معرض القاهرة الدولي للكتاب

 اقبال كبير على معرض القاهرة الدولي للكتاب في أيامه الأخيرة من النسخة 54 لعام 2023 بمركز مصر للمعارض والمؤتمرات الدولية خلف مسجد المشير طنطاوي بالقاهرة الجديدة التجمع الخامس ، باقي يومان فقط لحد 6 فبراير المعرض مفتوح للجمهور من الساعة 10 صباحًا حتى الساعة 8 مساءً ، زيارتي للمعرض كانت الجمعة 3 فبراير ولأن يوم الجمعة عطلة رسمية في الدولة فده كان أحد أسباب الزحام الشديد ولكن مع ذلك تسهيلات الدخول وشراء التذاكر كانت سهلة تقدروا تشتروا التذكرة أونلاين لتسهيل الدخول للمعرض من خلال الرابط https://cairobookfair.gebo.gov.eg/ ، يوجد بالمعرض أجنحة متنوعة حسبب تخصصات الكتب المعروضة بها مثل جناح بيع الكتب العربية بقاعة 1 جناح B1 / جناح بيع الكتب الانجليزية بقاعة 2 جناح C52 / جناح الكتب المخفضة بقاعة 4 جناح C35 / جناح كتب الأطفال بقاعة 5 جناح B6 ، ده غير الفعاليات والأنشطة المختلفة الثقافية والترفيهية للكبار والصغار ويوجد منطقة ألعاب للأطفال فالكل هيقدر يستمتع بالزيارة الكبار والصغار ، علشان كده يفضل الذهاب في الساعات الأولى من فتح المعرض من العاشرة صباحاً علشان تقدروا تزوروا أكبر عدد من دور النشر وأيضاً تحضروا فعاليات المعرض ، تقدروا تاخدوا مياه للشرب وسناكس بسيطة لو رايحين من بدري وهتقضوا اليوم هناك وهتلاقوا برده منطقة للمطاعم وكافتريات متنوعة هناك وقعدات علشان ترتاحوا وترجعوا تكملوا لف في المعرض ، المكان هناك نظيف جداً حتى دورات المياه نظيفة مع ان العدد والزحام كبير بس في اهتمام جيد وتنظيم ، الأفضل تحددوا الكتب اللي حابين تشتروها قبل ما تزوروا المعرض تقدروا تشوفوا فيديوهات على يوتيوب لأكثر الكتب مبيعاً أو ملخصات لأفضل الكتب قراءةً أو حسب الكاتب اللي بتفضلوه وممكن تزوروا صفحات الفيس بوك لأفضل دور النشر وتشوفوا العروض والتخفيضات اللي عاملنها في المعرض وتتعرفوا على الكتب اللي بينشروها علشان تقدروا تحددوا الميزانية اللي محتجنها لشراء الكتب اللي اخترتوها وممكن تعملوا مبلغ زيادة تخلوه على جنب علشان لو لاقيتوا كتب زيادة في المعرض محتاجين تشتروها غير الكتب اللي حددتوها قبل ما تروحوا للمعرض ، من أبرز دور النشر الموجودة في المعرض دار دَون للنشر / دار دارك / دار ن للنشر والتوزيع / الدار اللبنانية المصرية / دار نهضة مصر / دار المحروسة / وطبعاً الهيئة العامة للكتاب وسور الأزبكية وغيرهم كتير من دور النشر المميزة بكل التخصصات الدينية و التخصصات الجامعية زي الكتب القانونية والطبية وتعلم اللغات والتجارة الالكترونية والتسويق وغيرهم الكثير .