما بيستحملش وممكن التوست يغمق أكثر ، وبكده تكونوا حضرتوا أسرع وأسهل بيتزا بطعم لذيذ جداً وطرية جداً جداً وكمان أطراف التوست بتبقى مقرمشة ولذيذة ، وممكن تعملوها بحشوات مختلفة زي اللحمة المعصجة أو شرائح الدجاج أو بالتونة تقدروا تعملوها بحشوات مختلفة وتبدعوا ، وبألف هنا...

فيديو فيه طريقة الوصفة 

بشكل أوضح ⬇

لو بتقرأوا الموضوع ده من 

على الموبايل والفيديو مش 

ظاهر تقدروا تضغطوا على 

جملة ( عرض إصدار الويب ) 

الموجودة أسفل

 المدونة هيظهر الفيديو في 

نهاية الموضوع .

طريقة عمل صوص الباربيكيو + صدور دجاج و خضار مشوي + مكرونة بصوص الطماطم والكريمة 👌

 

مكونات ومقادير صوص الباربيكيو :-

- كوب إلا ربع من الكاتشب 

  مخفف بربع كوب ماء .

- ربع كوب من الخل الأبيض أو خل التفاح وممكن تستخدموا 

  كمية أقل من الخل حسب الرغبة .

- 2 ملعقة كبيرة من العسل الأسود .

- ملعقة كبيرة من المستردة .

- ربع كوب من السكر البني .

- ملعقة صغيرة من الملح .

- نصف ملعقة صغيرة من( الكمون/ ثوم بودر/ كركم/  بابريكا ) 

- ربع ملعقة صغيرة من الفلفل الأسود .

طريقة تحضير صوص الباربيكيو:-

هنخلط كل المكونات اللي ذكرتها ونقلبهم في البداية على البارد بعد كده 

هنضعهم على نار متوسطة هنسيب المكونات لحد الغليان ونقلب 

فيهم كويس جداً علشان المكونات تندمج وتذوب تماماً هنسيب الصوص على 

النار يغلي مرتين ثلاثة فقط هنلاحظ إن لونه أصبح غامق 

وقوامه أصبح أثقل زي الصوص الجاهز بعد كده هنرفعه من على النار ونسيبه 

لحد ما يبرد تماما ًعلشان نقدرنتبل بيه الدجاج .

طريقة تحضير الدجاج المشوي:-

هنحتاج صدور دجاج الكمية حسب الرغبة تكون مقطعة

 قطع متوسطة الحجم من حيث السمك وتكون القطع

 بالطول زي البانيه بس تكون أتخن شوية في السمك 

علشان تستحمل الشوي وتكون طرية مش ناشفة وفي نفس

 الوقت تستوي بسرعة، هنتبل صدور الدجاج بصوص

 الباربيكيو بنأخذ ملعقتين من الصوص ونضعهم في الطبق

 اللي هنتبل فيه ونبدأ نضيف صدور الدجاج قطعة قطعة 

كل ما نحس إن الصوص بيقل نضيف كمية بالملعقة ونتبل

 باقي قطع صدور الدجاج كويس من الجهتين ونخليهم

 مفرودين في الطبق وبعد كده نقدر نحفظهم في الثلاجة

 لثاني يوم ، عند بدء الشوي لازم نسخن الشواية أو الطاسة 

على النار كويس جداً والزيت يكون سخن بعد كده

 نضع قطع الدجاج ، السخونة مطلوبة علشان الفراخ تفضل

 محتفظة بعصارتها متنزلهاش وتبقى ناشفة السخونة

 بتخافظ عليها علشان تفضل طرية وتستوي بسرعة 

 هنشوي الصدور من الجهتين ولما يأخذوا اللون المطلوب

 ويستوا نرفعهم من على النار ، ونقدر نقدم معاهم باقي

 الصوص علشان نغمس بيه أو نضيف منه على الأكل أو

 تحتفظوا بيه في علبة محكمة الغلق وتضيفوا شوية

 زيت طعام على الوجه وتتركوه في الثلاجة لحين

 إستخدامه مرة أخرى أو في الفريزر لو حابين 

 تحتفظوا بيه وقت أطول .

طريقة شوي الخضار المشكل :-

تقدروا تستخدموا الخضار اللي بتحبوه أنا إستخدمت في الوصفةدي الفاصوليا 

والجزر والكوسة والبطاطس تقدروا تستخدموا كمان الباذنجان وأعواد الذرة 

الصفراء ، كل اللي هتعملوه هتغسلوا الخضار كويس جداً وتنقعوه

 في ماء وخل لدقائق وتصفوه كويس بعد كده نقشر الجزر والبطاطس ونشيل 

من الكوسة الجزء اللي فوق والجزء الأصفر اللي بيكون موجود فيها من تحت 

والفاصوليا بنشيل بس مكان العنقود من فوق وتحت ونسيبها زي ماهيه

بنفس الطول دون تقطيع أما باقي الخضار ممكن نقطعه مكعبات أو أصابع 

متوسطة الحجم علشان تستوي بشكل أسهل ، هنشويهم عادي على الجريل أو 

الطاسة هنضيف مكعب زبدة مع شوية زيت ونسخنهم بعد كده هنضيف

 الخضار ونقلب فيه لحد ما يستوي ، الفاصوليا والجزر ما بيأخذوش وقت كبير 

زي البطاطس كمان الكوسةبتستوي أسرع من البطاطس فممكن تخلوا كل نوع 

لوحده أو تشوا الخضار كله مع بعض وكل ما نوع منهم يستوي ترفعوه من على 

النار .

مكونات ومقادير المكرونة

 بصوص الطماطم والكريمة :-

- 800 جرام من المكرونة القلم

  المسلوقة نصف تسوية .

- حبة بصل واحدة كبيرة

  الحجم مفرومةناعم .

- 4 فصوص ثوم مفرومين .

- 6 حبات من الطماطم متوسطة الحجم ومعصورة .

- نصف ملعقة صغيرة من الملح .

- ربع ملعقة صغيرة من الفلفل  الأسود .

- نصف ملعقة صغيرة من   الكمون .

- ملعقة صغيرة من الزعتر الجاف .

- ملعقة صغيرة من السكر .

- كوب من كريمة الطبخ أو  أكثر حسب إحتياج الطبخة .

- زيت ذرة .

- زبدة حسب الرغبة .

طريقة تحضير المكرونة :-

هنسخن زيت وزبدة على النار ونبدأ بإضافة الثوم والبصل هنقلبهم على النار 

لحد ما البصل يذبل بعد كده هنضيف عصير الطماطم ونضيف البهارات ( الملح 

/ الفلفل / الكمون / الزعتر / السكر ) نقلبهم مع بعض ونسيبهم على النار لحد ما 

الطماطم تبدأ تتقل وتفقد الماء اللي فيها بعد كده هنضيف الكريمة على صوص

 الطماطم ونقلب لحد ما نلاقي إن لون الطماطم أصبح أفتح وأخذ لون 

وردي فاتح تقدروا تضيفوا كمية من الكريمة لحد ما تحصلوا على اللون 

المطلوب بعد كده هنسيب الصوص يغلي غلوتين وبعدها نبدأ نضيف المكرونة 

بالتدريج ونقلب بهدوء لحد ما المكرونةتتشبع من الصوص وممكن تضيفوا جبنة 

النوع اللي تفضلوه مع المكرونة أو عند التقديم ، وبألف هنا...

فيديو فيه طريقة الوصفة 

بشكل أوضح ⬇

لو بتقرأوا الموضوع ده من 

على الموبايل والفيديو مش 

ظاهر تقدروا تضغطوا على 

جملة ( عرض إصدار الويب ) 

الموجودة أسفل

 المدونة هيظهر الفيديو في 

نهاية الموضوع .