الفراخ المشوية نقدر نعملها في البيت بكل سهولة من غير فحم
بس الطعم رائع ونفس طعم الفراخ المشوية الجاهزة تتبيلة
جميلة جداً وكمان هقدم معاها الأرز الأصفر المبهر وطعم زي
المطاعم وأحلى ، أتمنى الطريقة تعجبكم .
مقادير ومكونات الفراخ المشوية :-
- في الوصفة دي إستخدمت 6 قطع من الفراخ يعني فرخة
ونصف متقسمين 6 قطع .
- 2 علبة زبادي .
- 2 ليمونة صغيرة .
- 2 ملعقة كبيرة من الخل .
- ملعقة كبيرة من بهار الدجاج .
- ملعقة كبيرة من الزعتر الناشف .
- ملعقة كبيرة من الثوم البودر .
- ملعقة كبيرة من البصل البودر .
- ملح .
- نصف ملعقة كبيرة من الفلفل الأسود .
- ملعقة كبيرة من الثوم المفروم .
- بصلة كبيرة مفرومة نعصرها ونأخذ ماء البصل فقط .
- 2 ملعقة كبيرة من الصويا صوص .
- 2 ملعقة كبيرة من المستردة .
- 2 ملعقة كبيرة من الكاتشب .
طريقة تحضير الفراخ المشوية :-
هنضيف المكونات الجافة ونضيف عليها المكونات السائلة
ونعصر الليمون وممكن نحتفظ بقشره بعد ما نخلط المكونات
كويس جداً هنضيف قطع الفراخ والفراخ بتكون بالجلد وبنعمل
فيها خطوط بالسكينة على اللحم علشان نفتح الأنسجة وكمان
التتبيلة تدخل للحم الفراخ من الداخل هنتبل الفراخ كويس ونخلي
المكونات تدخل في الفتحات اللي عملناها بعد كده هنغطي الطبق
اللي فيه الفراخ المتبلة وممكن نحط قشر الليمون معاه بيبقى
أحلى في الطعم ولازم الفراخ تكون مغمورة في التتبيلة واحنا
بنغطيها ونحفظها في الثلاجة يفضل يوم كامل قبل الشوي ، عند
الشوي هنسخن الشواية اللي بتتحط على البوتاجاز أو الطاسة
حسب المتوفر عندكم وهنمسح الشواية بشوية زيت ونسخنها
كويس قبل مانحط عليها الفراخ بعد كده هنبدأ نضيف قطع الفراخ
على ناحية الجلد الأول وبنسبها على الشواية لحد ماتأخذ لون
الشوي الجميل بعد كده في صينية هنضيف خليط التتبيلة ونضيف
عليه شوية زيت ذرة ونحط عليه قطع الفراخ على ناحية العظم
ونمسح الفراخ بشوية زيت على الجلد علشان متنشفش في
الفرن ونسيبها في الفرن لحد ما تستوي تماماً الطريقة دي
بتخلي الفراخ تشرب من طعم التتبيلة وهي في الفرن وبتكون
طرية مش ناشفة وممكن لو حابين تشغلوا شواية الفرن علشان
الفراخ تأخذ لون زيادة بعد ماتستوي وبعد ما نطلع الفراخ من
الفرن ممكن تمسحوا على قطع الفراخ بشوية زيت وتغطوها
لحين التقديم علشان تفضل طرية ويكون فيها لمعة .
مقادير ومكونات الأرز المبهر :-
- كيلو من الأرز البسمتي .
- 3 أعواد من القرفة .
- 3 أوراق من ورق الغار .
- ملعقة صغيرة من الهيل ( الحبهان ) المطحون .
- 5 أعواد قرنفل .
- نصف ملعقة كبيرة من الكاري .
- 3 مكعبات من مرق الدجاج .
- ملعقة صغيرة من الزعفران البودر .
- زيت .
- زبدة حسب الرغبة .
طريقة تحضير الأرز المبهر :-
في حلة ( طنجرة ) على النار هنسخن زيت ذرة ونضيف ليه
البهارات اللي ذكرتها في المقادير ما عدا مكعبات المرق علشان
ماتتحرقش هنسخن القرفة والهيل والقرنفل وورق الغار والكاري
لحد ما نحس بريحة التوابل دي كلها ظهرت لازم تسخن لأن
الطريقة دي بتدي ريحة وطعم حلو جداً ولذيذ للأرز بعد كده هنزل
الأرز المغسول ويكون مصفى كويس من المياه هنقلب الأرز مع
البهارات كويس ونضيف مكعبات زبدة حسب الرغبة نقلب الأرز
كويس على النار لحد ما نحس انه نشف من المياه اللي كنا
غاسلينه فيها بعد كده هننزل بمكعبات المرق والملح ونكون
غالين مياه على النار علشان نسوي بيها الأرز الأرز البسمتي
عادةً الكوب الواحد منه بيحتاج ل2 كوب مياه علشان يستوي بعد
ما نضيف المياه للأرز هنقلب الأرز كويس مع المياه ونتأكد ان
مكعبات المرق ذابت هنعلى النار في البداية لحد ما مياه الأرز
تغلي بعد كده هنخفض النار لأقل درجة ومنقلبش الأرز تاني
علشان مايعجنش من كثرة التقليب ونسيبه يستوي على النار ،
وبكده هتأكلوا أحلى أرز مبهر عاملينه بإيدكم .
فيديو فيه الطريقة موضحة بالتفصيل ⬇
