باليرينا ( لكلوك ) لجميع المقاسات + جدول جميع مقاسات القدم

 

باليرينا كروشيه تنفع للأطفال والكبار 

في الشتاء بنبحث دائماً عن تدفئة الجسم خاصةً أكثر أجزاء بتبرد في جسمنا زي الكفوف والقدم بنبقى محتاجين ندفيهم بأي طريقة علشان نقدر نتعايش مع برودة الجو ، علشان كده محبي الكروشيه دايماً بيستنوا الشتاء علشان يعملوا الحاجات الجميلة زي الجوانتي والشرابات أو اللكلوك بخيوط الكروشيه المتنوعة بتمد الجسم بالدفء وكمان بيكون شكلها جميل ورائع وبنستمتع بشغلها وبنعملها بحب لينا ولأفراد عائلتنا ، في الموضوع ده حبيت أشارك معاكم طريقة عمل الكلوك أو باليرينا من الكروشيه وكمان هعرفكم ازاي تعملوها لكل مقاسات القدم المختلفة وازاي نحسب عدد السلاسل لبدء الشغل ، أتمنى الموضوع يعجبكم وتستفيدوا منه .

الأدوات المستخدمة:- 

- إبرة كروشيه مقاس 4mm .

- كرة فرو أو كرة بوم بوم / ابرة خياطة عادية وخيط لتثبيت الكرة .

- متر لقياس عدد سلاسل البداية .

- مقص وإبرة تنظيف .

- دبوس خاص بالكروشيه .

- خيط مخمل .

صورة للخيط اللي استخدمته 

الغرز المستخدمة :- 

- غرزة السلسلة .

- غرزة الحشو .

- غرزة نصف عمود .

- غرزة عمود بلفة .

- غرزة المنزلقة .

- تناقص بغرزة عمود بلفة .

- تناقص بغرزة الحشو . 

في البداية هنحتاج نعرف مقاس القدم اللي هنعملها الباليرينا أو أي منتج للقدم ، في الجدول التالي هتلاقوا كل المقاسات للأطفال والكبار 

بعد ما تختاروا المقاس اللي هتشتغلوا عليه دلوقتي لازم نعرف إزاي نحسب عدد السلاسل اللي هنبدأ بيها في البداية هنشوف مقاس طول القدم ونطرحه من مقاس عرض القدم والناتج هنعمل على أساسه عدد سلاسل البداية بحيث ناتج عدد السلاسل دي تساوي ناتج طرح الطول من العرض بالسنتيمتر 

مثال :- 

لو اخترنا مقاس 38 فالمقاس ده طول القدم فيه 24 سم والعرض 9.5 سم الحساب هيكون كالأتي : هنطرح الطول من العرض

 24 – 9.5 = 14.5 سم يبقى هنحتاج عدد سلاسل = 14.5 سم يعني هنستخدم الخيط والابرة ونبدأ نعمل سلاسل البداية ونقيس السلاسل دي بالمتر ونشوف اذا وصلت 14.5 سم ولالأ وطبعاً الموضوع ممكن يختلف من خيط للثاني حسب مقاس الخيط ومقاس الإبرة يعني ممكن نوع خيط يدينا 18 غرزة سلسلة = 14.5 سم بينما خيط وإبرة بمقاس تاني يدونا 14 غرزة سلسلة وهكذا ...

يفضل اننا واحنا بنختار المقاس نختار مقاس القدم يكون اكبر بدرجة عن المقاس الحقيقي يعني لو مقاسي 39 في الأحذية هختار اشتغل على مقاس 40 علشان الخيط بيفرق عن الأحذية .

الطريقة هتلاقوها بشكل أوضح في الفيديو التالي مشاهدة طيبة 

بندانة كروشيه من المخمل ( Twist Headband )+ طريقة التحويل من الإنش ( البوصة ) الى السنتيمتر والعكس

 بندانة جميلة وسهلة  جداً لشتاء دافئ 

 

 

بندانة الشعر من الحاجات المميزة اللي ممكن نعملها بالكروشيه بغرز مختلفة بتدي شكل حلو جداً في اللبس و بما إننا دخلنا في فصل الشتاء حبيت أشارك معاكم بندانة كروشيه بغرزة سهلة وبسيطة جداً بس هتديكم في النهاية شكل جميل وكمان تدفئة لمنطقة الرأس والأذن و مريحة في اللبس .

الأدوات اللي هنحتجها :- 

- خيط مخمل .

 نوع الخيط اللي استخدمته (Himalaya Dolphin Baby) 

الخيط ده حجمه 100 جرام لكن البندانة احتاجت مني حوالي 63 جرام من حجم شلة الخيط .

- إبرة كروشيه مقاس 4mm .

- متر لقياس حجم البندانة .

- وطبعاً مقص وإبرة تنظيف .

صورة لشلة الخيط المستخدمة 

الغرز المستخدمة :- 

- غرزة السلسلة .

- الغرزة المزدوجة ( double crochet ) .

في البداية هنحتاج نعمل عدد من غرزة السلسلة بحيث يكون عرض البندانة حوالي 5 انش / بوصة = 12.5 سنتيميتر أنا هنا عملت حوالي 20 غرزة سلسلة علشان تديني العرض المناسب ليه وهو 5 انش وممكن عدد السلاسل يختلف حسب مقاس الخيط والإبرة المستخدمة وكمان حسب مقاس الرأس لو طفلة صغيرة أكيد هتختلف هيكون المقاس أصغر ، 5 انش مناسب للكبار .

 بالنسبة لخيط المخمل هو خيط جميل جداً وناعم وخفيف في اللبس وبيدفي جداً بس هو محتاج حرص في الأستخدام وانتوا بتشتغلوا بيه ، ولو حسيتوا انكم هتتلخبطوا في حساب عدد الغرز لأن نوع الخيط ممكن يخلي الغرز مش واضحة اوي في البداية لو واجهتكم المشكلة دي ممكن تستخدموا العداد الخاص بالكروشيه أو السبحةالإلكترونية 

جدول لقياس محيط الرأس بالسنتيمتر حسب المرحلة العمرية 

طريقة التحويل من الإنش الى السنتيمتر 

البوصة أو الإنش الواحد يعادل 2.54 سنتيمتر

1 بوصة  أو انش = 2.54 سم

في حالة التحويل من انش الى سنتيمتر ، قم بالضرب في 2.54

القيمة بالسنتيمتر = قيمة الانش × 2.54

مثال :-

9 انش كم سم

الحل:-

القيمة بالسنتيمتر = 9 انش × 2.54

= 22.86‬ سم

 

أما في الحالة العكسية ..

اي التحويل من سم الى انش ، قم بالقسمة على 2.54

القيمة بالانش = القيمة بالسم ÷ 2.54

مثال :-

قم بتحويل 20 سم الى انش

القيمة بالانش = 20 سم ÷ 2.54

= تقريباً 7.87 انش

طريقة عمل البندانة هتكون واضحة لِكم من خلال الفيديو التالي مشاهدة ممتعة وأتمنى الفيديو ينال إعجابكم 

  

شنطة كروشيه بغزة الباف المائلة

 شنطة كروشيه بغزة الباف المائلة

شنط الكروشيه من الحاجات الجميلة جداً اللي ممكن نتعلمها و نتقنها بسهولة أهم حاجة 

يكون عندنا صبرو طولة بال وطبعاً لما بنكون بنتعلم 

حاجة إحنا بنحبها اكيد النتيجة هتكون على قد حبنا للحاجة دي ، موضوع النهاردة هنتعلم 

فيه إزاي نعمل شنطة جميلة جدا وشيك ممكن 

نستخدمها في السهرات أو حتى مع لبس فورمال  (formal) 

 أتمنى تعجبكم وتستفيدوا من الموضوع 

هتبقى جميلة جداً .

الأدوات اللي هنحتجها هي :- 

- بكرة خيط كليم 900 جرام .

- إبرة كروشيه مقاس 7ملي .

 - إبرة تنظيف تكون فتحتها عريضة علشان خيط الكليم عريض .

- قماش بطانة حرير أو قطن زي ما تحبوا .

- متر علشان نقيس بيه طول وعرض الشنطة ونعرف مقاس البطانة اللي هنحتجها .

- اكسسوارات الشنط زي 2 حلقة معدن وسلسلة للشنطة .

- قفل خاص بالشنط .

الغرز المستخدمة :-  

- غرزة سلسلة .

-غرزة حشو .

- غرزة الباف المائلة .

- الغرزة المنزلقة .

 هتشوفوا الطريقة بالتفصيل في الفيديو التالي  

الجزء الأول

الجزء الثاني

مفرش ورد من الكروشيه بطريقة بسيطة مناسب للمبتدئين في الكروشيه

مفرش ورد من الكروشيه سهل وبسيط 

موضوع النهاردة هيكون عن طريقة سهلة ومناسبة للمبتدئين في الكروشيه وهي مفرش من الورد بسيط وحلو في نفس الوقت هنستخدم فيه 3 غرز سهلة وبسيطة جدا

الغرز المستخدمة :-

- غرزة السلسة .

- غرزة الحشو .

- غرزة المنزلقة .

الأدوات المستخدمة:-

- إبرة كروشيه مقاس 4m .

- خيوط مناسبة لمقاس الإبرة وممكن نستخدم بواقي الخيوط أنا هنا استخدمت خيوط قطن

- ابرة تنظيف .

- ممكن علشان نضيف لمسة جمالية اكتر للمفرش نستخدم فصوص لولي نصف دائرة أوأي خرز نصف دائرة .

طريقة عمل المفرش وتزيينه بالخرز هتلاقوها في الفيديو التالي أتمنى تنال إعجابكم  

 

بندانة للرأس من الكروشيه بغرزة Headband crochet / Broomstick

في الموضوع ده هنتعلم طريقة عمل بندانة للرأس من الكروشيه بطريقة حلوة وسهلة

وبيبقى شكلها حلو أوي في اللبس

علشان تقدروا تنفذوا نفس البندانة يبقى لازم يكون عندكم علم بغرز السلسلة / والحشو /

والمنزلقة لأن دي الغرز اللي هنحتجها في شغل البندانة واللي هيدونى شكل غرزة

الBroomstick

والأدوات اللي هنحتجها :-

- خيط اليزا ديفا ولو تحبو ممكن تستخدموا ديفا بلس علشان بيكون اتخن أنا كان عندي

بكرتين بنفس اللون من اليزا ديفا فاخدت خيط من كل بكرة

علشان اخلي السمك يكون اتخن والطريقة هتكون واضحة اكتر في الفديو .

- لو استخدمتم خيطين زيي يبقى هتحتاجوا ابرة رقم 4 لان خيط اليزا ديفا بيحتاج ابرة

مقاس من 1-3 بس طبعا علشان انا استخدمت خيطين مع بعض

فهحتاج ابرة اكبر .

- وطبعا هنحتاج ابرة تنظيف ومقص .

في الفديو المرفق انا عملت البندانة لبنت عمرها 9 سنين قست محيط الرأس عندها بالمتر

فكان القياس 52 وبعد كده عملت مجموع سلاسل

علشان اوصل للمقاس اللي اخدته والنتيجة كانت اني عملت 100 سلسلة وزودت 5

سلاسل علشان الغرزة دي بتصغر المقاس شوية فلازم تخلو بالكم من

النقطة دي بس متزودوش زيادة عن اللزوم علشان البندانة مع الوقت واللبس هتوسع

ودلوقتي هسبكم مع الفيديو علشان تشوفوا الطريقة مع الشرح

ويكون الموضوع اسهل ليكم اتمنى الفيديو والطريقة تعجبكم وتستفيسدوا منها .

تعلم غرزة السلسلة والحشو والمنزلقة في الكروشيه للمبتدئين

تعلم الكروشيه مش حاجة صعبة وكمان مش حاجة سهلة لازم في البداية يكون عندنا صبر 

وطولة بال علشان نقدر نكمل ولو غلطنا نرجع نعيد من الأول لأن كل غلطة هتعلمنا حاجة 

جديدة ولازم ننسى اليأس لو يأسنا يبقى مش هنقدر نكمل تعليم  أهم حاجة يكون عندنا 

الارادة زي أي حاجة في الدنيا بتحتاج ارادة واصرار لحد مانحصل على اللي عايزينه .

في الفديو المرفق مع الموضوع ده بشرح فيه طريقة تعلم غرزة السلسلة وغرزة الحشو 

وغرزة المنزلقة وكمان ازاي نعمل عقدة البداية بطريقة سهلة جداً وبسيطة من غير تعقيد 

أتمنى يعجبكم الشرح وتستفيدوا منه . 

الأدوات اللي بنحتجها في تعلم الكروشيه + مقدمة سريعة وبسيطة عن الكروشيه

في الموضوع ده هنتعرف على الكروشيه وايه أهم الأدوات اللي

هنحتجها في بداية تعلم الكروشيه

في بداية تعلم الكروشيه مش لازم يكون عندنا كل الأدوات لكن ممكن نكتفي بابرة

كروشيه وخيط مناسب لمقاس ابرة الكروشيه ويفضل في البداية تكون ابرة الكروشيه

حجمها كبير ممكن تبتدوا بمقاس 4 علشان المقسات الكبيرة بتدينا غرز أكبر وأوضح لينا

في بداية التعلم لاننا بنكون لسه بنتعرف على شكل الغرز وبالتالي مقاس الابرة هيساعدنا

ويسهل علينا التعلم أكتر

باقي الأدوات اللي ممكن نحتجها بعد منتقن الكروشيه هتتعرفوا عليها أكتر في الفيديو

وهتتعرفوا كمان على معلومات أكتر عن الكروشيه وأنواع ابر الكروشيه وبعض البدائل

لأدوات الكروشيه

في الفيديوهات الجاية باذن الله هنتعلم طرق غرزة السلسلة والحشو والمنزلقة

وطريقة مسك الابرة والخيط وعمل عقدة البداية

طريقة عمل ماسك الكمامة أو Ear saver بغرزة مختلفة غرزة عصا المقشة ( Broomstick Stitch )

في الفترة الأخيرة وبسبب فيروس كورونا كل العالم أصبح مضطر للبس الكمامة الطبية لفترات طويلة  وطبعاً الناس 

مكنتش متعودة  على  ده قبل انتشار الفيروس ، وفي ناس بقت بتتدايق من لبس الكمامة وأصبح الموضوع متعب بالنسبة 

ليها ، في الفترة الأخيرة في  طفل كندي أخترع قطعة بلاستيك بتتثبت الكمامة فيها من عند الأستك علشان تحمي الأذن 

من الالتهابات والوجع اللي بيسببه أستك الكمامة .

وبعد كده انتشرت حاجة بنفس الفكرة بس معمولة من الكروشيه ودي ناس كتيره أصبح سهل بالنسبه ليهم انهم ينفذوها 

وفي ناس كمان عملوها بيزنس ليهم وبينتجوا القطعة دي ويبيعوها بأسعار متفاوتة وبأشكال مختلفة من غرز الكروشيه ، 

في الموضوع ده حبيت أعرض طريقة عمل القطعة دي بغرزة مختلفة وحلوه جداً هي غرزة اسمها غريب شوية بس 

شكلها أحلى من اسمها وهي غرزة عصا المقشة مش عارفة ليه سموها بالأسم ده يظهر ان اللي سماهاأو سمتها كده كان 

بيتفرج على كارتون فيه الساحرة الشريرة وهيا طايرة  على المقشة  بتاعتها والله  أعلم .

دي صورة لماسك الكمامة من الكروشيه اللي انتشرت على الانترنت

الغرزة دي كمان بتعتبر واحده من غرز الدانتل في الكروشيه وممكن نعمل منها حاجات كتير زي البلوزات ،اكسسوارات

وغيرها .

الأدوات اللي استخدمتها هي :-

- ابرة كروشيه مقاس 4 mm .

- خيط مناسب لمقاس الابرة وممكن تستخدموا أي نوع خيط تحبوه .

- ابرة تنظيف ومقص .

الغرز المستخدمة هي :-

- غرزة السلسلة .

-غرزة الحشو .

- غرزة المنزلقة .

في البداية بنعمل غرز السلسلة حسب المقاس اللي عايزينه وبعد كده ممكن نقسها على راسنا من الخلف ونشوف اذا 

لمقاس مظبوط أو محتاج غرز سلسلة زيادة ولازم تكون عدد غرز السلسلة اللي هنشتغل عليها يكون بيقبل القسمة على4 

علشان احنا هنشتغل على كل 4 غرز سلسلة وعلشان أبسط الموضوع ليكوا أكتر هحطلكم الفيديو اللي عملت فيه 

الطريقة  أتمنى تشوفوه ويعجبكم وتقدروا تنفزوا الطريقة دي ويكون الشرح واضح ليكم .

وده الشكل النهائي للقطعة اللي أنا عملتها وهيا ملبوسة فوق الحجاب