مرسى مطروح من المدن الساحلية الرائعة اللتي تطل على البحر الأبيض المتوسط وهي من أجمل المدن والمحافظات الساحلية في مصر ، سواء كان في النهار أو الليل مطروح دائما بتكون خلابة ولها سحر بيميزها ، حابة أكتب وأشارك تجربتي الشخصية عن السفر لمطروح قعدت فيها إسبوع مع أهلي كانوا من أجمل الأيام يمكن لأن دي زيارتي الأولى لمطروح فعلشان كده كنت مبهورة بجمال شواطئها والطرق والأحياء القديمة المناظر الطبيعية الخلابة الموجودة على أطراف الطرق وشوارعها الجميلة والممتعة حتى في الليل كمان ، بس حاسة إني حتى لو روحتها أكثر من مرة برده هحس بنفس الفرحة والإنبهار اللي حسيت بيه أول مرة ، هناك حبيت أصور فيديوهات وأخذت صور لأماكن مختلفة منها تكون ذكرى للرحلة الجميلة اللي قضيناها هناك و كمان علشان أشارك تجربتي وحبي لمطروح وأبين جمال البلد ، صحيح أنا مش من المشاهير بس ممكن اللي بكتبه ده يوصل لكثير من الناس و أشاركهم جزء بسيط عن مطروح وجمالها ، صحيح أن قراري في كتابة الموضوع ده جاء متأخر بس المهم إني أخذت القرار في النهاية ، آن شاء الله في المواضيع القادمة هكتب عن الشواطئ اللي زرتها وهشارك صور ليها أما في الموضوع ده هكتب عن بعض المعالم الموجودة في مطروح وعن المشي في شوارع وأسواق مطروح ليلا في نهاية الموضوع هيكون في فيديو مصور عن اللي هكتبه هنا .
زيارتنا لمطروح كانت في سبتمبر 2022كان الجو في الوقت ده حلو جدا يعني كان في نسمة هواء باردة في الليل أما في النهار كان الهواء بيكون أخف بس على البحر بيكون الجو معتدل وعلى وقت العصر بيبدأ الهواء يزيد والرطوبة كانت شبه معدومة محسناش بأي رطوبة في الوقت ده .
- في السبع أيام اللي قضيناها هناك كنا بنخرج بالليل بشكل شبه يومي شوية نتمشى على الكورنيش وشوية نتمشى في شوارع مطروح المختلفة وفي أوقات أخرى كنا بنزور أسواق ومحلات مطروح القديمة .
- المشي على الكورنيش والجلوس أمام البحر مع جمال الطقس بيدي متعة وحماس للمشي والجلوس في الكورنيش وزيارته أكثر من مرة على طول الكورنيش في كافيهات ومطاعم مختلفة وفنادق وعلى الجهة المطلة على البحر بشكل مباشر فيه شواطئ بتكون شواطئ خاصة يعني الدخول فيها بيكون بتذاكر وتأجير كراسي وطاولة والجلوس على شاطئ رملي أمام البحر أو الجلوس في كافيه أو مطعم بيكون موجود داخل بعض الشواطئ الخاصة مشكلة الشواطئ دي بالنسبة لنا عن رأي الشخصي أنها بتكون مزعجة شوية لأنهم بالليل بيحبوا يشغلوا أغاني من نوع المهرجانات المنتشرة والصوت بيكون مرتفع أكثر من اللازم ، واحنا بنتمشى أحيانا كنا بنحب نقعد في الممشى عند مصدات الأمواج وفي الأماكن اللي على شكل لسان داخل البحر الأماكن دي بتكون أهدأ .
* صورة لانعكاس ضوء القمر على البحر ❤
- خلال تمشيتنا على البحر شفنا مطعم ماكدونالدز هو بيطل على البحر مباشرة وفي جزء من المكان فيه خضرة بسيطة ونخل المكان من الداخل منظم ومساحته معقولة ، مع أنه كان زحمة بس القعدة كانت حلوة والمكان كان هادي ونظيف ، الفرع ده موقعه حلو أوي ومميز تقدروا تطلبوا أي حاجة من منيو ماكدونالدز سواء أكل أو مشروبات وتقعدوا في جو جميل وهادي على البحر احنا كنا حابين نطلب قهوة مثلجة بس للأسف مكنش متوفر أي نوع من مشروبات القهوة في الفرع ده فطلبنا أيس كريم ومشروبات غازية .
- على الكورنيش متواجد أكثر من مكان عبارة عن منطقة ألعاب فيها ألعاب مختلفة في منها مناسب للأطفال والكبار في منها المتواجد على الكورنيش وفي منها الموجود في وسط المدينة ، وفي كافيهات بتعمل مسابقات بين الناس للبلايستيشن ، واحنا بنتمشى على الكورنيش شفنا ناس بتشتغل في التصوير بيكون معاهم أزياء هندية وأزياء مناسبة للأطفال والكبار الناس بتلبس الأزياء دي حسب اختيارهم ويتصوروا بيها ويأخذوا الصور وفي ناس بيكون معاهم صقور بيسمحوا للناس تتصور مع الصقور دي في مقابل مادي ، من ضمن الحاجات المميزة هناك في اهتمام بصناعة المشغولات اليدوية في مجموعة من الأكشاك موجودة هناك على شاطئ الكورنيش مخصصة لبيع المنتجات اليدوية مواعيدها بتكون في الليل الأكشاك كلها معمولة بشكل واحد منظمة وكمان بيكون عليها إضاءة ملونة بتدي شكل جميل ليها .
- فتح الله جملة ماركت وهو سوبرماركت بيبيع بسعر الجملة ليه فرع هناك في مطروح على الكورنيش في الجهة المقابلة للبحر يعني لو رايحين على شقة أو شاليه مش فندق أو منتجع تقدروا تشتروا حاجة السوبرماركت منه .
- من ضمن الأماكن اللي ممكن تزوروها في مطروح الأسواق القديمة زي سوق ليبيا هو سوق مغطى بألواح الزنك ومن الداخل مقسم لأجزاء وكل قسم بيكون فيه منتجات مختلفة ومتنوعة مابين البهارات والمخللات الزيوت ، الشاي وغيرها كتير من المنتجات الغذائية وفي منتجات من ليبيا وتونس وطبعا التين والبلح والرطب اللوز بقشره ده بيبقى أصغر شوية من اللوز العادي اللي بنشتريه للأكل أو الحلويات هو سعر رخيص مش غالي وليه طعم شبه اللوز اللي بيكون في نوى المشمش احنا اشترينا منه وجربته مع التمر بحشي بيه التمر أو البلح الطري كان طعمه لذيذ جدا ، كمان هتشوفوا في السوق أقسام بتبيع منتجات تجميلية ملابس أحذية وأحذية رياضية سعرها معقول وممكن تفاصلوا كمان من ضمن الأماكن اللي ممكن تتسوقوا منها هو شارع اسكندرية ده شارع معروف هناك وفيه محلات مختلفة للملابس العبايات السوداء والملونة وملابس للبيت لبس المدارس شنط سفر وشنط مدرسية لأن في الوقت اللي كما فيه هناك كان وقت دخول المدارس ، كمان في محلات للأزياء الشعبية لأهل مطروح الأزياء العربية الخاصة بالرجال ، كمان زورنا مول تجاري أسمه مول بدر وده كان بناءه حديث فيه محلات ملابس أحذية إكسسوارات عطور وكان فيه محل اسمه عثمان بيبيع مصوغات ذهبية بس تقليد مش ذهب أصلي بس ميفرقش في الشكل عن الذهب الأصلي وأسعاره رخيصة جدا ، كمان اللي لاحظته في مطروح أن محلات الذهب الأشكال فيها والموديلات شبيه للذهب الخليجي يمكن لأن أهل مطروح الأصليين من العرب وليهم أصول من دول عربية مختلفة وواخدين من نفس العادات والتقاليد اللي لسة محافظين عليها .
- على الطريق العام بالقرب من سوق ليبيا هتلاقوا بزارات بتبيع مشغولات يدوية مختلفة من سجاد الكليم والشيلان المطرزة يدويا وشنط صناعة يدوية وكمان وحدات أضاءة مصنوعة من الملح وبيقولوا أنها مريحة وبتدي طاقة اجابية للمكان والله أعلم ، بس أشكالها حلوة جدا اشتريت منها 2 كهدية لبيت أخويا .
- قصة مسجد العوام :-
مكنتش أعرف قصة المسجد ده قبل ذهابي لمطروح بس هناك واحنا قاعدين على البحر شفت المسجد وقتها أخويا حكالي قصته وبالاستعانة بجوجل علشان نعرف تفاصيل أكثر ، قصة المسجد ليها أكثر من رواية بس من أشهرها رواية تناقلت عن حفيد صاحب الرواية اللي معاه مخطوطة أثرية بتثبت نسب جده اللي اندفن في المكان وسمى المسجد نسبة ليه واسمه حسب المخطوطة السيد العربيبن محمد بن عبد القادر بن أحمد إلى آخر النسب المنتهى بسيدنا على بن أبى طالب وفاطمة الزهراء رضى الله عنهما، وأنه لقب ب الأطرش وأبى البحار وولد في ولاية مستغانم بالجزائر على حد رواية حفيده بيقول ان جده كان راجع من الحجاز بعدما أدي فريضة الحج وكان معاه ثلاثة من أبناء أخيه وحجاج أخرين وكانوا راجعين عن طريق البحر ولكن خلال رحلة العودة توفى السيد العربي وأقاربه أخفوا وفاته عن ربان السفينة علشان يقدروا يدفنوه في أرضه بعد العودة ولكن وصل الخبر للربان واللي أصر على إلقاء جثمانه في البحر وده كان المتبع وقتها في الرحلات البحرية أن اللي بيتوفى بيلقوا بجثمانه في البحر ولكن أهل المتوفي كانوا رافضين الأمر وكانوا مصرين على بقائه في السفينة ولكن الأمر اختلف بعد ما شاف كل واحد فيهم رؤية للمتوفى السيد العربي وهو بيطلب منهم إلقاء جثمانه في البحر فوافقوا على الأمر بعد تغسيله وتكفينه والصلاة عليه ثم القوا بيه في البحر وبيقال ان جثمانه فضل ملاصق وماشي في نفس اتجاه السفينة لمدة يومين حتى اختفى وظهر جثمانه طائف على البحر بالقرب من الشاطئ شمال مدينة مرسى مطروح الناس لما لقوا الجثمان بالكفن وجدوا أن جسده لم يتأثر لا بملوحة البحر ولا حتى السمك قرب منه جسده كان محفوظ ولم يشوه فقالوا أن ده أكيد شخص من أولياء الله الصالحين وأطلقوا عليه اسم العوام وتم دفنه في الجهة المقابلة للشاطئ اللي سمى بشاطئ العوام نسبة لصاحب الكرامة وحسب الرواية الأحداث دي حصلت في عهد الملك فؤاد الأول و بعد كده اتبنى ضريح ليه في نفس المكان ودفن فيه وفي عام 1969 في عهد الرئيس الراحل جمال عبد الناصر تم بناء الجامع ودار مناسبات في نفس المنطقة ونقل الرفات في ضريح جديد وسمى بالعوام ، دي كانت قصة العربي بن محمد عبد القادر الملقب بالعوام ، والله أعلم .
يمكنكم مشاهدة فيديو كامل عن الزيارة مشاهدة ممتعة ⬇
.jpeg)
