نكهات أيس كريم Wonderville المفضلة و شيبس Raw

الأيس كريم من الحلويات المفضلة لدى الجميع معتقدش أن في حد ممكن يكون مبيحبش الأيس كريم أو ممكن يكون نسبة بسيطة من الناس ليها رأي تاني ، نكهات الأيس كريم التقليدية المفضلة عندي هي الفانيليا والشيكولاتة خاصة اللي بتكون مع stick فانيليا ومغطاة بالشيكولاتة والفراولة بس طبعا صناعة الأيس كريم مبقتش مقتصرة فقط على النكهات دي لأ أصبح في تطور عام بعد عام في النكهات وطريقة التقديم والتغليف وغيرهم ، وطبعا أغلب الشركات اللي كانت منتشرة في السوق المصري والعربي بشكل عام هي الشركات الأجنبية زي(  نستلة / دولسي / ميجا / كيمو كونو / برادايس / كارنفاليتا / أوريو / سنيكرز / دايري ميلك / كولد ستون )  وكل الشركات السابق ذكرها حتى لو كانت بتصنع في دولنا العربية إلا أنها تظل شركات أجنبية أرباح مشترياتنا من تلك الشركات بتروح للشركة الأم وبالتالي الإقبال الكبير عليها بيخلي شركات كتير تقبل على شراء أسهم في تلك الشركات من أجل التربح خاصة أن كل الشركات السابق ذكرها مدرجة في سوق البورصة الأمريكية وبالتالي شركات زي شركات بلاك روك وفانجرد الداعمين للكيان الصهيوني بيكون ليهم نسبة من تلك الأرباح ومن بعد أحداث 7 أكتوبر 2023 أصبح في وعي أكثر  عند الناس بأهمية مقاطعة أي منتج أجنبي بيكون من ضمن المالكين لأكبر نسبة في الأسهم الخاصة بهم زي شركات بلاك روك و فانجرد ودي مش رفاهية ده واجب وأقل شئ نعمله كبشر ، و طبعا ده مش مقتصر على الايس كريم والشيبس أكيد لأ المقاطعة بتشمل كل المجالات سواء في الأغذية والمشروبات والتجميل والملابس الأحذية الشنط ملابس الرياضة الإكسسوارات وغيرهم .... طالما في بدائل تبقى المقاطعة واجب علينا وحتى المنتجات لو ملهاش بديل ونقدر نستغني عنها لأنها مش أساسية أو فيها حياتنا وممتنا يبقى الأفضل نستغني عنها .

من الأيس كريم اللي جربته بعد المقاطعة وعجبني جدا هو أيس كريم Wonderville في نكهات حبيتها جدا زي  :-

- أيس كريم الفانيليا مع قمع البسكويت ( cone ) طعمه كان لذيذ جدا والكمية كبيرة يعني الأيس كريم موجود لحد أخر قطعة في البسكوت بجد تحسوا بشبع وانتوا بتكلوه وأخر جزء من طرف البسكوت محطوط عليها صوص شيكولاتة ، كمان في من نفس لاين البسكوت نكهات تانية بس أنا جربت فقط الفانيليا وغزل البنات ( cotton candy ) غزل البنات كمان كان حلو بس سكره زيادة وأنا مبحبش الحلويات يكون فيها سكر زيادة عن اللزوم علشان كده حبيت أكثر اللي بالفانيليا. 

- جربت كمان أيس كريم زبادي بالتوت مغطى بالشيكولاتة البيضاء مع استيك ( stick ) الخشب الشيكولاتة البيضاء طعمها كان حلو بس الأيس كريم نفسه من جوه كان طعمه فيه مزازة يعني علشان بالزبادي وكده بس ده محبتهوش يمكن لو المزازة أخف شوية كنت حبيته أكثر ، كمان كان فيه قطع كده بطعم التوت على الشيكولاتة والأيس كريم بس مشكلتي في المزازة اللي في الطعم .

- كمان جربت أيس كريم بنكهة الفراولة كان في عبوة بلاستيك صغيرة دي كانت حلوة جدا عجبني الطعم والعبوة نفسها الألوان وكل حاجة فيها كانت حلوة هما عموما التغليف والألوان والتصميمات الخاصة بالمنتجات عندهم حلوة وفيها ذوق ، بالنسبة للعبوة البلاستيك الصغيرة اللي بنكهة الفراولة بيجي معاها ملعقة صغيرة بلاستيك بيضاء بتبقى مثبتة  في غطاء العبوة من الداخل يعني لو أكلت جزء من الأيس كريم أقدر أقفل العبوة وأثبت فيها الملعقة وأحفظها في الفريزر لما أحب أكلها مرة تانية حبيت فكرتها جدا .

وطبعا في نكهات أخرى بس دي النكهات اللي جربتها وعجبتني لحد دلوقتي ، أنا من الناس اللي مبحبش أجرب حاجات كتير خاصة في الأكل والشرب بجرب كام  حاجة ولما استقر على حاجة عجبتني وحبتها خلاص مبجربش حاجة تانية غير بعد فترة لما أحس إني محتاجة أجرب حاجة جديدة .   

- في نوع من  أنواع الشيبس المصري الموجود في السوق اسمه Raw وهو مصري المنشأ والشركة المالكة للمنتج شركة مصرية هي ظهرت في مصر من فترة طويلة من قبل أحداث 7 أكتوبر والمقاطعة ومن وقت ما ظهر أنا جربته وكان بالنسبالي من المفضلات في الشيبس لأنه فعليا من أنظف أنواع الشيبس الموجودة في السوق جودته عالية جدا الشيبس بتاعه نظيف مبقلقش وأنا باكل أن يكون فيه واحدة شيبس غير سليمة أو غير صالحة للأكل باكل منه وأنا مطمئنة كمان النكهات بتاعته رائعة والطعم واضح يعني مش نكهة ضعيفة أو بعيدة عن النكهة المكتوبة على الكيس لأ النكهات عندهم جميلة جدا وواضحة ، ورأي دي عن النكهات اللي أنا جربتها زي نكهة الكريمة الحامضة مع الأعشاب ونكهة الفلفل الحلو بس مشكلتي مع الفلفل الحلو انه حار لو بارد كان هيبقى التوب بالنسبالي وكمان جربت نكهة الهالوبينو ودي مع أنها حارة شوية بس طعمها تحفة وبيرجعني لذكريات جميلة لأن نكهته نفس نكهة شيبس عمان الموجود في الخليج وأنا كنت بحبه في الفترة اللي كنت مقيمة فيها في الخليج كنت بحب شيبس عمان و سلاطة وده كان اسم لنوع تاني من الشيبس العماني اللي كان موجود في الأسواق الخليجية ومازال بس لأن في مصر شيبس عمان غير متوفر عندنا فكان أقرب طعم ليه ويكاد يكون نفسه هو شيبس Raw بالهالوبينو .

لو حابين تتعرفواعلى قناتي على اليوتيوب ممكن تشوفوا الفيديو ⬇     

طريقة سهلة لعمل الفطائر بدون مجهود كبير

 

الفطائر من الأكلات المميزة وكتير من الناس بيفضلوها خاصة إنها بتتعمل بطرق متعددة وحشوات متنوعة ، مشكلتها الوحيدة بالنسبة لي المجهود والوقت اللي بتأخذه في التشكيل علشان أقسم كمية العجين وأعمل فطائر صغيرة على حسب كمية العجين ده بيحتاج وقت ومجهود كبير ، حبيت أختصر  الموضوع وأعمل بدل الفطائر الصغيرة أعمل فطيرة واحدة كبيرة وأقسمها بعد التسوية لأحجام صغيرة وبكده أكون سهلت عليا الموضوع واختصرت الوقت والمجهود بالذات في أيام الصيف الحارة اللي بنعاني منها هذا العام ، وقفة المطبخ بتكون صعبة في هذه الأجواء الحارة علشان كده حبيت أجرب الطريقة دي وفعلا كانت تجربة ناجحة وعجبتني جدا ، أنا إستخدمت في الحشوات الجبنة والزعتر فقط تقدروا تستخدموا حشوات أخرى مختلفة الطريقة كانت سريعة جدا والطعم لذيذ ، في الأسفل فيديو بيوضح الطريقة أتمنى تجربوها وتعجبكم .

- المقادير والمكونات :- 

- كيلو من الدقيق الأبيض حوالي 4 أكواب .

- نصف ملعقة كبيرة من البيكنج بودر .

- ملعقة كبيرة ونصف من الخميرة الفورية .

- ملعقة صغيرة من السكر .

- رشة بسيطة من الملح .

- كوب ونصف من الحليب .

- ربع كوب من زيت الزيتون . ( يمكن استبداله بزيت الذرة )

( قد يختلف إحتياج الدقيق للسوائل من الحليب والزيت حسب نوع الدقيق ، يختلف من نوع لأخر ) 

( المكونات جميعها بدرجة حرارة الغرفة )

- المكونات الخاصة بالحشوات :- 

- سمسم .

- زعتر أخضر بالسمسم المخصص للطعام .

- زيت زيتون وزيت ذرة لخلطهم مع الزعتر .

- أنواع مختلفة من الجبن حسب المتوفر في هذه الوصفة استخدمت خليط من الأجبان السورية من الجبن النابلسي والجبن المجدول هذه الأجبان عند تعرضها للحرارة تعطي نتيجة مثل الموزاريلا وأفضل من حيث الطعم ولكن من الممكن استخدام أي نوع من الأجبان المتوفرة لديكم حسب الرغبة مع إضافة جبن الموزاريلا .

- طريقة التحضير :- 

في وعاء عميق للعجن نضيف المكونات الجافة الدقيق ثم السكر والخميرة والبيكنج بودر والملح ونقلبهم جيدا ، ثم نضيف الحليب ونقلب قليلا ثم نبدأ بالعجن بعد أن يندمج الحليب جيدا مع العجين نبدأ في إضافة الزيت ونكمل العجن حتى تصبح العجينة متماسكة وطرية لا هي ناشفة ولا طرية زيادة عن اللزوم حتى لا تلتصق في اليد عند فردها ، يمكننا زيادة الحليب قليلا وبالتدريج إذا كانت العجينة ناشفة وإذا كانت طرية زيادة عن اللزوم نضيف القليل من الدقيق ، أحيانا تكون العجينة جيدة ولكن مازالت تلتصق في اليد هذا من الممكن أن يكون بسبب اليد إذا مسحنا اليد بقليل من الزيت سيحل الأمر .

بعد الإنتهاء من العجن نقوم بتغطية الوعاء جيدا وتركه قليلا حوالي نصف ساعة بالنسبة لفصل الصيف حتى يختمر العجين ثم بعد التخمر نضع العجينة في صينية مدهونةبالزيت تكون مناسبة لحجم العجينة وحسب حجم الفطيرة التي نحتاجها ثم نفردها جيدا ونمرر الشوكة على العجينة ونصنع نقاط بسيطة على سطح العجينة بالشوكة ثم نبدأ في وضع الحشوات ثم تترك الفطيرةحوالي ربع ساعة  قبل وضعها في الفرن ، يمكننا تقسيم الفطيرة بالحشوات حسب الرغبة ، كما موضح بالفيديو ⬇

ملابس رياضية مناسبة للمحجبات في الجيم وللمشاوير السريعة البسيطة

 

في شهر نوفمبر من العام الماضي قررت إني أمارس الرياضة وابتديت البحث عن جيم مناسب لي ويكون قريب من السكن وبعد البحث وإيجاد الجيم المناسب دخلت في مرحلة بحث أخرى عن ملابس تكون مناسبة للجيم وطبعا في الوقت ده كنا في الخريف والجو كان بارد ، واستقريت على موقع معين أشتري منه التيشيرت هي خامتها dry fit وبيكون مقاسها مظبوط على الجسم يعني بتبقى مجسمة مفيهاش وسع وفيها خيارات حلوة ومتعددة في الألوان وكمان أسعارها كانت مناسبة جدا بالنسبة للجودة وهي صناعة مصرية ، وقلت بما إن الجو برد وداخلين على الشتاء فقلت مفيش مشكلة اقدر البس جاكيت فوق التيشيرت يكون أطول وأوسع بما إني محجبة فالتيشيرت مش مناسب بالنسبة لي علشان أمشي بيه لأن المسافة قريبة مابين بيتي والجيم فبروح مشي ، لم أجد عيوب أو مشكلة في التيشيرت ماعدا ملاحظة واحدة وهي إن عند غسلهم في مياه درجة حرارتها عالية الألوان بتخرط يعني بتنزل في الماء وده حصل أول مرة لما غسلتهم على ايدي بس أنا سبتهم شوية في الماء الساخن قبل الغسيل بس الألوان لم تبهت ومكتوب عليهم تعليمات الغسيل والكوي هما المفروض يتغسلوا يدويا بس أنا غسلتهم بعد كده في الغسالة أكثر من مرة على درجة حرارة 40 لم يحدث لهم شيء ولم استخدم الكلور فقط صابون ومنعم الأقمشة ، وطبعا احتجت بناطيل تكون واسعة ومريحة علشان أقدر أخرج وأروح بيها للجيم وأتمرن بيها وتكون مناسبة لي كمحجبة ، مع إن الجيم للسيدات فقط بس أنا مبحبش إني أغير ملابسي فيه علشان كده كنت بدور على لبس ينفع أروح بيه الجيم وابدء تمرين بيه على طول من غير تغيير ، الموقع اللي اخترت منه التيشيرت مكنش فيه خيارات كثير للبناطيل الواسعة أغلبهم كان leggings والواسع ملقتش فيه مقاسي فا خترت موقع تاني اشتري منه البناطيل وده عندي بعض الملاحظات عليه أولا المقاسات محتاجين يظبطوها لاني اخترت أصغر مقاس m والموديل اللي متصورة بالبناطيل كانت رفيعة فأنا اشتريت على هذا الأساس بس بعد ما وصلتني البناطيل لاقيت إن المقاسات أكبر بقليل من عند الوسط ماعدا بنطلون كان كبير شوية عند الوسط وكبير جدا في عرض الرجل نفسها البناطيل اللي كانت واسعة حاجة بسيطة قدرت أظبطها على إيدي في البيت وحليت  المشكلة أما الملاحظة الثانية إن البناطيل لونهم  أسود وكحلي وفيهم خطوط بيضاء وألوانهم بتنزل في الماء حتى مع درجة الحرارة المنخفضة فلازم أغسلهم مع ألوان غامقة لكن من ناحية الشكل هما حلوين جدا في اللبس وخامتهم مريحة ، وصلتني الملابس وسجلت في الجيم وبدأت في فترة الشتاء وكنت مستمتعة الحقيقة بالقرار ده ، نيجي بعد كده لفترة الصيف ولاقتني مكنتش عاملة حسابي على اللبس في فترة الصيف خاصة إن سنة 2024 الصيف فيها أصعب من أي صيف عدى على مصر قبل كده فا في بداية الصيف وقبل الحر القاسي اللي شهدناه في مصر لأول مرة بالشكل ده قررت أرجع أبحث عن ملابس مناسبة للصيف وهنا كنت محتاجة أختار تيشيرت تكون طويلة وواسعة علشان أمشي بيها عادي في الشارع وأتمرن بيها من غير ما أحتاج لتغيير اللبس وفي نفس الوقت تكون خفيفة ، ووقع اختياري على حساب على الإنستجرام بيبيع ملابس رياضية نسائية خامتها حلوة جدا هي برده خامتها dry fit زي اللي اشترتهم في الشتاء بس خامتهم ناعمة جدا على الجسم ومش بحس بالتعرق بسبب شدة الحرارة يمكن لإن أنا معنديش مشكلة في التعرق يعني الموضوع طبيعي عندي بس هما خامتهم خفيفة ومريحة جدا في اللبس وكمان في موديلات مختلفة وألوان متعددة وفي خامة بتكون ناعمة أوي وفيها لمعة وخامة تانية متوسطة النعومة وألوانها مطفية وفيهم مكان لإصبع الإبهام وده كان جزء من طلبي عند البحث ، فكل التيشيرت اللي اشترتها سواء في الشتاء أو في الصيف كان فيهم الجزء ده ، هما بس كان في مشكلة واحدة في المقاس برده إنهم طلعوا أوسع وأطول فظبط المقاس عند الخياط والسبب ان اخترت مقاس بيلبس من 50 كيلو لحد 70 وده أصغر حاجة عندهم في المقاسات وانا كمان وزني أقل من 50 بشوية يعني حتى لو 50 بالظبط هيبقى المقاس كبير برده لأن هيبقى المقاس مناسب أكثر لل60 وال70 كيلو بس بعد ما ظبط المقاس عند الخياط أصبحوا مناسبين في الطول والوسع وبحس براحة في المشي والتمرين بيهم وكمان خامتهم خفيفة على الجسم وبقدر أغسلهم في الغسالة عادي لأن تعليمات الغسيل المكتوبة عليهم بتسمح بده وبالنسبة لأسعارهم هي أسعار متوسطة وبيبقوا عاملين عروض كل فترة فبتبقى الأسعار أفضل وكمان الصناعة مصرية .

دي كانت تجربتي بإختصار مع ملابس الجيم حبيت أشاركها للمهتمين بنفس الموضوع لعلها تساعد حتى لو بفكرة روابط المواقع اللي إشتريت منها ⬇ .

 اللبس اللي اخترته أتاح لي الفرصة إني البسه مش بس في الجيم لأ كمان لو نازلة أشتري حاجة بسيطة وراجعة البيت أو لو مشوار بعيد شوية بس عايزة ألبس حاجة مريحة غير لبس الخروج المعتاد أو حتى لو جنينة نادي هيكون اللبس مناسب جدا في الأماكن والمشاوير دي مش بس مقتصر على الجيم وده كان أحد أسباب اختياري للبس اللي اشتريته ، أتمنى تجربتي دي تكون فيها فائدة لكم .

موقع Nileton اللي اشتريت منه تيشيرت اللي لبستهم في الشتاء وهما مناسبين لفصل الصيف أيضا وفي منتجات وأقسام أخرى للملابس على الموقع 

https://nileton.com

https://nileton.com/product-category/women/sportswear/

موقع Eva اشتريت منه البناطيل وفيه خيارات متنوعة من الملابس 

https://www.evafashioneg.com/ar/collections/pants

https://www.evafashioneg.com/ar

حساب الإنستجرام للبراند اللي اشتريت منه تيشيرت الصيف اسمه Fly fit 

https://www.instagram.com/flyfit51

     صورت فيديو على اليوتيوب فيه تفاصيل وشكل اللبس على الطبيعة ⬇

شاطئ الغرام والمكان اللي كليوباترا كانت بتستجم فيه

 

شجرة زيتون على الطريق

                                         

مرسى مطروح التى تتميز بجمال شواطئها ونقاء مياه البحر وتدرجات الوانه الفيروزية هي واحدة من أجمل المحافظات الساحلية في مصر وتتميز أيضا ببيئتها المتنوعة مابين الواحات والوديان والجبال فمن ناحية بيئة برية صحراوية مناسبة لمحبي التخييم والسفاري وعيش تجربة الحياة البدوية ومنها أراضي زراعية ومن جهة أخرى شواطئ تطل على أجمل مياه تسحر كل من رأها ، ليس هذا وحسب مطروح أيضا تعتبر من المحافظات التي تناسب جميع فئات المجتمع سواء للعيش فيها أو كزيارتها والسياحة بها ، من زيارتي الأولى لها أحببت تلك المدينة الرائعة وشعرت بارتياح كأني زرتها من قبل فكل الطبيعة التي تراها العين هناك كفيلة بأن تشفي وتريح الأنفس ، وكلما نظرت    لطبيعة الخالق سبحانه وتعالى رددت سبحان الله على صنعه اللذي لا يضاهى .

في زيارتي تلك مع العائلة ذهبنا لشواطئ متعددة منها شاطئ الغرام وشاطئ كليوباترا وكذلك شاطئ من الشواطئ المفتوحة والذي يبعد عن شاطئ عجيبة بحوالي 10 كيلومتر ولكنه يتميز بوجود سفينة جانحة والتي بقى ما تبقى منها على ذلك الشاطئ والتي كثرت الروايات حول سبب جنوح تلك السفينة ومن مظهرها اللذي لم أراه من قبل إلا في الأفلام  ، للوهلة الأولى تظن بأنها مخلفات حرب وقد يخطر على البال الكثير من الخيالات والقصص ، ومن القصص المنتشرة حول تلك السفينة بأنها كانت تستخدم لتهريب بضائع بشكل غير قانوني ومنها بضائع ممنوعة فتم استهدافها من قبل الجيش .

- شاطئ كليوباترا :-

يقع شاطئ وحمام كليوباترا شمال غرب مدينة مرسى مطروح على بعد 8 كيلو متر ، ويعد من أهم المعالم السياحية التاريخية ومن ضمن التطويرات التي قامت بها المحافظة للشاطئ إنشاء ممر زجاجي يربط بين الشاطئ وحمام كليوباترا الذي يقع داخل المياه ، وهو عبارة عن صخرة ضخمة ، على حافة الشاطئ وتلاطمها الأمواج وتمر فيها مياه البحر ، من خلال أنفاق منحوتة طبيعيًا ، ثم يصب في البحر مرة أخرى ، ويدخل الماء وينساب من فتحاتها بشكل رائع ، ويوجد في سقف الصخرة فتحات تسمح بدخول أشعة الشمس إلى داخل الصخرة من خلال الممر الزجاجي يمكنكم الوصول إلى الصخرة ( حمام كليوباترا  ) دون سباحة أو إستعانة بمركب والدخول فيها ورؤية جمال المكان وأخذ الصور التذكارية ، كما يوجد عدة صخور منحوتة طبيعيًا داخل البحر بأشكال مختلفة ورائعة. 

- شاطئ الغرام :-

شاطئ الغرام هو شاطئ يبعد حوالي 17 كم عن مدينة مرسى مطروح ويعتبر أكبر شواطئها ، أشتهر بعد غناء ليلى مراد أغنية رومانسية عند إحدى صخوره خلال أحداث فيلم شاطئ الغرام الذي صدر عام 1950 ومنذ ذلك الوقت، اكتسب الشاطئ اسم شاطئ الغرام نسبةً إلى الفيلم ، هذا الشاطئ من الشواطئ التي يتم إدارتها وتشغيلها من قبل محافظة مطروح فهو من الشواطئ المملوكة للدولة وقد أدى كبر حجم هذا الشاطئ إلى قدرته على استيعاب الكثير من الزوار قد يصل إلى 400 عائلة وبه أماكن مخصصة للسيارات ، ومن أهم العلامات المميزة بالشاطئ وجود صخرة ليلى مراد والتي سميت نسبة لها بعدما غنت عند تلك الصخرة في فيلمها منذ عام 1950 وتعتبر تلك الصخرة مقصدا سياحيا كما يوجد بالشاطئ مسرح مكشوف قد يستوعب من الجمهور حوالي 1000 شخص وقد سمي أيضا بإسم مسرح ليلى مراد وقد تم تطوير الشاطئ وتقسيمه إلى عام وخاص ، وتم إنشاء 7 مطاعم و 3 كافيتريات ، كما تم إنشاء 16 شاليه وتم عرض مؤخراً 8 أمتار يوجد بها 8 ماشيات يسهل على الزائرين السير عليها ، كما يوجد منطقة للبازارات وملاعب كرة الشاطئ ، ويمكنكم الذهاب في رحلة بحرية على متن يخت والحجز من خلال الشاطئ ويوجد العديد من الأنشطة البحرية الأخرى التي يمكن ممارستها على الشاطئ من أكثر الأمور التي أحببتها في هذا الشاطئ هو المشي على الرمال أمام البحر لتميزه بنعومة رماله وهي ليست مرتفعة فلن تشعروا بالتعب على الرمل أثناء المشي ولكن لم أفضل السباحة فيه بسبب الزحام الذي كان في ذلك الوقت الذي زرت فيه الشاطئ .

عيوب شاطئ الغرام من وجهة نظري هو الزحام لن تستطيعوا الشعور بالخصوصية على الشاطئ لأنه من الشواطئ التى عليها إقبال كبير فستجدوا الطاولات والكراسي في الجزء العام من الشاطئ ملتصقة بين الطاولات الأخرى للزائرين بسبب الازدحام وأيضا قد يضطر البعض الجلوس في صف ثاني وثالث بعد البحر بسبب ازدحام الصف الأول على البحر مما يؤثر على رؤيتهم للبحر وعلى الخصوصية أيضا الأفضل الذهاب للشواطئ العامة في أوقات باكرة من النهار لتجنب الزحام ، أيضا العيب الثاني هو دورات المياه تمكن الزائرين من الاستحمام في الجزء المخصص لذلك أو استخدامها كدورة مياه ولكنها تحتاج لاهتمام أكبر من حيث النظافة والصيانة مع أنها طورت حديثا ولكن قد يعود ذلك للأعداد الكبيرة للزائرين في الشاطئ  .

حادث على الشاطئ :- 

 كنا جالسين على شاطيء الغرام وكنا نشاهد مرور عدد من اليخوت التي تقوم برحلات بحرية ولكن معظم اليخوت يكون مكتظ بالسائحين وهذا من أبرز العيوب لهذه اليخوت وبسبب هذا الإزدحام يكون من الصعب السيطرة على الركاب على متن اليخت ، عند مرور أحد اليخوت وأثناء التفافه لكي يرسو على الشاطئ عند المنطقة المخصصة لذلك تم اختلال توازن اليخت بسبب تجمع الركاب في منطقة واحدة استعداد للنزول من على متن اليخت عند التفافه ووصوله للشاطئ مما أدى لاختلال توازن اليخت وبدء في الميلان ولكن العناية الإلاهية أنقذت الركاب قبل انقلاب اليخت ، أسرعت سيارات الإسعاف والمنقذين نحو مكان الحادث ولكن لم نسمع عن وجود إصابات خطيرة أو حالات غرق ، مر الحادث بسلام .

يمكنكم مشاهدة فيديو عن زيارتي للشواطئ التي تحدثت عنها من هنا ⬇

حديقة الأزهر

 

حديقة الأزهر من أكبر الحدائق المصرية مساحتها 72 فدان من الأراضي الخضراء في قلب القاهرة القديمة ، الحديقة مصنفة كواحدة من أفضل 60 مساحة عامة على مستوى العالم ، فيها خدمات متنوعة زي منطقة ألعاب خاصة بالأطفال ، وسيارات الأندية الكهربائية اللي ممكن تستخدم للتنقل من مكان لمكان داخل الحديقة أو للتجول داخل الحديقة  ، كمان فيها مناطق إنتظار للسيارات مساحتها كبيرة ، من ضمن الخدمات اللي بتقدمها الحديقة هي إمكانية عمل فوتوسيشن داخلها والتصوير للمناسبات المختلفة طبعا بيكون في رسوم بتندفع لدخول الكاميرا وأدوات التصوير وممكن تحتفلوا بمناسباتكم زي الأفراح أو الخطوبة وأعياد الميلاد في أماكن مخصصة داخل الحديقة ، ولو مش حابين تكلفوا  نفسكم تكاليف حفلة عيد ميلاد فممكن تاخدوا قالب كيك معاكم وأكلات خفيفة مع أصدقائكم أو الأسرة وتستمتعوا بالمناظر  الطبيعية والجو الرائع داخل الحديقة وتتصورا صور كتيير لأن المكان هناك مليان مناظر جميلة مناسبة للتصوير ، الحديقة رائعة بحيث إن كل الأعمار هتستمتع بالمكان هي بس لأن مساحتها كبيرة فهتحتاجوا تمشوا كتير وطبعا زيارة حديقة زي حديقة الأزهر محتاجة لزيارة أكثر من مرة علشان تقدروا تشوفوا كل الأماكن وتكتشفوها كلها ، مسموح بدخول الأكل داخل الحديقة بس الأداوات الحادة زي الشوك والسكاكين وغيرهم ممنوع دخولهم الأفضل يكونوا بلاستيك ، وفي مطاعم داخل الحديقة مصممين على الطراز الإسلامي المتناغم مع طراز الحديقة وممكن الاحتفال بالمناسبات الخاصة في هذه المطاعم حسب الحجز والشروط الخاصة بهم ، واحد من هذه المطاعم مبني على بحيرة صناعية داخل الحديقة واسمه مطعم البحيرة ومطعم أخر اسمه المصراوية ومطعم القلعة ، تقدروا من خلال صفحات المطاعم على الفيسبوك تسألوا عن المنيو والأسعار وطريقة الحجز .

الحديقة مقامة على أرض مرتفعة عن باقي الأراضي المحاطة بها فالجو بيكون جميل خاصة في وقت مابعد العصر وعند مغيب الشمس ، ومن خلال الحديقة في بعض الأماكن ممكن تشوفوا من بعيد قلعة صلاح الدين الأيوبي خاصة عند منطقة البحيرة الموجودة بالحديقة .

كمان في عربات طعام داخل الحديقة لبيع الأكلات المختلفة وبأسعار معقولة بس هي في أماكن معينة داخل الحديقة مش موجودة في الحديقة كلها ممكن تدخلوا على صفحة حديقة الأزهر على الفيسبوك وتسألوا عن كل الأسئلةاللي محتاجينها وفي موقع الكتروني خاص بالحديقة عليه مواعيد وأسعار التذاكر الخاصة بالحديقة والباركينج .

صفحة الحديقة على الفيسبوك :- 

https://www.facebook.com/alazharparkcairo/?locale=ar_AR

                                                        

جولة داخل الحديقة ⬇

نبتة التروبيك أو ديفنباخيا ( نباتات منزلية )

 

من وأنا طفلة صغيرة وأنا متعودة على وجود نبتة التروبيك في بيتنا ومن قبل ما أتولد والدتي ربنا يحفظها كان عندها أنواع مختلفة من النباتات لأنها بتحب العناية ومنظر الزرع في البيت وبتحس براحة مع وجوده في بيتنا ، ومن وقت ما كبرت وإحنا موجود عندنا النبتة دي بالتحديد لأنها النبتة الأكثر والأسرع في النمو ومع الإهتمام الجيد والمحافظة عليها بتعيش لفترة طويلة وبتزيد لدرجة والدتي كانت تشتري نبتة واحدة منها ومع الوقت تعمل أكثر من إصيص من النبتة الأولى تملى البيت وكمان تهادي جارتها منها وليها ذكريات حلوة معاها من فترة إنتقلنا من بيتنا وماما كان عندها زرع كتير من التروبيك وكان حجمه كبير مقدرناش ننقله معانا على بيتنا الجديد فقدمته هدية لجارتنا ، ولأن مفيش مشتل قريب  مننا أو مكان متوفر فيه نفس نبتة التروبيك اللي ماما بتحبها وكان نفسها فيها من تاني من وقت إنتقالنا لبيتنا الجديد ، لحد ما في الفترة الحالية اكتشفت موقع بيبيع نباتات مختلفة وأشجار وبذور نباتات وأسمدة ، نباتات داخلية وخارجية متنوعة ومنها نباتات مزهرة بينتج منها زهور جميلة وفي منها بتكون عطرية كمان هو موقع للبيع أونلاين فحبيت أجرب أشتري النبتة لأن ماما كان بقالها فترة بتطلب مني أدور عليها واجبهلها فقلت أجرب حظنا أنا وهي وطلبتها أونلاين،  لإني جربت أعتني بنباتات أخرى قبل كده بس للأسف مكنتش بتعيش وبتموت بسرعة ، بس أتمنى المرة دي النبتة تعيش أطول فترة لإن والدتي عجبتها جدا ورجعتلها ذكرياتها مع النباتات اللي كانت موجودة في بيتنا القديم .

الموقع اللي اشتريت منه النبتة اسمه مشتل  ، وده اللينك الخاص بالموقع ⬇

https://www.mashtalegypt.com/ar/

وده اللينك اللي فيه نبتة التروبيك ⬇

https://www.mashtalegypt.com/ar/product/dieffenbachia-tropic-snow/

الجميل في الموقع انه بيوفر نباتات مختلفة في منها أسعارها مرتفعة وفي منها أسعارها معقولة ، بس بالنسبة للنبتة اللي وصلتنا كانت حالتها جيدة جدا وفي اهتمام بالتفاصيل التغليف والتوصيل علشان توصلنا سليمة كمان حجمها كان معقول جدا لإني كنت خايفة تكون صغيرة بس طلع حجمها مناسب حتى الإصيص خامة البلاستيك بتاعه قوية وجيدة ، التربة المزروع فيها النبتة تربة بيتموس ودي بتكون من أفضل وأنظف أنواع التربات الزراعية خاصة للنباتات اللي بتتزرع داخل المنزل ، الموقع بيكون فيه بيانات عن حجم الإصيص اللي هتختاروه وكمان بيانات عن النباتات زي احتياجهم للضوء والري والعناية بشكل مختصر ، كمان لو عندكم أي سؤال عن العناية بالنبات تقدروا تتواصلوا معاهم عن طريق حساباتهم على السوشيال ميديا زي الإنستجرام والفيس بوك بيساعدوكم وبيهتموا جدا بالرد ، كمان الشحن بيكون عن طريقهم بشكل مباشر مش من خلال شركة شحن فبيوصل الطلب بشكل أسرع والنبات بيكون سليم .

كمان حسيت إن النباتات هدية حلوة ومميزة جدا زيه زي الورد وفيه ميزة عن الورد كمان لأنه مع العناية الجيدة بيه هيعيش أكثر من الورد وتهادوا بيه غيركم كمان ، ده غير إن الورد عندنا في الفترة دي في مصر أسعاره بقت غريبة فنبتة تتقدم كهدية أنا بشوف إنها بتكون هدية قيمة ومميزة .

ده فيديو لما وصلتنا النبتة هتشوفوا إزاي وصلت سليمة وفيها شكل أوضح للتروبيك⬇

آن شاء الله تعيش كتير زي اللي كانوا عندنا قبل كده 😊    

طريقة عمل اللبنة من الزبادي ( طريقة سهلة وبسيطة )

اللبنة من الأكلات اللذيذة والصحية جدا ومناسبة في التناول على الفطار في الأيام العادية أو في السحور في أيام رمضان ، كنت دائماأحب اشتريها وللأسف أسعارها بتكون مرتفعة وكنت متخيلة إن طريقة صنعها في المنزل صعبة لحد ما لقيت وصفة سهلة وبسيطة عجبتني وحبيت أجربها وفعلا كانت وصفة ناجحة والنتيجة لذيذة جدا فحبيت                                 أشاركها ممكن غيري يستفيد منها ويجربها .

المكونات و المقادير : - 

- 2 علبة زبادي المبستر أو العادي ( العلبة الواحدة كان وزنها 105 جم ) .

- رشة بسيطة من الملح .

- زيت زيتون .

الأدوات اللي إستخدمتها :- 

- مصفى وطبق عميق .

- طرحة شيفون أو قماشة خفيفة لتصفية السوائل من الزبادي وتحويلها للبنة .

طريقة التحضير :- 

في البداية نقوم بوضع المصفى على الطبق العميق ومهم أن تكون المصفى مرفوعة عن مستوى الطبق كي لا تلامس أسفله وتكون بعيدة عن السائل اللي هينزل من الزبادي ثم نقوم بفرد قطعة القماش على المصفى ونضع عليها كمية الزبادي المراد استخدامها ثم نرش الملح على الزبادي ونقلب جيدا حتى يمتزج الملح مع الزبادي ولكن لا نكثر من التقليب ، ثم نطوي جيدا أطراف قطعة القماش على الزبادي لتغطيته ونتركها في الثلاجة يوم كامل أو يومين ، بعد انقضاء المدة نخرجها من الثلاجة وهكذا يصبح لدينا لبنة سهلة لذيذة وسريعة التحضير نقوم بحفظها في علبة محكمة الغلق يمكن وضع قليل من زيت الزيتون على وجه اللبنة يضيف لها طعم مميز وفائدة صحية ثم تحفظ في الثلاجة حتى انتهاء مدة الصلاحية التي كانت مدونة على علب الزبادي . وبألف هنا ...

( حبيت في البداية إني أعمل كمية صغيرة كتجربة لو حد حابب يعمل كمية كبيرة كمية السائل اللي هينزل من الزبادي ده بيكون شرش الحليب يمكن استخدامه في وصفات زي المعجنات للإستفادة منه ) .

بالنسبة لتنظيف قطعة القماش في البداية قمت بشطفها جيدا من أثار وبقايا الزبادي ثم وضعتها في وعاء به ماء وصابون المواعين وتركتها قليلا ثم قمت بغسلها جيدا ولكي اتأكد من إزالة بقايا الصابون وضعتها بعد الغسل في ماء مضاف له القليل من الخل تركتها فيه قليلا ثم شطفتها جيدا لأخر مرة وقمت بنشرها في مكان جيد التهوية حتى تجف . 

 يمكنكم مشاهدة فيديو كامل عن طريقة هذه الوصفة ⬇